Jeremiah 51:53 - Hawaii Pidgin Bible

⁵³ No matta da Babylon peopo like climb up to da sky, An make dea town wall real high Fo nobody climb ova um, Goin get guys dat come from me Dat goin wipe out Babylon town.” Az wat Da One In Charge tell.

Jeremiah 51:53 Referans Kwoze

Jeremiah 49:16

You tink you can make peopo come sked a you, An you get big head. But you ony bulai you! You guys stay wea you can hide inside da cliffs, An you guys take ova da top a da hills, Even if you guys make yoa nes high, jalike one eagle, I goin bring you guys down from dea!” Az wat Da One In Charge tell.

Start 11:4

Den dey tell: “Eh! You know wat? Us go build one big town fo all us guys. Us make one big towa dea fo go up inside da sky wea God stay! If we do dat, den us goin get one big name, an all us guys goin stay hea togedda. We no need move house all ova da place no moa.”

Jeremiah 51:25

Da One In Charge tell: “I da One stay agains you Babylon guys, You jalike one volcano dat wipe out da whole earth. I goin use my powa agains you, An roll you off da cliffs. I goin make you jalike one mountain dat stay all burn up.

Amos 9:4

No matta da guys dat stay agains um make dem come prisonas An make um walk all da way to anodda country, I goin tell da peopo ova dea fo kill um wit swords. I goin watch fo make shua dat bad tings happen to dem, Not good tings.’ ” Dass wat Da One In Charge tell.

Daniel 4:30

He tink, “Dis town, Babylon, stay big now! Az cuz I wen build um lidat fo come my house, da king! I do um cuz I stay real strong an peopo goin know I awesome an importan!”

Jeremiah 51:58

Dis wat Da One In Charge, da God Ova All Da Armies, tell: “Da thick Babylon wall goin come all broke down. Da high town gates goin come all burn up. Plenny nations wen work hard fo build um—fo notting. Wase time, all dose peopos wen work fo make wat da fire goin burn down!”

Jeremiah 51:48

Den, da sky, da earth, an erybody inside um, Goin cheer plenny, Cuz dey stay good inside fo wat happen Babylon side. Cuz from da north side, Army guys goin attack Babylon.” Az wat Da One In Charge tell.

Jeremiah 51:11

Da ones dat goin attack Babylon tell, “Make yoa arrows sharp. Fill up yoa arrow bags! Da One In Charge wen put one spirit inside da kings fo da Mede peopo Dat make um like do someting. Az cuz he make up his mind, Fo wipe out Babylon. How come Da One In Charge goin pay dem back, aah? He pay um back Cuz a wat dey wen do to his Temple!

Jeremiah 50:45

So lissen up, wat Da One In Charge make plan fo do Agains da Babylon peopo, An agains dea land: Jalike somebody goin drag away da young sheeps, An Da One In Charge goin wipe out all dea land dat get good grass.

Jeremiah 50:25

Me, Da One In Charge, I wen open up my place Wea I keep all my stuffs fo fight, An bring out all da tings I use fo fight Cuz I stay huhu. An I Da One In Charge, da Boss, da God Ova All Da Armies. I get plenny work fo do inside da Babylon land.

Jeremiah 50:21

“Attack da Babylon peopo Da ones dat live Meratayim side, An da ones dat live Pekod side. Kill dem, an wipe out eryting dey leave, Jalike wen you kill one animal fo make sacrifice! Do eryting I tell you fo do.” Az wat Da One In Charge tell.

Isaiah 47:7

You Babylon guys talk Jalike you goin stay foeva, Jalike yoa town stay one queen foeva! But you neva tink bout all dis stuff, O wat goin happen bumbye Cuz a wat you stay do now!

Isaiah 47:5

Da One In Charge, he tell da Babylon peopo: “Sit down an no talk! Sit inside da dark place. Nobody goin tell you guys no moa Dat yoa town jalike da queen Ova all da kings an da peopos.

Isaiah 41:25

“I wen make one guy come from da north side. He come dea from da place wea da sun come up. He know my name cuz he know who me. Dis guy walk all ova da guys in charge a da countries, Jalike dey mud, Ready fo make pots wit da clay.

Isaiah 13:17

“But you know wat I goin do?! I goin make da Mede peopo go agains da Babylon guys. Da Mede guys, dey ony like win. You give um silva kine stuff, but dey no kea fo dat. You give um gold, but dat no make dem stay good inside.

Job 20:6

No matta dey real big head, An dea head touch da clouds,

Jeremiah 51:56

Wen da army guys go attack Babylon town fo wipe um out, Dey goin make da Babylon army guys dea prisonas, An broke dea bows an arrows. Cuz fo shua, dass da kine God me, Da One In Charge. I goin pay dem back fo eryting dey wen do.

Amos 9:2

“ ‘No matta dey dig way down inside da Mahke Peopo Place, I goin pull um back outa dea wit my hand. No matta dey go up to da sky, I goin pull um back down from dea.

Habakkuk 2:9

“Bummahs fo da Babylon guys dat build fancy houses fo dem, But dey rip off odda peopo fo do um! Jalike dey one bird dat put dea nes up high, Fo make shua nobody hurt him!