2TIMOTE 4:8 - Lai (Hakha) Common Language Bible 2006

⁸ Atu cu teinak laksawng nih khan a ka hngah ko cang, cu laksawng cu ka Bawipa, dinnak Bawi nih, cu Ni i a ka pek laimi dinnak suiluchin cu a si — keimah lawng cu a ka pekmi ka si lai lo, amah a langh lainak dawtnak in a hngaktu vialte zong kha a pek ve hna lai.

Laibaibal Thiang (BSI)

⁸ Ahnubik ah dinnâk luchin cu ka caah chiah a si, cucu biaceihtu fel, Bawipa nih cu Ni ah aka pêk lai, kasin lawngah a si lai lo, Â langhnâk â ngaihmi vialte sin zongah a pêk lai.

2TIMOTE 4:8 Referans Kwoze

JEIM 1:12

Hneksaknak a in tikah fek tein a ummi cu a lung aa lawm, zeicahtiah cu bantuk hneksaknak kha a tei khawh caah Pathian nih amah a dawtu hna a kamhmi nunnak kha laksawng ah a hmuh lai.

BIAPHUAN 2:10

Sifahnak na in dingmi kha zeihmanh ṭih hna hlah. Hi bia hi ngai hmanh. Khuachia nih khan nangmah hneksaknak caah nanmah lak i a cheu cu thong ah a thlak hna lai; harnak na inmi cu ni hra chung a si lai. Thih tiangin ka cungah zumhawktlak tein um ko; cun nunnak suiluchin kha kan pek lai.

1 PETER 5:4

Cucaah Tuukhal Bawi Bik kha a rat tikah a ziam kho lomi sunparnak bawi luchin cu nan hmuh lai.

1 PETER 1:4

Pathian nih a mi hna caah a chiahmi thluachuah vanluhnak tampi cu co awkah kan i ruahchan. Cu thluachuahnak cu a thu a man kho lomi le a ziam kho lomi an si i Pathian nih vancung ah khin an chiahpiak hna.

2TIMOTE 1:12

hi bantukin sifahnak ka inmi vialte hna hi, hi ruangah hin a si. Asinain ka lung a dong naisai lo, zeicahtiah kaa bochanmi cu ahodah a si kha ka hngalh i ka kut chungah a ka pekmi thil kha khi Ni tiang him tein a ken khawh ti kha fiang tein ka zumh.

1 KORIN 9:25

Zuamnak ah tel a duh vemi nih cun timhtuahnak ah khan fel tein an um tawn. Cuti i an um cu a uai khomi pangpar lukhimh hmuh awk caah khan a si; asinain kannih tu cu zeitikhmanh i a uai lomi pangpar lukhimh hmuh awk caah khan a si.

KOLOSE 1:5

Biahmaan taktak, Thawngṭha Bia kha, nan sin a phak terte ah khan, ruahchannak zeidah an pek hna ti cu nanmah nih nan hngalh. Cuticun nan zumhnak le dawtnak nan ngeihmi cu vancung i nan ca i chiahmi ruahchannak cungah an hram cu a dir.

SALM 31:19

Nangmah an ṭihtu hna caah na chiahmi thil ṭha cu zeitluk in dah khuaruahhar an si. Mi kip hmuh ah na tuahmi thil ṭha cu zeitluk in dah khuaruahhar a si, nangmah an bochanmi cu na huhphenh hna.

BIAPHUAN 1:7

Zohhmanh u, khuadawm sin khin a ra lio! Mi kip nih an hmuh lai, a rak chuntu hna zong nih khan an hmuh lai. Cun vawlei cung mi vialte cu a cung i an rak tuahmi kha i ngaichih in an ṭap lai. Cu ti hrimhrim cun a si lai! Amen.

TITAS 2:13

A liannganmi kan Pathian le kan Khamhtu Khrih Jesuh sunparnak kha a langh tikah kan i ruahchanmi cu a tling lai, cu a tlin lai Ni cu ngangngan ngaiin kan hngak ko.

BIAPHUAN 19:11

Cun van kha aa hung i rang rang pakhat ka hmuh. A cung i aa citmi cu a min ah Zumhawktlak le Ahmaanmi ti a si; bia a ceih tik le ral a doh tikah dinnak in a ceih i a doh.

2TIMOTE 2:5

Tlik zuamnak ah a tlimipa nih tlik zuamnak phung kha a zulh lo ahcun laksawng kha a hmu kho lo.

2TIMOTE 4:1

Pathian hmai le, mi vialte a nungmi he a thimi he, bia a ceihtu ding Khrih Jesuh hmaiah, fak piin kan nawl; cun a rat lainak le a pennak in kan nawl fawn;

1TIMOTE 6:19

Cu bantukin an tuahmi cu hmailei an hram fehnak ding ca i ro an i khon a si. Cun nunnak taktak a simi nunnak cu an hmuh khawh lai.

1 KORIN 2:9

Sihmanhsehlaw Cathiang nih, “Ahohmanh nih an hmuh bal lomi le an theih bal lomi, A si kho lai, tiah ahohmanh nih a ruah in an ruah bal lomi, Kha thengte kha Pathian nih amah a dawtu hna ca i a timhmi cu a si,” a ti bang khan a si taktak.

MALAKHI 3:17

Ralkapbu Bawipa nih aa thawh i, “Annih cu keimah ta an si lai, ka thimmi ni a phak tik i keimah ca i ka zuah dingmi ka ta an si lai, cun mipa nih a rian a ṭuantu a fapa kha a zuah bantukin annih cu ka zuah hna lai.

BIAPHUAN 22:20

Hi thil vialte hi ahmaan dih tiah tehte a khaangtu nih, “Tuan ah ka ra hrimhrim lai,” a ti. Cu bantuk cun si ko seh. Bawipa Jesuh, ra ko cang!

BIAPHUAN 4:10

Cu bantukin an thangṭhat tikah upa kul le pali kha bawiṭhutdan cung i a ummi hmaiah cun an kun i zungzal in zungzal tiang a nungmi cu an biak. An suiluchin kha bawiṭhutdan hmaiah cun an chiah hna i,

BIAPHUAN 4:4

Bawiṭhutdan cu a velchum in bawiṭhutdan dang kul le pali nih an kulh i cu bawiṭhutdan hna cungah cun, puan rang aa aih i sui luchin aa chinhmi upa kul le pali an ṭhu.

HEBRU 9:28

Cu bantuk ṭhiamṭhiam in mi tampi sualnak lakpiak awkah Khrih cu voi khat raithawinak ah pek a si. Cun a hung lang ṭhan lai i cu a hung langh ṭhan cu sualnak kongah si ti loin amah a hngakmi hna khamh awkah a si lai.

2TIMOTE 1:18

Khi Ni ah Bawipa sin in zaangfahnak a hmuh nakhnga a caah thla ka cam. Cun ka caah zeitluk in dah Efesa khua ah rian a ṭuan ti kha na hngalh.

1THESALON 1:10

Pathian taktak a simi Pathian nung biak awk le vancung in a ra laimi a Fapa hngah awkah siasal biaknak in Pathian leiah nan i mer kha an chim i cu a fapa Jesuh cu thihnak in a thawhtermi le a ra liomi Pathian thinhunnak in a kan chanhtu kha a si.

ROM 8:23

Cu ti a hrum a aimi cu sermi thil lawng an si lo, Thlarau cu Pathian laksawng hmasater caah a hmumi kanmah zong hi, Pathian nih a fa ah ser i kan pum hi a ning piin luatter ding kan hngah lioah hin kan hrum kan ai ve ko.

ROM 2:5

Asinain na lung cu a hak i a ṭhawng. Cucaah Pathian nih a thinhunnak le ding tein bia a ceihnak a phuan ni i na in laimi dantatnak cu na nganter chin men ko.

MATTHAI 24:36

“Asinain, cu ni le cu caan cu zeitik ah dah a si lai, ti kha ahohmanh nih an hngal lo; vancung mi zong nih an hngal lo, Fapa zong nih a hngal hlei lo, Pa lawnglawng nih a hngalh.

MATTHAI 7:22

Cu Ni cu a phak tikah, mi tampi nih keimah cu, ‘Bawipa, Bawipa! Na min in Pathian bia kha kan chim i na min in khuachia kha tampi kan ṭhawl hna i khuaruahharnak tampi kan tuah hna,’ an ti lai.

PHUNGTHLÛKBIA 4:9

Aa dawhmi pangpar rual na lu cungah a chiah lai i nangmah cu sunparnak luchin an pek lai,” tiah a ti.

SALM 7:11

Pathian cu a dingmi biaceihtu a si, miṭhalo kha sual a phawt zungzal hna.

1THESALON 5:4

Sihmanhsehlaw u le nau hna, nannih cu mui padap chung i khua a sami nan si lo i mifir bantukin cu Ni nih cun a hlauh in an hlauh hna awk a si lo.

2 KORIN 5:2

Atu cu hi kan pum hin kan hrum lengmang i vancung i a ummi kan inn cu kan cungah hin run kan khuh hna seh ti cu kan duh hringhran;

LUKA 10:12

Mah hihi kan chimh hna, Biaceih Ni ah cun hi khua nak hin Pathian nih Sodom khua kha a zaangfah deuh lai,” tiah a ti.

GENESIS 18:25

A sual lomi cu a sualmi hna sinah khan na that bal hna lai lo. Cucu a si kho lo. Nangmah nih cucu na tuah bal ding a si lo. Cu ti a si ahcun, a sual lomi cu a sualmi bantukin pei dantat an si ve kun hnga cu. Cucu a si kho lo. Vawlei cung dihlak bia a ceihtu Dingthlu Lairel nih cun ding tein pei a ceih lai cu,” a ti.

1 KORIN 3:13

Cun an sakmi cio cu zeidah an lawh taktak ti kha Khrih Ni nih a langhter te hna lai. Zeicahtiah cu Ni mei nih cun an rianṭuanmi kha a hneksak cio hna lai i zeidah an lawh taktak ti cu mei nih cun a langhter lai.

FILIPI 3:11

cun kaa ruahchanmi cu thihnak in nunnak ah thawhter ka si lai.

2 THESALON 2:8

Khi tikah Miṭhalo Pa kha a hung chuak lai i Bawipa Jesuh nih a kaa in a chuakmi thaw in a thah lai i Bawipa Jesuh a rat tikah a ceumi a sunparnak in amah cu a hrawh lai.

2TIMOTE 1:10

sihmanhsehlaw atu ceo ah hin kan Khamhtu Khrih Jesuh a ratnak thawngin cucu kan sinah phuan a si. Thihnak ṭhawnnak kha a donghter cang i thih thiam ti lo nunnak cu Thawngṭha in kan sinah a phuan cang.

HEBRU 12:11

Dantatnak kan in tikah kan in lioah cun kan lung a kan lawmhtertu si loin kan ngaih a kan chiattertu a si. Sihmanhsehlaw cu bantuk dantatnak innak nih a chimhhrinmi hna cu daihnak laksawng dinnak nunnak kha an hmu.