Jeremiah 49:10 - Hawaii Pidgin Bible

¹⁰ But me, I goin take away eryting from da Esau ohana. I goin show erybody da secret places wea dey stay hide, So dey no can hide dea no moa. Dea kids, dea ohana, da peopo dat live nea dem, All dem goin come wipe out. An da Esau peopo no goin stay no moa.

Jeremiah 49:10 Referans Kwoze

Isaiah 17:14

Bummahs! Sun down time we all sked. But befo da morning time, Dis wat happen: Da guys dat like steal oua stuffs An take eryting, Dey no stay no moa.

Rome 9:13

Jalike God tell inside da Bible, “I wen pick Jacob, but I neva pick Esau, da one born firs.”

Obadiah 1:9

Yoa army guys from Teman town goin lose fight, Cuz erybody inside da Esau mountains goin get kill.

Amos 9:3

No matta dey go all da way on top Mount Carmel An hide ova dea fo nobody see um, I goin find um an drag um back. No matta dey stay hide from me on da bottom a da ocean, I goin tell da big sea monsta wat fo do An he goin go afta um an bite um.

Jeremiah 23:24

If somebody go hide inside one place nobody know, You tink I no can see um, o wat?! But me, I fill up da sky an da earth!” Az wat Da One In Charge tell.

Isaiah 45:3

I goin give you all da rich kine stuffs Dat dose nations keep inside dark secret places. Da rich kine stuffs dat peopo hide Inside one place wea nobody know. Den you goin know dat me Da One In Charge, Da God fo da Israel peopo. I call you by yoa name fo come by me.

Songs 37:28

Cuz Da One In Charge, He like fo peopo do wass right, An he no foget da peopo Dat stay tight wit him. Dose peopo, God goin take kea dem Foeva! But da peopo dat do da bad kine stuff, Even dea kids goin get cut off From God foeva!

Jeremiah 13:26

Jalike I pull up yoa robe ova yoa face. An erybody goin see yoa shame.

Sad Song 4:22

You Jerusalem peopo, God goin pau punish you guys. He no goin make you stay far away long time. But you Edom peopo, he goin punish you guys fo da bad tings you do, He goin show erybody da real bad kine stuff you guys do!

Obadiah 1:6

But wen dey rip off you Edom guys dat come from Esau, Dey goin look thru eryting An take all da rich kine stuffs you guys wen hide!