Rome 14:12 - Hawaii Pidgin Bible

¹² So den, all us guys gotta tell God how come we wen do da tings dat we wen do.

Rome 14:12 Referans Kwoze

1 Peter 4:5

Bumbye dey goin stan in front God da Judge an tell him how come dey wen make lidat. God stay ready fo dem. You know, erybody gotta stan in front him, da guys dat stay alive an da guys dat wen mahke.

Matthew 12:36

I tell you guys fo real kine, da day all you guys stan in front God da Judge, you gotta tell how come you wen tell all da no good stuff you wen tell.

Matthew 16:27

I da Fo Real Kine Guy. I goin come back wit God angel messenja guys from da sky. Goin be awesome, cuz my Faddah, he awesome. Den I goin pay erybody fo wat dey wen do, good kine o bad kine.

Galatia 6:5

Cuz erybody gotta make shua dey pono, no matta odda peopo not pono.

Luke 16:2

So da rich guy tell da luna fo come by him, an he tell, ‘Eh, wat dis I hear bout you? You betta show proof how you wen spen my money, cuz you no goin be in charge no moa.’

Teacha 11:9

You young guys, stay good inside wen you young. Inside, yoa heart make you dance an sing. Do wat you like do, An see wat you like see. But no foget, dat fo all dis stuff, Bumbye God goin judge you.

2 Corint 5:10

You know, erybody gotta go in front Christ da Judge, an us no can hide notting. Dat time us goin get back wat we wen do, wen we wen stay inside dis world. An no matta us wen do da good kine stuff o da no good kine stuff.