Jeremiah 30:14 - Hawaii Pidgin Bible

¹⁴ All da nations dass was yoa frenz foget you awready. Dey no give a rip bout you. I wen wack you jalike I one guy dat stay agains you. I wen punish you jalike I one mean guy. Cuz you get da blame fo plenny tings, All da bad kine stuff you wen do.

Jeremiah 30:14 Referans Kwoze

Sad Song 1:2

Jerusalem jalike one wahine dat stay cry real hard nite time. Get tears all ova da cheeks. Jalike befo time get plenny guys dat get love an aloha fo her, But now, no mo nobody fo make her feel mo betta. Jalike all her frenz sell her out. Jalike dey go agains her.

Jeremiah 5:6

Az why da lions from da fores Goin attack dem. Da wild dogs from da up country boonies goin wipe um out. Da leopards goin wait fo dem nea da towns Fo jump whoeva go outside. Dis goin happen cuz dey go agains me ova an ova, An dey go da wrong way plenny times.’ ”

Job 30:21

You change an you like hurt me. You get plenny powa, an you ack jalike you hate me.

Jeremiah 22:20

Eh, you Jerusalem peopo! All da ones dat can help you fight Stay all bus up awready! No matta you guys go up on top da Lebanon mountains an yell, O go make dem hear yoa voice Bashan side, O yell from da Moab mountains, Dey no can help you you know!”

Jeremiah 30:15

How come you guys make plenny noise cuz you all bus up? You hurt, an no goin come good. Cuz you get da blame fo plenny tings, Fo da plenny bad tings you wen do, Az why I do all dis to you.

Jeremiah 22:22

I goin make all yoa leada guys come prisonas Jalike one strong wind blow um away. All da ones dat can help you fight Goin come prisonas an go one far place. Den, you goin get plenny shame an lose face, Cuz a all da bad kine stuff you wen do.

Jeremiah 4:30

“All a you Jerusalem peopo, How come you make jalike one jam up wahine, No matta you goin get wipe out quick?! How come you put on fancy kine red dress? How come you put on gold jewelry? How come you paint yoa eyes fo make um look big? You dress up fo notting! Da guys befo time dat get da hots fo you, Dey tink you no good now. Dey like kill you.

Jeremiah 2:36

How come you guys go dis place an dat place all da time, An no make up yoa mind who you like stay tight wit? Da Egypt peopo goin bum you out, Jalike da Assyria guys wen bum you out befo time too.

Job 19:11

He stay real huhu wit me. He tink bout me jalike I one a da guys dat stay agains him.

Hosea 5:14

Cuz az me, Da One In Charge, Dat punish Israel an Judah. I goin be jalike one lion dat attack da Efraim peopo. Jalike one lion dat go agains da Judah ohana. I goin bus dem up, den go way. I goin drag dem wit me, an no mo nobody goin free um up.

Hosea 2:5

Wen dea muddah fool aroun. She come hapai but she no mo shame. She tell, ‘I goin go afta da guys dat make sex wit me, Da ones dat give me my food an watta, My wool, my linen, my olive oil, an my wine.’

Ezekiel 23:22

“Eh you! Oholibah! Az why dis wat me Da One In Charge, da Boss, tell: You know wat I goin do? I goin make da guys dat stay poke you come huhu wit you. Dey da guys you no like see no mo cuz you had it wit dem. I goin make dem go agains you from all aroun you.

Ezekiel 23:9

Az why I give her to da guys dat make sex wit her, da Assyria guys dat she stay hot up fo.

Sad Song 1:19

“I call out to da peopo I get love an aloha fo, But da way dey ack, no can trus um! My pries guys an my older leadas mahke inside Jerusalem, Wen dey stay look fo food Fo dem stay alive.

Jeremiah 38:22

Da Babylon army guys goin bring outside all da wahines dat still stay alive inside da Judah king palace. Dey goin give um to da leada guys fo da Babylon king. Dose same wahines goin tell you: “ ‘Ahana kokolele! Yoa frenz dat you tink was tight wit you, Dey wen bulai you an make you follow dem! But den, yoa frenz wen bag from you, Jalike yoa feets stay stuck inside da mud awready!’

Jeremiah 6:23

Dey get bow an arrow an short sword fo fight. Dey like hurt peopo, an dey no give nobody chance. Wen dey ride on dea horses, Dey soun jalike da loud noise from da ocean. Dey all line up ready fo fight, An az you guys, da Jerusalem peopo, da ones dey stay coming afta!”

Job 16:9

God stay huhu an bus me up, Jalike one wild animal go afta da animals he kill. Jalike he make mad face cuz he hate me plenny. He give me stink eye cuz he stay agains me.

Songs 107:17

Some a dem wen come stupid An get one attitude, Cuz dey like beef wit God, An cuz dey stay do Any kine bad kine stuff, Plenny trouble come to dem cuz a dat.

Isaiah 57:13

Wen you guys yell fo help, Let da idol kine gods dat you guys wen bring togedda, Get you guys outa trouble! Da wind goin blow all dem away. Ony litto bit wind An dey gone! But whoeva trus me fo hide dem Fo dem no get hurt, Dey goin live inside da Israel land, An dey goin pray to me On top Mount Zion, dat stay spesho fo me.”

Jeremiah 14:17

“Tell um dis: ‘Let me cry plenny fo you guys Day time an nite time. I cry fo my peopo Cuz I love dem Jalike I love my young girl, Cuz dey all bus up an hurt bad!

Jeremiah 32:30

“Fo shua, from da start da Israel peopo an da Judah peopo stay do ony bad kine stuff, da way I see um. Fo shua, da Israel peopo piss me off bout da idol kine gods dey make wit dea hands.

Jeremiah 44:22

You guys all da time wen do da worses pilau kine stuff eva. But Da One In Charge, he had it awready wit you guys. Az how come yoa land come all wipe out. An dass goin get one bad rep dat peopo like use fo put kahuna on top somebody, cuz no mo peopo live ova dea. An dass how stay today.

Jeremiah 50:42

Dey stay carry bow an arrow an short spear fo fight. Dey mean, an dey like hurt peopo, an dey no give chance. Wen dey ride dea horses, Dey soun jalike big noise from da ocean. Dey all line up ready fo fight, An az you guys, da Babylon peopo, dey stay coming afta!”

Obadiah 1:7

All da nations dat wen help you guys Goin trick you guys an push you outa yoa land! Da ones dat get good rep wit you Goin bulai you an win ova you. Yoa frenz you stay tight wit Get plan fo put one trap wea you goin step. But you guys no goin know dat!”

Jeremiah 5:5

Az why I goin go by da leada guys an talk to dem. Fo shua dose guys know how Da One In Charge like fo dem live An wat dea God tell Bout wass right an wass wrong. But all dem guys ack jalike cows An broke off God yoke An broke da rope dat tie dem wit him.

Jeremiah 32:29

Da Babylon guys dat attack dis town goin come inside an make one big fire. Dey goin burn da town fo shua—da houses fo da peopo dat make me come huhu, cuz dey burn incense on top dea flat roofs fo da god Baal, an dey pour out wine fo make sacrifice dea fo da odda gods.

Jeremiah 32:34

Dey put up dea pilau idol kine gods inside da Temple. But dat Temple stay dea fo peopo know wat kine god me. An cuz a dis dey make da place so dat no can go dea fo pray.

Jeremiah 32:35

Dey make sacrifice places fo da god Baal inside da Ben-Hinnom Valley, fo burn up dea boys an girls inside da fire ova dea! Dey do dat fo make sacrifice to da god Molek. I neva tell um fo make lidat, an I neva plan fo dem do dat kine pilau stuff an make da Judah peopo do pilau kine stuff too.

Sad Song 2:1

Da Boss come huhu wit da Jerusalem peopo. He stay cova dem jalike wit one cloud! Da Israel peopo was awesome jalike da sky, But jalike he wen throw um down all da way to da groun. Wen he come huhu wit dem, He no even proteck his Temple.

Daniel 9:5

But us guys wen go buckaloose an do bad kine tings. Us guys do wass wrong. Us guys do da kine stuff we not suppose to do. Us guys go agains you, Da One In Charge, an us make deaf ear fo wat you tell us fo do. We wen bag from da rules you make dat show us wass right an wass wrong cuz you da Judge.

Daniel 9:11

All da Israel peopo wen make deaf ear fo da rules you wen teach, an go da odda way from you, an tell dat dey no goin lissen you. “Az why, jalike you wen drop on top us guys all da bad tings dat Moses yoa worka guy wen write down inside da rules. You wen make one promise dat dese bad tings goin happen if us guys no do da tings we wen make one deal wit you fo do. All dat bad stuff stay happen to us cuz we do bad kine stuff agains you.

Daniel 9:13

Jalike Moses wen write inside da Rules, all dis bad kine stuff wen happen to us guys. But still yet we no come back to you, oua God, Da One In Charge a us. Us guys still yet stay do da bad kine stuff. An we no tink bout how eryting you tell stay true.