Jeremiah 30:21 - Hawaii Pidgin Bible

²¹ Da numba one guy fo dem goin be one a dea guys. Dea leada guy goin come from dem. I goin let him come nea me, An he goin come. Cuz peopo goin come sked fo come nea me, If I no tell um, can!” Az wat Da One In Charge tell.

Jeremiah 30:21 Referans Kwoze

Census 16:5

Den he tell Korah an all da guys wit him, “Morning time, I like fo Da One In Charge show who stay his guy, an who stay spesho fo him. An he goin tell dat guy he pick fo come nea him.

Ezekiel 37:24

“My worka guy David goin be da king ova dem. Dat mean ony goin get da one sheep guy fo take kea all dem. Dey goin live da way I tell um wass right an wass wrong, an make shua dey do wat I tell um dey gotta do.

Jesus Guys 5:31

God take Jesus by him, an make Jesus sit by da importan place by his right side, cuz he da Main Leada, an he da One dat take us outa da bad kine stuff we do. He da One goin help da Israel peopo come sorry fo all da bad kine stuff dey do. He goin let um go an hemo dea shame.

1 John 2:2

Jesus, he da One dat wen mahke fo come da sacrifice fo us. Dass how he let us guys go an hemo da shame fo all da bad kine stuff we wen do. Jesus wen mahke, not fo us guys ony, but fo da bad kine stuff dat all da peopo inside da whole world do.

Jeremiah 30:9

But dey goin work fo me, dea God, Da One In Charge, An fo David dea king, Wen I make somebody from David line Come king fo dem.

2 Samuel 7:13

He da one goin build one temple fo show wat kine god me, an I goin make his blood line strong an solid, so da king guys dat goin come from him, goin stay king foeva.

Rules Secon Time 33:5

God, da king fo da Israel peopo dat stay do wass right, Wen da leadas fo da peopo all come togedda Wit da Israel ohanas.”

Rules Secon Time 18:18

I goin bring one guy from yoa peopo, dat talk fo me to da Israel peopo, jalike you, Moses. I goin tell dat guy wat fo tell, an he goin tell dem eryting I tell him.

Start 49:10

Judah guys goin carry da spesho stick fo show peopo dey da king, Da Judah ohana goin keep dat stick foeva. Till da real owna show up Dass goin be da one Dat da odda peopos goin do wat he tell um fo do.

Jesus Show 19:16

He get one sign on top his robe an on top his leg, dat tell, “Da King Ova All Da Kings, an Da One In Charge A All Da Bosses.”

Matthew 27:37

Dey make one sign an put um ova his head, fo tell erybody wat he wen do wrong. Dis da sign: Dis Jesus Da King Fo Da Jews

Matthew 3:17

An wow! Had one voice from da sky tell, “Dis my boy. I get love an aloha fo him fo real kine, an I stay good inside cuz a him!”

Matthew 2:2

“Wea da boy dat born, da King fo da Jews? We wen spock one star come up da east side dat show dat he born awready, an we come hea fo go down in front him an show him plenny respeck.”

Jeremiah 50:44

Wen dat odda army come, goin be Jalike wen one lion come up From da bushes nea da Jordan Riva, An go one place wea get plenny grass an plenny sheeps. I goin chase da Babylon peopo outa dea land real quick. Who da guy I wen pick fo give um dat kuleana? Who da same jalike me? Who can tell me wat fo do? Da sheep guy no can handle dis lion, An dis lion, az me!

Jeremiah 49:19

“Me, Da One In Charge, I goin come Jalike one lion dat come outa da thick bushes by da Jordan Riva, An go by da fields wea da sheeps stay grind from long time. I goin chase da Edom peopo outa dea land real fas. Den I goin pick whoeva I like fo lead da Edom nation. You tink get somebody jalike me, o wat?! You tink get somebody can face me, o wat?! You tink get one leada guy dat can face me, o wat?! No ways!”

Start 18:27

Den Abraham tell God, “Eh, I like try talk to you some moa. I know you da One In Charge, an me, I jalike da dirt. I notting!

Hebrews 1:3

God Boy, he show how awesome God stay, Jalike wen da sun stay shine in one mirror. He stay same same jalike his Faddah, Same same jalike one picha Fo show how da Faddah stay fo real kine. Da tings God Boy tell, get choke powa Fo make eryting hang togedda. Afta he pau throw out da bad kine stuff da peopo do Fo dem come clean inside, He go sit down up ova dea in da sky, On da right side nex to God Da Awesome King. Dass da spesho place fo show how importan he stay.

Rome 8:34

Eh! No mo nobody dat can tell God gotta punish his peopo. Cuz Jesus Christ, he da One wen mahke. An mo spesho den dat, he da One dat God make um come back alive afta he mahke. From dat time, he stay in da mos importan place, by God right side. Same time, Jesus da One dat stay tell God fo help us guys!

Luke 24:26

Dey tell dat da Spesho Guy God Goin Sen gotta suffa all dis kine stuff, an afta, he goin come real awesome, aah?”

Jeremiah 33:15

“Dat time, I goin make one guy from da King David blood line come up, One guy dat stay do wass right erytime, Jalike one new branch come out from one tree. He goin make shua get good judge guys Dat stay do wass right inside da land.

Isaiah 63:1

Da watcha guy tell: “Eh! Who dat guy stay come from da Edom land, From dea main town Bozrah? His clotheses, all red on top! Who dis awesome looking guy, He stay wear real nice clotheses? He march strait, an he real strong! “Da guy tell, ‘Me, I da One get da right fo talk, Cuz I do wass right! I get plenny powa fo get peopo outa trouble!’

Songs 89:29

I goin make shua Dat da peopo dat goin come From David blood line, Goin stay in charge. Goin get one a dem wit da right Fo sit on top David throne foeva, Jalike da sky stay foeva.

Nehemiah 7:2

I put my braddah Hanani in charge a Jerusalem town, him an Hananiah dat was da officer ova da army guys inside da strong wall. I know I can trus Hananiah, an he get awesome respeck fo God, mo den plenny odda guys.

Ezra 2:2

Dea leada guys, Zerubbabel, Jeshua, Nehemiah, Seraiah, Reelaiah, Mordecai, Bilshan, Mispar, Bigvai, Rehum, an Baanah. Dis da numbas fo da men guys from Israel dat go back:

Start 18:32

Den Abraham tell, “Boss, dis da las time I goin talk, so, no come huhu, aah? Wat if ony get ten ova dea?” Da One In Charge tell, “Fo da ten good peopo, I no wipe out da oddas.”

Start 18:30

Den Abraham tell Da One In Charge, “Eh! No come huhu wit me, no matta you da Boss. But I ony goin aks you dis: Wat if can find thirty peopo ova dea dat do da right ting?” Da One In Charge tell um, “If I find thirty peopo dea, I no goin do notting.”

Census 16:40

Az wat Da One In Charge tell Moses dat Eleazar gotta do. He do um lidat fo da Israel peopo no foget dat ony da guys dat come from Aaron can burn incense in front Da One In Charge. No odda guys goin do um. If anodda guy do um dat no come from Aaron, da same ting goin happen jalike wat wen happen to Korah an da guys dat stay tight wit him.

Outa Egypt 3:5

Da One In Charge tell, “Stay right dea! No come nea. Take off yoa slippas. Cuz da place you stay standing, dass spesho fo me!”

Rules Secon Time 17:15

If you tink lidat, make shua you guys make king, ony da guy dat yoa God, Da One In Charge, pick. He gotta be one a yoa braddah guys. No go pick one guy from some odda place dat not one Israel guy.

Songs 65:4

Anybody you pick an bring um nea you Fo dem make house Nex to yoa Temple, Dey can stay good inside. Az fo shua! Az good, us come yoa house, Da place dat stay spesho fo you— Us no goin need notting moa.

Hosea 1:11

Den da Judah peopo an da Israel peopo goin come back togedda one mo time. Dey goin pick one leada. An dey goin come up outa da land wea dey stay. Dass goin be one real importan time fo da Jezreel peopo, cuz Jezreel mean ‘God plant’ too. God goin plant dem inside dis country one mo time!”