Jeremiah 30:17 - Hawaii Pidgin Bible

¹⁷ But I goin make you guys come good. An make da places you bleed come good. Peopo call you guys, ‘Da guys dat no mo place fo go, Da ones dat go Mount Zion fo pray, But no mo nobody like take kea dem.’ ” Az wat Da One In Charge tell.

Jeremiah 30:17 Referans Kwoze

Songs 107:20

An wat Da One In Charge tell um, Make um come good Fo dem no mahke An go down inside da grave.

Jeremiah 33:6

“But den, I goin make da peopo inside dis town come good an strong one mo time. I goin make shua dey see how eryting stay good fo dem, an no mo notting bodda dem.

1 Peter 2:24

Christ, he da One dat wen carry all da bad kine stuff us guys wen do on top his body wen he mahke on top da cross. He wen do all dat so us guys no gotta mahke fo da bad kine stuff we wen do. Now, we ony stay live fo do da right kine stuff. Christ wen bleed an mahke fo us guys come good.

Songs 103:3

He da One dat let you go An hemo da shame fo da bad tings you wen do. He da One dat make you come good, Erytime you stay sick.

Outa Egypt 15:26

God tell dem, “You guys gotta lissen good to me, yoa God, Da One In Charge fo real kine. You guys gotta stay do da right ting in front me, an lissen wat I tell you guys fo do, an keep all da Rules. If you guys do all dat, den I no goin wack you guys wit all da kine sick dat I wen bring fo da Egypt peopo. Cuz me Da One In Charge, an I da one dat make you guys come good.”

Songs 23:3

He make me come strong One mo time inside. He take me on da bestes trail, Fo erybody know wat kine god him.

Hosea 6:1

Da Israel peopo tell, “Go come, we go back by Da One In Charge. He wen rip us up, But he goin make us come good. He wen wack us guys, But he goin put one bandage on us.

Malakai 4:2

But fo you guys dat feel real sked Wen you tink bout wat kine god me, Erybody goin see fo real kine wat stay right, Jalike wen da bright sun come up An you can see eryting mo clear. An dass goin make all you guys feel good. Den, you guys goin run aroun an jump, Jalike wen peopo let da bebe cows outa da pen!

Ezekiel 34:16

I goin look fo da lost sheeps, an bring back da sheeps dat get push off da trail. I goin bandage da sheeps dat get hurt, an make da weak ones come strong. But da real momona sheeps an da supa strong ones, I goin wipe dem out. I goin be one pono kine sheep guy an take kea my sheeps da right way.

Jesus Show 22:2

down da middo a da main street inside God big town. On two side a da riva da trees stan dat make peopo come alive fo real kine. Da tree give fruit ery month, twelve time all togedda ery year. Da leaf from da tree make all da diffren peopos all ova da world come good.

Isaiah 30:26

Da moon goin shine strong, Jalike da sun. An da light from da sun goin come Seven time mo bright den befo, Jalike you get all da light from seven days, In one day! Az how goin happen Afta Da One In Charge wack his peopo. Den, Da One In Charge goin fix um Ery place da bone stay broke, An he goin bandage Da cut he wen give dem.

Jeremiah 30:13

No mo nobody fo back you up. No mo notting goin make da bleeding stop. No mo nobody can make you come good.

Jeremiah 8:22

Fo shua, Gilead side get medicine An docta ova dea! Cuz da peopo I love stay hurt. So, how come no mo nobody fo make um feel good?!”

Jeremiah 3:22

Da One In Charge tell: “Go come back, you peopo Dat nobody can trus. I goin make you guys come good one mo time, So bumbye you no bag from me. “Mo betta you tell: ‘Az right, us guys da one! Us guys like come by you now, Cuz you oua God, dass Da One In Charge a us.

Songs 12:5

But Da One In Charge, dis wat he tell: “Get peopo dat like wipe out Da peopo dat no mo notting An need plenny stuff. An get peopo dat need somebody Fo take kea dem, an dey moaning. Cuz a dat, I goin do someting! I goin do wateva I gotta do Fo get dem outa trouble, Cuz fo shua, dass wat dey like me fo do!”

Isaiah 11:12

He goin hold up one flag so all da peopos know wea fo come. He goin bring togedda all da peopo Dat da odda kings wen throw outa da Israel land, An da Judah guys from far place all ova da world.

Jeremiah 33:24

“You no hear wat dese peopo stay tell, o wat?! Dey tell: ‘Da One In Charge wen throw out da two main ohanas, Judah an Israel, dat he wen pick befo time an dea peopo.’ So dese peopo ack jalike my peopo no good, an no even tink dat my peopo one nation no moa.”

Ezekiel 35:12

Den you Edom guys goin know, dass me Da One In Charge wen hear all da bad kine stuff you guys tell agains da Israel peopo an dea mountains. You guys tell, “Odda guys wen wase da Israel mountains, an dey give um to us guys. Now us guys goin eat um up!”

Ezekiel 36:20

All da nations wea I wen scatta dem, dey give me one bad rep, no matta I good an spesho. Cuz da odda nations talk bout dem lidis: ‘Dese Israel guys, dey da peopo a Da One In Charge, you know. But still yet, dey gotta bag from his land! Wassup wit dat?!’

Sad Song 2:15

All da odda peopo dat pass by you Jerusalem guys, Dey clap hands fo make fun a you guys. Dey shake dea head fo show dey no mo respeck fo you. Dey tell, “Ahanas! Dis da big town dey call ‘Da Beautiful Place,’ o wat?! Dis da place dat peopo all ova da world stay good inside Wen dey tink bout um, o wat?!”

Songs 142:4

Try look aroun me fo see No mo nobody kea fo help me! Da place fo go wea nobody can hurt me, Gone awready! Nobody kea if I alive o mahke!

Isaiah 33:24

Dat time, nobody dat live Jerusalem town Goin tell, “I stay sick!” God goin take away da shame Fo da bad kine tings dey wen do From erybody dat live dea, An let um go.

Isaiah 56:8

Dass wat Da One In Charge, da Boss, tell! He goin bring togedda Da Israel peopo dat stay scatta all ova da place, Cuz odda peopo wen throw um outa dea land. He tell, “I still yet goin bring mo odda peopo Fo come togedda wit dem.”

Isaiah 58:8

“Den, wen dass how you ack, Goin be jalike wen da sun come up— Erybody goin see Dat you guys get life from me, Da One In Charge. All da place you get cut an scratch, New skin goin grow dea real quick. Cuz you stay do da right ting erytime You goin know wea fo go. An cuz Da One In Charge stay awesome He no goin let nobody come from behind you fo hurt you.

Isaiah 60:15

“Befo time, peopo wen go way from you guys, An hate you guys, An nobody go pass thru yoa land. But now, I goin make you guys come Da ones dat erybody tell, ‘You da greates!’ An dey goin feel good inside Bout you guys all da time.

Jeremiah 17:14

“Da One In Charge make me come good all ova, Fo me come good fo real kine! Get me outa trouble, Fo me stay outa trouble. Cuz you da One I talk good bout.

Hosea 11:3

But az jalike I da One wen teach Da Efraim peopo fo walk. I wen carry dem in my arms. But dey neva tink Dat was me wen take kea dem.

Job 5:18

Cuz he can hurt you, but he put bandage on you too. He can wack you, but he touch you an make you come good too.

Isaiah 54:6

Befo time, you guys come real sad, Jalike you one wife yoa husban wen dump, An you stay sad inside. Jalike you was young An one guy wen marry you, Den he dump you. But now, jalike yoa husban call you fo come back.” Dass wat Da One In Charge tell.

Isaiah 57:18

I see how dey ack, But still yet, no matta dey stay sick inside, I goin make dem come good! I goin make dem An da ones dat stay bum out So dey no stay sad inside no moa.

Isaiah 57:19

I goin make da peopo talk diffren den befo time. Dey goin tell, ‘Da peopo far an nea, Dey goin come so notting bodda dem!’ ” An Da One In Charge tell, “Jalike my peopo stay sick, An I goin make dem come good.”

Jeremiah 10:20

My tent stay all bus up. All da tent ropes stay broke. My kids stay gone from me awready. No mo dem. No mo nobody stay hea fo help me put up my tent one mo time An stretch out da tent cova.