Jeremiah 51:25 - Hawaii Pidgin Bible

²⁵ Da One In Charge tell: “I da One stay agains you Babylon guys, You jalike one volcano dat wipe out da whole earth. I goin use my powa agains you, An roll you off da cliffs. I goin make you jalike one mountain dat stay all burn up.

Jeremiah 51:25 Referans Kwoze

Jesus Show 8:8

Da numba two angel guy blow his trumpet. Den someting dat look jalike one big mountain dat stay burn fall down inside da ocean. An thirty percent a da ocean watta come blood.

Zekariah 4:7

Yoa problems jalike dis big strong mountain. But da mountain goin come flat land in front Zerubbabel. Den he goin put da las stone block fo da temple wea suppose to stay, an da peopo goin yell, ‘Az beautiful! Az beautiful!’ ”

Jeremiah 50:31

Dis wat Da One In Charge, da God Ova All Da Armies, tell: “Eh! You get big head. An me, I stay agains you. Da time stay come fo me punish you now.

Jeremiah 51:58

Dis wat Da One In Charge, da God Ova All Da Armies, tell: “Da thick Babylon wall goin come all broke down. Da high town gates goin come all burn up. Plenny nations wen work hard fo build um—fo notting. Wase time, all dose peopos wen work fo make wat da fire goin burn down!”

Jeremiah 51:53

No matta da Babylon peopo like climb up to da sky, An make dea town wall real high Fo nobody climb ova um, Goin get guys dat come from me Dat goin wipe out Babylon town.” Az wat Da One In Charge tell.

Isaiah 13:2

“Eh you army guys dat goin go afta Babylon town! Put one flag up on top one hill wea no mo tree, Fo yoa odda army guys see um. Yell loud to dem. Wave yoa hand fo tell dem wen fo go inside Babylon, Inside da gate wea da Babylon alii guys stay.

Daniel 4:30

He tink, “Dis town, Babylon, stay big now! Az cuz I wen build um lidat fo come my house, da king! I do um cuz I stay real strong an peopo goin know I awesome an importan!”

Jeremiah 51:7

Da One In Charge wen use da Babylon peopo Fo punish da whole world! Jalike he stay give um one gold cup Fo make da whole world come piloot. Jalike all da peopos suck up da wine Dat da Babylon guys give um, Az why all da nations come pupule!

Jeremiah 25:9

I goin call all da peopos from da north fo come togedda. I goin call King Nebukadnezzar fo come too from Babylon. He do my work fo me, an I goin bring him an da odda peopos agains dis land an da peopo dat live hea, an agains all da peopos aroun hea. I goin wipe dem all out, jalike oua peopo wipe out one animal wen dey make one sacrifice. Dass how I goin make erybody come shock an shake dea head, an come real sore inside cuz a dem. No goin get notting dea, all da time afta dey come wipe out.

Start 11:4

Den dey tell: “Eh! You know wat? Us go build one big town fo all us guys. Us make one big towa dea fo go up inside da sky wea God stay! If we do dat, den us goin get one big name, an all us guys goin stay hea togedda. We no need move house all ova da place no moa.”

2 Peter 3:10

But da time wen Da One In Charge come back, no goin get nobody dat know wen he goin come. Az jalike wen da steala guy go inside yoa house an you donno he wen come. Dat time, da sky, da sun, da moon, an da stars up dea inside da sky goin come burning hot an wipe out eryting! An den, no goin get notting no moa. Da world an all da tings dat peopo do hea goin burn up.

Songs 138:7

No matta get trouble ery place I go, An da peopo dat stay agains me Stay huhu, You goin make shua I no mahke. You goin show yoa powa An bus dem guys up! You get da powa Fo get me outa trouble.

Jeremiah 50:25

Me, Da One In Charge, I wen open up my place Wea I keep all my stuffs fo fight, An bring out all da tings I use fo fight Cuz I stay huhu. An I Da One In Charge, da Boss, da God Ova All Da Armies. I get plenny work fo do inside da Babylon land.

Jeremiah 25:12

An Da One In Charge tell: “But wen da seventy year pau, I goin punish da Babylon king an his peopo an wipe out dea land, cuz dey get da blame fo da bad kine stuff dey wen do. An I goin wipe out dea land foeva, an dis goin make peopo come shock foeva.