Filipae 3:1 - Hano Niu Testamen

¹ Ira tuaku, giv masiri gin samsamwara lol Ratahigi. Mwa hav vora te taro ririhai lalaiau be nav rav mulei ginau gaituvwa lalai kimiu, i vi bului kimiu be giv lol vatuvwai maragai.

Filipae 3:1 Referans Kwoze

Filipae 4:4

Giv masiri gin samsamwara lol Ratahigi tagaro. Nai vev muleinia be giv masiri gin samwarana.

Ravrava non Pol lalai ata Rom 5:11

I vorate kea n̄ano, ta kadogaha gida mulei tam ron̄ mwandavuha maragai mai God sivi nonda Ratahigi Jisas Kraes. Sivinia tam bora ira tuan God mulei.

Jemes 1:2

Ira tuaku lol taro be gim dogo ririhai giv masiri gin samwarana,

1 Pita 4:13

Take giv ron̄ mwandavuha be kimiu gim bului mai ron̄ ḡagarasi non Kraes bwatuna be kimiu giv ron̄ mwandavuha i giv masiri gin samwarana lol taro be Kraes vi mai mulei lol sarisari.

1 Tesalonaeka 5:16

Giv samsamwara tagaro.

Filipae 4:8

Ira tuaku giv binihi huri ginau be ran tavuha i ran dadariha huri avkariana. Binihi huri ginau be ran mwasigi i binihi marahi i ran vavtutu, i ran melmelo i ran gabwola i mwa ḡogonaiana.

1 Pita 3:8

Nogonana, kimiu duluai gis togo lol dameana, giv ilo kimiu gaitutuvwai, giv tabetabe kimiu kun abe ata lol imwa gaituvwa, giv maḡemu i giv tavuha.

2 Korin 13:11

Kadogaha, ira tuaku nam bevea be tai vilin̄lin̄i. Giv lol ron̄oe be giv mai gi atat duluai. Giv lol havanau be nan hudali kimiu be giv togo lol tamwata. Vuvuri God be kea lolotabetabe i tamwata vi togo mai kimiu.

2 Pita 3:1

Ira tuaku, geki gairuan avoana be nan ravae lalai kimiu be vi bului mwasigi binihimiu be giv vinihi dumwia.

Ifisas 6:10

Mulei, giv tu wasigi lol ihan God i lol non muramura lavoa.

Leo Tavuha gabe Luk nu Ravae 1:47

loloku mwa samsamwara huri God Varahuku,

Filipae 3:3

Kamai haḡea mwasin ira tav dovon̄ana bilan God. Gam ḡogonai God sivi non vui, i nomai sasagerega kea lol Kraes Jisas. Gam hav tau te butuana alumai sibomai sa havanau tehe be gav lol dumwia lalai rebehimai.

Matiu 5:12

Giv samsamwara i giv garigari kimiu, huri be giv lai volimiu gaivua lol ute atamare. Kera ran lol ḡagarasi atatun vevsera atamua kunia.

1 Tesalonaeka 4:1

Ira tuaku, gan vagahi kimiu be hanigi giv togo la hala be God vi samsamwara ginia, i kimiu gim dogo alun hala gea. Kadogaha gam hudaligi i gam avdura kimiu lol Ratahigi Jisas be giv togo la hala gea vi liu.