John 12:36 - Hawaii Pidgin Bible

³⁶ Right now, I stay hea wit you guys. I jalike da light fo you guys, fo you trus me. Den you guys can come da kine peopo dat know wea dey going cuz dey get da light inside.” Jesus tell dat. Den he go way from da peopo fo nobody stay by him.

John 12:36 Referans Kwoze

Efesus 5:8

Befo time, you guys neva know God. Jalike was all dark inside you guys. But now, you guys stay tight wit Da One In Charge, jalike you guys get da light inside you. Now, go ack how you suppose to ack, jalike da guys dat get da light inside dem.

1 Tessalonika 5:5

Cuz you guys do good kine stuff dat you no shame fo do day time fo erybody see. We no do da kine bad stuff dat da odda peopo like do nite time fo nobody know.

John 8:59

Den dem guys go get rocks fo stone Jesus fo kill um. But he hide an go outside from da open lanai fo da Temple.

Luke 16:8

No matta da luna no do wass right befo time, da boss talk good to him now bout dis smart ting he wen do. You know, da peopo dat stick wit dis world mo smart wit money kine stuff den da peopo dat stick wit da light.

John 11:54

Az why Jesus no go aroun no mo wea da Jew leada guys can see him. He go one place nea da boonies, Efraim town. He stay ova dea wit da guys he stay teach.

John 1:7

God sen um fo tell all da peopo wat he know bout da light from God, fo dem trus God cuz a him. Dass his kuleana.

Isaiah 60:1

Da One In Charge tell: “You Jerusalem peopo, Stan up! Shine jalike one light! Cuz now, you get awesome light from me, Da One In Charge. I stay awesome, An I jalike da bright light Dat make you peopo come awesome too, Jalike wen da sun come up an shine light fo you.

1 Tessalonika 5:8

But all us guys, we gotta figga fo real kine an stay ready. We gotta fight da bad kine stuff. Az why we trus God, an get love an aloha fo him an his peopo. Dass jalike body armor fo us guys. An we know fo shua dat God goin take us outa da bad kine stuff we stay in. Dass jalike one helmet fo one army guy head.

John 3:21

But whoeva stay do wat da true stuff tell fo do, dass jalike dey like fo da light shine on top dem, fo show erybody dat eryting dey do, dass wat God tell um fo do.”

Matthew 21:17

Den he go way from dem, an go Betany, da small town outside Jerusalem, an stay ova dea.

Matthew 5:14

“You guys jalike da light dat help da peopo all ova da world fo see. You no can hide one town on top one hill.

John 8:12

Jesus talk to da peopo one mo time. He tell, “I jalike da light fo da peopo inside da world. Whoeva come by me an be my guy, dey no goin go aroun inside da dark. Dey goin get da light dat make dem live fo real kine.”

John 12:37

No matta Jesus wen do plenny awesome stuff in front da peopo fo show who him, dey still yet no trus him.

John 12:46

I wen come inside da world fo da peopo know da trut, jalike me da light fo dem. An whoeva trus me, dey goin know da trut. Dey no goin stay jalike dey dark inside an donno notting.