Jeremiah 47:6 - Hawaii Pidgin Bible

⁶ Da Filisha guys tell, “Ho! Da armies dat stay come, Dey jalike one sword Da One In Charge use. How long da sword goin kill peopo? Da sword no goin go back inside da sword bag. No go kill nobody no moa! You no like res, o wat?!”

Jeremiah 47:6 Referans Kwoze

Jeremiah 12:12

On top all da hill tops inside da boonies wea no mo notting can grow Goin get plenny guys dat like come rip off stuff. Cuz goin get war! Jalike Da One In Charge use his sword fo kill da peopo From one side a da land to da odda side! No goin get nobody stay safe ova dea.

John 18:11

Jesus tell Peter, “Put back yoa sword! My Faddah tell I suppose to suffa all dis kine stuff, an dass wat I goin do! Jalike he give me one cup full wit bitta kine stuff fo drink, an I goin drink da whole ting.”

Ezekiel 21:30

Nebukadnezzar, put yoa sword back inside da sword bag. Cuz I goin judge you, Inside da place wea I wen make you, Inside da land wea yoa ancesta guys wen live.

Ezekiel 14:17

“O maybe I bring war agains dat land an I tell da army guys come wipe out eryting. An I kill all da peopo an da animals.

Jeremiah 25:27

Den Da One In Charge tell me: “Now tell um, ‘Dis wat Da One In Charge, da God Ova All Da Armies, da God fo da Israel peopo, tell: Go drink plenny from da cup. Come piloot an puke an fall down so you no can stan up no moa, cuz I goin sen armies fo wipe out you guys.’

Jeremiah 15:3

Da One In Charge tell: “I goin sen four kine tings fo wipe dem out: guys wit swords fo kill dem, da dogs fo drag da bodies out, da birds inside da sky, an da wild animals inside da fields fo eat um up an wipe um out.

Jeremiah 12:4

“Da land stay coming all dry, An da grass inside ery field stay come wipe out, An da animals an birds go way awready. Cuz da peopo dat live inside dat land do bad kine stuff. How long moa, till you goin make dem stop?! An dose bad peopo stay tell, ‘God no give a rip wat happen to us guys!’ ”

Jeremiah 4:21

How long I gotta look da war flag An hear da soun from da trumpets fo start fo fight?!”

Isaiah 10:15

You tink da ax mo betta den da guy dat swing um? Da saw mo betta den da guy dat use um? You tink da club goin lif da guy dat carry um? Da stick fo walk goin lif somebody dat use um? No way!

Isaiah 10:5

God tell: “Bummahs fo you guys! I goin use da Assyria peopo jalike one club fo punish you, Cuz I stay huhu wit you Israel peopo, An I goin make da Assyria guys wack you!

Songs 17:13

Eh! You Da One In Charge! Go afta dem guys! Face um an throw um down! No let um get away! Use yoa sword, Fo make shua da bad kine guys no goin hurt me!

1 Records 21:27

Den Da One In Charge tell da angel guy put back his sword inside da bag.

2 Samuel 2:26

Abner yell to Joab an tell, “We goin stay kill each odda wit swords foeva, o wat?! Fo shua, you know dat afta dis fighting pau, erybody goin stay hate each odda still yet. How long befo you goin tell yoa army guys fo no go chase dea braddahs da Israel guys no moa?!”

Local Leadas 7:20

Den all da three parts a da Israel army blow dea trumpets, an smash dea jars. Dey get da torch in dea lef hand, an da trumpet dey goin blow in dea right hand. An dey yell, “One sword fo Da One In Charge an fo Gideon!”

Jeremiah 48:10

“I like fo Da One In Charge put kahuna On top anybody dat tell dey work fo Da One In Charge, But dey ony stay do um half-ass kine! An I like fo him put kahuna On top anybody dat tell dey goin fight fo Da One In Charge, But dey no stay use dea sword fo make peopo bleed!

Jeremiah 50:35

Da One In Charge tell: “Goin get war Agains da peopo dat live inside Babylon, An agains dea leada guys An dea guys dat know wat fo do erytime!

Zekariah 13:7

Dis wat Da One In Charge, da God Ova All Da Armies, tell: “Grab my sword! Go stab my sheep guy, Da guy dat work wit me! Wack da sheep guy, an da sheeps goin scatta. I even goin go agains da young sheeps.”