Isaiah 34:3 - Hawaii Pidgin Bible

³ Da peopo goin throw da guys dey kill outside da town, Cuz dea mahke bodies goin be haunas. Da mountains goin get blood soak inside da groun.

Isaiah 34:3 Referans Kwoze

Joel 2:20

“Da army guys dat like come agains you guys from da north side, I goin push dem far away from you guys. I goin make dem go inside one dry land wea eryting stay all bus up. Da ones in front goin go inside da Big Salt Lake, An da ones in da back goin go inside da Mediterranean Sea. Dey goin mahke an come haunas.” Fo shua, Da One In Charge do awesome tings!

Ezekiel 39:4

You an all yoa army guys, an da odda peopos wit you, goin fall down mahke on top da Israel mountains. I goin make you guys mahke bodies come food fo all kine scavenja birds an wild animals.

Isaiah 34:7

He goin kill da wild cows An da odda kine animals fo make sacrifice. He goin kill da young bulls too, An da real big bulls fo make sacrifice. Goin get blood all ova dea land. Da dirt ova dea goin stick togedda from da fat.

Jesus Show 14:20

Dey smash da grapes inside da wine puka outside da big town, an blood come outa da puka. Had real plenny blood, aroun two hundred miles long an five feet deep.

Amos 4:10

Da One In Charge tell: “Was me wen sen da sick fo make trouble fo you guys, Same ting jalike befo time I wen make da Egypt peopo come sick. War time, was me wen kill yoa young guys An let da odda peopos catch you guys horses. Real sad! Haunas, da mahke army guys bodies inside yoa camp! Still yet, you guys no like come back an be my guys!” Dass wat Da One In Charge tell.

Ezekiel 39:11

“Dat time I goin give da Gog guys one place fo bury peopo inside da Israel land, inside da Abarim valley on da east side a da Big Salt Lake. Da mahke bodies goin block da road fo da peopo dat like go dea cuz dey bury Gog an all his plenny guys ova dea. Dey goin call da place da Gog Army Valley.

Ezekiel 38:22

I goin be da judge fo punish Gog, an bring da real bad kine sick, an make peopo make each odda bleed an mahke. I goin bring one big rain storm fo come down so dat Gog no can handle. I goin bring hail jalike rocks, an fire, an burning sulphur too. I goin do all dat fo bus up Gog an his army, an all da odda peopos wit him too.

Ezekiel 35:6

Fo shua me Da One In Charge, da Boss, stay alive. An I tell dat fo shua, az why I goin let odda peopo go afta you Edom guys an make you guys bleed an mahke. You guys no hold back fo make odda peopo bleed an mahke cuz you hate um. Az why now I goin let dem chase you guys an make you guys bleed an mahke too.

Ezekiel 14:19

“O maybe I sen da real bad kine sick inside dat land, an I come real huhu agains dem an kill dea guys an animals.

Jeremiah 22:19

Dey goin bury him jalike he one mahke donkey. Dey goin drag um outside da Jerusalem town gate An dump da body ova dea.

Isaiah 10:4

Ony one ting you can do—give up! Cuz wat goin happen to you, mo worse den da prisona guys! O you can fall down on top da groun wit da odda mahke bodies, Cuz wat goin happen to you, mo worse den wat happen to da guys dey kill! An Da One In Charge stay huhu wit da Israel peopo still yet, An he stay ready fo bus um up.

Isaiah 66:24

“An wen peopo go outside Jerusalem, dey goin see all da mahke bodies a da peopo dat wen go agains me. Da worm dat stay eat dem no goin mahke, an da fire dat burn dem no goin pio. Erybody goin feel pilau wen dey see da bodies.”

Jeremiah 25:33

“Dat time, da peopo Da One In Charge goin kill, you goin see dea bodies all ova da place, from one side a da earth to da odda side. No mo nobody goin cry fo dem. No mo nobody goin take away da bodies. No mo nobody goin bury dem. Dea mahke bodies goin stay ova dea jalike rubbish all ova da groun.

Nahum 3:3

Da army guys make dea horses run fas. Dey swing dea swords. Dea spears shine. Plenny peopo mahke. Mahke bodies all ova da place! No mo nobody can count um. Erybody trip an fall down ova um.

Ezekiel 32:4

I goin throw you down on top da dry land, An throw you out on top da open fields. I goin let all da birds in da sky land on top you. An da wild animals from all ova da world Goin grind yoa body.