Census 10:35 - Hawaii Pidgin Bible

³⁵ Weneva da pries guys pick up da Box fo carry um, Moses tell, “Go fo broke, Da One In Charge! I like fo da peopo dat stay agains you, run away all ova da place. I like fo da ones dat hate you, run away from in front you!”

Census 10:35 Referans Kwoze

Isaiah 51:9

Isaiah tell, “Wake up! Wake up, Da One In Charge! Make ready fo use yoa powa! Wake up, jalike you wen do long time befo time, Da time oua ancesta guys wen live. Dat time, you wen kill da Egypt army guys Wen dey come afta oua ancesta guys, Jalike you wen stab Rahab da dragon, An chop um up!

Songs 132:8

Eh, Da One In Charge, All us guys like fo you go up An come inside da place dat stay dea, Fo you stay dea foeva, An we like da Box Fo No Foget Da Deal Come dea wit you, Da Box dat show how strong you!

Rules Secon Time 32:41

Wen I make my sword sharp an shiny, I goin use um cuz I da judge, I goin punish da peopo dat stay agains me An pay back da peopo dat hate me.

Rules Secon Time 7:10

But fo da peopo dat hate him, he goin wipe dem out fo pay um back. He no goin be slow fo pay um back.

1 Samuel 4:3

Wen da Israel guys go back dea camp, da older leadas aks, “How come Da One In Charge let da Filisha army win ova us today? Eh! We go take Da Box Fo No Foget Da Deal Wit Da One In Charge from Shiloh fo help us guys. We bring um wit us, fo Da Box help us win agains da Filisha army, da guys dat hate us!”

Songs 9:19

Eh! You Da One In Charge! Do wat you gotta do! Da peopo dat you judge, no let um win! Bring da diffren peopos dat donno you in front you, An judge um.

Songs 94:16

You tink get somebody stan up Fo help me Wen da bad guys Come afta me, o wat?! You tink somebody hang in dea wit me Agains da peopo Dat stay do bad tings, o wat?! No way!

Songs 3:8

Eh! You Da One In Charge! You da One Dat get me outa trouble. I like you do good tings Fo all yoa peopo! (Time out fo da music.)