Hebrews 4:3 - Hawaii Pidgin Bible

³ Ony us guys dat trus God today can go inside God place an res wit him. An God tell befo time bout oua ancesta guys too: “Wat dem guys do, I tell ‘Laytas’ to dat! Dass why I wen make one strong promise, an tell ‘No way dem guys eva going inside Da land I like give dem fo res!’ ” An you know wat? All dis was lidis from long time befo time, wen God make da world!

Hebrews 4:3 Referans Kwoze

Songs 95:11

Cuz a dem, I wen come huhu An make one strong promise— I wen tell, ‘No way dese peopo goin go Da place wea I goin make dem come So notting bodda dem!’ ” An dass wat God tell you guys today.

1 Peter 1:20

Befo God wen make da world, he know Christ was goin do all dat. But God neva show Christ to da peopo inside da world till now, cuz now da las time. An he wen do dat fo you guys.

Hebrews 9:26

But you know, if Christ gotta do um ova an ova, den he gotta suffa ova an ova, from da time God wen make da world. But no was lidat. Now, da end a da world time stay coming, an he wen come ony dat one time, fo be da sacrifice an throw out all da bad kine stuff foeva.

Efesus 1:4

Befo God make da world, he pick us awready fo come his guys an fo stay tight wit Christ. He wen like fo us come good an spesho fo him. So den no goin get nobody fo poin finga us guys. God know eryting bout us guys. He get choke love an aloha fo us.

Start 1:31

God look eryting he wen make, an he tell, “Real, real good, all dat!” An had da nite time an da day time, az day numba six.

Hebrews 3:11

Wat dem guys do, I tell ‘Laytas’ to dat. Az why I wen make one strong promise: ‘No way dem guys eva going inside Da land I wen give um fo res!’ ”

Matthew 13:35

He do um lidat fo make um happen jalike da guy dat talk fo God wen tell befo time, “I goin tell stories fo teach, I goin tell stuff dat nobody know From dat time wen God make da world till now.”

Isaiah 28:12

Jalike he wen tell um befo time, “Dis da place fo res. Da guys dat tired can res ova hea. Dis wea you guys can sleep.” But dey no like lissen.

Outa Egypt 20:11

Me, Da One In Charge, I wen work six days fo make da sky an da earth an da ocean, an all da tings inside dem. But da Numba Seven Day, I res. Dass why I tell da Res Day good, an I make um spesho fo me.

Hebrews 3:14

You know, God make all us guys stay tight wit Christ. But we gotta hang in dea an go all out fo trus God, jalike wen we wen trus him da firs time.

Jeremiah 6:16

Dis wat Da One In Charge tell his peopo: “Stop wen you get to da place wea two roads come togedda an look. Aks bout da ol trails, How peopo wen live befo time. Aks bout how fo find da good way. Den go live dat way! Dass how you guys goin learn how fo live fo no mo notting bodda you. But you guys tell, ‘Us no like live dat way!’

Ezekiel 20:38

I goin throw out yoa peopo dat go agains me an bag from da deal you guys get wit me. No matta I bring dem outa da land wea dey stay prisonas, dey still yet no goin go inside da Israel land. Den you guys goin know dass me Da One In Charge dat do dat.

Matthew 25:34

“Me, da King. Dat time I goin tell da guys on my right side, ‘Go come ova hea! My Faddah like do plenny good kine stuff fo you guys, an give you guys eryting you need. You know, wen he make da world, he awready make all dis stuff ready fo you guys, cuz I goin come yoa King. Az why all dis stuff fo you guys! Take um awready.’