Efesus 1:11 - Hawaii Pidgin Bible

¹¹ An cuz us guys stay tight wit Christ, an God wen pick us from befo time fo come his kids, he stay give us all da tings he wen promise fo give us. He make eryting jalike he wen figga befo time. God, he da One dat can make eryting happen how he like happen.

Efesus 1:11 Referans Kwoze

Rome 8:28

Us guys know dis too: God make eryting come out all good fo da peopo dat get love an aloha fo him. God da one wen pick dem fo do wat he like dem fo do. An God get dis plan from befo time wen he tell um, “Go come! Be my guys!”

1 Peter 1:4

Wen one faddah mahke, he leave stuffs he wen promise fo give his kids. Same ting Jesus, he make good tings ready fo us in da sky. Da stuff he goin give us no goin come wipe out, o come pilau, o come all pau.

Efesus 1:14

Wen us guys stay tight wit God Spirit, dass da firs proof fo show us all da good kine stuff God goin give his kids. Bumbye God goin cut his kids loose from all da powa dat da bad kine stuff get ova dem. Den erybody goin tell how awesome God stay.

Efesus 3:11

God, he make dat plan from befo time fo do all dat stuff. An Jesus Christ, Da One In Charge a us guys, he da One dat wen do um.

Efesus 1:5

From befo time, God make plan fo eryting. He make one plan fo hanai us into his ohana, an fo Jesus Christ make all dat happen. Dass wat God like an dass wat make him stay good inside.

Galatia 3:18

If God kids gotta do wat da Rules From God tell um fo do, fo get wat God wen promise fo give dem, dass not one gif! Cuz nobody work fo one gif. But God wen give Abraham wat he wen promise fo give um. Dass one gif fo real kine!

Hebrews 6:17

Cuz garans God like show his kids dat da plan he make fo dem no goin change eva, he wen make dat strong promise dat fo shua he goin do um.

Titus 3:7

God do all dat good stuff fo us guys fo us get um right wit him. Now us wen come his kids, an he oua Faddah. Now us wait an stay shua God goin give us da real kine life dat goin stay to da max foeva!

Rome 8:17

Cuz us guys God kids, dat mean, we goin get all oua share a da good kine stuff God give his kids cuz he oua Faddah. Da Faddah give eryting he get to his Boy Christ. Dass wat da Faddah goin do fo us guys too. But you know wat? Dat mean us guys gotta suffa too jalike Christ wen suffa, so den bumbye, God make us come awesome jalike he wen make Christ come awesome.

Colosse 1:12

Den you guys can tell da Faddah “Mahalo plenny!” an feel real good inside. He wen make us his kids fo us get da good stuff he wen promise fo give all his kids: his kids, dass da peopo dat stay spesho fo God. He wen free us up from da powa da Bad Guy get ova us fo make us do bad kine stuff. Dass why now us no do bad kine stuff. An God wen take us outa da dark an put us inside da place wea Jesus stay oua King. Jesus, he God Boy an his Faddah get love an aloha fo him.

Colosse 3:24

Cuz you guys know dat bumbye you guys goin get da good tings Da One In Charge wen promise fo give his kids. Eh, you guys, you know who you stay working fo? You stay working fo Christ, Da One In Charge!

Jesus Guys 26:18

fo open dea eyes an fo turn um away from da dark kine stuff to da light; fo turn um away from da powa Satan get an turn um to God. Den I goin let um go, an hemo dea shame fo all da bad kine stuff dey do. Den dey can come togedda wit all da peopo dat trus me an come good an spesho fo me.’

Jesus Guys 20:32

“Now, I give you guys ova to God, an I tell you fo lissen wat God tell bout how he like do good tings fo peopo. All dat goin make you guys come strong inside an give you guys all da good stuff God wen promise fo give all his kids, da ones dat stay spesho fo him.

Jesus Guys 2:23

God plan dis long time befo time, cuz he know dey goin give Jesus ova to you guys. An you guys wen take him an let da bad kine guys kill um on top one cross.

Jesus Guys 20:27

Cuz I no sked fo tell you guys all da stuff God like fo you guys do.

Jesus Guys 4:28

Dey do wat you know from long time befo gotta happen. An you let dem do dat.

Jeremiah 32:19

You tell plenny peopo wass good fo dem do, an you stay strong fo do plenny kine stuff. You see an know how all da peopo stay live. You pay erybody fo da way dey live, good o bad, an fo wateva happen from da tings dey do.

Songs 37:18

Da peopo dat ack So dat nobody poin finga dem, Da One In Charge, He tink plenny bout dem. Da land he goin give dem Cuz dey his kids goin stay foeva.

1 Peter 3:9

If somebody do bad kine tings to you, no do bad kine tings back. If somebody talk any kine to you, no talk back any kine. But aks God fo do good kine stuff fo da guy. Dass why God wen tell you guys fo come be his guys fo him do good kine stuff fo you guys.

Rome 11:34

“No mo nobody know wat Da One In Charge figga! No mo nobody can tell um wat fo do!

Zekariah 6:13

He goin build da temple fo me, an he goin get respeck jalike he one king, an sit on top his throne, an lead jalike one king. He goin be one pries guy too, ova dea on top his throne. He goin do da two jobs togedda, an do um good.’

Jeremiah 23:18

“But no mo nobody from dem wen stan wit da guys dat stay close to Da One In Charge, Fo know da secret plan bout wat Da One In Charge goin do, An learn an lissen wat he tell?! Not even one a dem guys!

Isaiah 28:29

So all dis stuff dat da farma guys know, Dass one mo ting dat come from Da One In Charge, Da God Ova All Da Armies. Wen he teach peopo how fo do someting new, Dea jaw drop! Fo shua he know how fo do Importan kine stuff erytime!

Isaiah 5:19

Dat kine peopo tell, “We like God fo hurry up! We like him make fas fo do his work, Fo us guys see da ting Dat da Good An Spesho God fo da Israel peopo Make plan fo do. We like see dat happen quick, Den us guys goin know bout um.

Rules Secon Time 4:20

But fo you guys, Da One In Charge wen take you guys outa Egypt, wea you guys work plenny, jalike you guys stay inside one real hot fire dat can melt iron. He get you guys outa dea fo come his peopo, his kids, an az wat you guys stay now.

Smart Guys 8:14

“Me, I da one dat can teach peopo how fo make plan An fo tink real good bout eryting dey goin do. Me, I da Wahine Dat Undastan Stuff, An I get plenny powa.

James 2:5

Eh, my good frenz! Lissen! Get peopo inside dis world, an odda peopo tink dey notting, jus cuz dey pooa peopo. But dass da ones dat God pick fo come his peopo, aah? So dey trus him plenny, jalike dey rich inside. Cuz God da King, an dey jalike his kids. He goin give dem all da good kine stuff dat he promise awready to all da peopo dat get love an aloha fo him.

Efesus 1:8

God erytime go all out fo us guys. He know how eryting stay, an he know da right tings fo do.

Job 12:13

“Da One In Charge, he da One know wat fo do erytime. He get plenny powa. He da One tell peopo wass da bestes ting fo dem do. He undastan plenny stuff.

Job 33:29

“Fo real, God do all dis fo one guy. He even do um two-three time.

Isaiah 25:1

Da One In Charge, you my God! I goin tell dat you da greates, I goin tell peopo I know wat good kine god you! Cuz you wen do awesome kine tings Wen you make one plan from long time befo, An us guys can trus you fo dat, An we know you tell da trut.

Jesus Guys 13:48

Wen da peopo dass not Jew guys hear dat, dey come good inside, an tell good stuff bout wat Da One In Charge tell. An da peopo dat God pick fo get da real kine life dat goin stay to da max foeva, dey trus him.

Rome 8:29

Befo time, he pick dose peopo awready, cuz he like make um come jalike one copy a his Boy. God Boy, dass Christ. He da main one, an da odda guys, dey jalike his younga braddahs an sistahs.

Rome 8:30

Da peopo God wen pick befo time, he tell um fo come be his guys. An dose same guys, God make um get um right wit him, an he make um come awesome jalike him.

Rome 9:11

But you know, befo Rebecca born her twin boys, an no matta her twin boys neva do notting good o bad yet, God tell Rebecca, “Da boy dat goin born firs, he da one dat goin work fo da boy dat born afta.” He tell her dis fo show dat wen God pick somebody, he pick um cuz he know wat he goin do wit dat guy. God wen tell um fo be his guy. He no need wait fo find out how dat guy goin ack cuz God know awready how he goin ack.

Efesus 1:9

God had one plan fo wat he goin do, an stay secret till now. But now, he show us guys da plan fo all da tings he like do, an he pick Christ fo make da plan happen.

Efesus 1:18

God, I like you help oua Efesus braddahs an sistahs fo undastan mo betta da good kine stuff you wen promise fo do fo dem bumbye. Az jalike you goin open one light inside dem fo dem fo see. Den dey goin start fo wait fo da tings you wen promise cuz you wen tell dem fo come be yoa guys. Help dem fo know dat all da awesome stuff you wen promise fo give us goin be plenny. Az jalike da same ting you goin give all yoa kids cuz dey stay all out fo you.

Titus 2:14

He wen give his life fo mahke fo us guys, fo him cut us loose from all kine pilau stuff, an from go broke God rules, an make us clean inside. He like make us his spesho peopo, dat go all out fo do wateva stay good.