Rome 3:22 - Hawaii Pidgin Bible

²² God wen make us come right wit him wen we go trus Jesus Christ, da Spesho Guy God Wen Sen. He do dat fo erybody dat trus him, no matta who you.

Rome 3:22 Referans Kwoze

Rome 10:12

Da Jew guys an all da odda peopos, dey all same same. No mo diffrence. Cuz get Da One Dat Stay In Charge, an he Da One In Charge fo erybody. He goin do plenny fo erybody dat aks him fo kokua dem.

Galatia 3:28

Now, no matta Jew o not one Jew, slave o not one slave, guy o wahine, you guys all same same cuz you stay tight wit Christ.

Galatia 2:16

We know dat nobody can get um right wit God jus cuz dey do wat da Rules tell um fo do. Dey get um right wit God cuz dey trus God Spesho Guy Jesus Christ. Us guys trus Jesus Christ. Az why God tell we get um right wit him. We no go do wat da Rules tell us fo do fo us get um right wit God cuz da Rules no make nobody get um right wit God.

Rome 8:1

So den, God no goin punish da peopo dat stay tight wit Jesus Christ!

Colosse 3:11

Inside Christ new way, no matta if one guy Jew an da odda guy not Jew, if one guy get da cut skin mark an da odda guy no mo da cut skin mark, if one guy donno oua language, o stay real wild jalike one guy from Sytia, if one guy one slave guy an anodda guy not. Christ da ony ting dat matta, an he stay tight wit all dese kine diffren peopo.

Philippi 3:9

I like erybody know dat I stay tight wit Christ. I do wat da Rules From God tell me fo do, but dat no make me get um right wit God. I get um right wit Christ cuz I trus him! Az why wen I trus him, God da One dat make me get um right wit him.

Rome 2:1

So den, no matta who you, if you poin finga somebody dat do bad kine stuff, no foget you do da same kine tings jalike him. Eh, you too no mo excuse cuz you poin finga you.

Isaiah 61:10

I stay feel plenny good inside cuz a Da One In Charge. I feel real good cuz a my God. Cuz jalike he give me clotheses fo wear Dat show he da One get me outa trouble, An jalike he give me one nice robe Fo show I get um right wit him. I feel jalike one guy dat goin get married An wear one fancy hat jalike da pries guys, An I feel jalike da lady dat goin marry too, An wear all kine jewelry!

James 2:23

So dis wen happen jalike da Bible tell: ‘Abraham trus God, so God make Abraham get um right wit him.’ An God tell, ‘Abraham, he my fren.’

Jesus Guys 15:9

God see dem same same jalike he see us. He make dem clean inside cuz dey trus him.

1 Corint 4:7

So, wat? You guys tink you diffren from all da odda peopo? Eryting you guys get, God give um to you. So den, wen you guys get da stuffs, how come you guys get big head, jalike you guys da ones go get um an God neva help you?

Rome 9:30

So wat den? Wat dis mean? Get all kine peopos from diffren place dass not Jew guys. Dey neva try fo get um right wit God befo time. Now, dey get um right wit him cuz dey trus um.

Luke 15:22

“But da faddah tell his worka guys, ‘Come quick ova hea! Hurry up! Go get one robe, da bestes one, an put um on him. Put one ring on top his finga an shoes on top his feets.

Jeremiah 23:6

Wen he da king, da Judah peopo goin get outa trouble, An da Israel peopo goin know fo shua eryting stay okay. Dey all goin give dea king one name dat mean, ‘Da One In Charge, da one dat do right fo us guys erytime.’ ”

Daniel 9:24

“Seventy times seven year, az da time God wen make fo yoa peopo an fo yoa town dat stay spesho fo God: fo make da peopo dat go agains God stop, fo make da ones stay do bad kine stuff stop, fo make sacrifice, fo make da peopo dat do wass wrong come pono wit God, fo make dem do da right kine stuff all da time, fo put seal fo show dat wat da guy dat talk fo God dream stay fo real, an fo make da Real Real Spesho Place inside da Temple come spesho fo God one mo time.

Jesus Guys 3:16

Dis guy you see hea, you guys know him. He find out wat kine guy Jesus, an he trus him. Dass why he come good. Jesus, he da One dat make him come good to da max! An you guys can see dat he stay good.

Jesus Guys 11:12

God Spirit tell me, ‘No sked fo go wit dem now.’ Dese six braddahs hea, dey go wit me Cesarea side. An we go inside da guy Cornelius house.

Rome 1:17

Wen you tink bout all dis Good Kine Stuff From God, you goin undastan wat God wen do fo make peopo come pono wit him. But gotta trus him from da start to da end. Da Bible tell dis befo time: “Da guy dat erytime do wass right, He goin live fo real kine cuz he trus me.”

Rome 3:30

Cuz ony get one God. Da guys dat get da cut skin mark fo show dey one Jew kine guy, God make dem get um right wit him cuz dey trus him. An da peopo dass not Jew guys an no mo da mark on top dem, he make dem get um right wit him cuz dey trus him too.

Rome 4:16

Dass why mo betta trus him. God like do plenny good tings fo da peopo dat trus him. Az why we know da promise God wen make stay solid fo all us guys dat come from Abraham. Dis not ony fo da peopo dat get da Rules From God, but da peopo dat same time trus God jalike Abraham. Cuz he jalike da faddah fo all us guys.

Rome 10:4

Christ wen do eryting fo make us come right wit God. Dass wat da Rules wen try fo do, but dat neva get da powa fo do um. So whoeva trus Christ, dey da ones goin get um right wit God.

1 Corint 12:13

Us guys stay tight wit da one Spirit. Az why, wen us guys wen get baptize, us all come jalike we one peopo. No matta we Jew o not, no matta us gotta work like one slave o not, God wen give all us guys da One Spirit, jalike us all drink watta from da same puka.

Galatia 2:20

Jalike I wen mahke wen Christ mahke on top one cross. Now, I no stay alive no moa, but Christ stay alive inside me. I get da real kine life dat goin stay to da max foeva inside my body now cuz I stay trus God Boy. He get plenny love an aloha fo me, an he wen give up his body wen he wen mahke fo me.

Galatia 3:22

Da Bible tell dat erybody stay do bad kine stuff an dass jalike dey stay lock up in prison cuz a dat. An dass how come da Bible tell dat dey lock up fo show dat peopo gotta trus Jesus Christ, fo get da kine life God wen promise.

Efesus 3:12

An us guys dat stay tight wit Christ, fo shua we no need hold back cuz garans us can talk to God any time we like. We trus him, az why we do dis.