San Mateo 27:52 - Guahibo

^52-53 Ayaibitsaëto Dioso pepua pejumecovënëtsivi petëpaevimi pemëthëanë ata napananubena. Nexata Jesús acueyabi matacabita icatsia itsa asaë petëpaecujinae, pamonae pemëthëanë napananubena, bajarapamonae ata cotocaevi asaë. Nexata pitsapa mëthëvetsina. Nexata bajarapamonae pona Jerusalén tomarabelia. Bajarajotalia naitajëbapona jivi ayaibitsaëtojavabelia.

San Mateo 27:52 Referans Kwoze

1 Tesalonicenses 4:14

Vaxaitsi baja cajena jumecovënëtatsi Jesús vajanacasivatëpaejava. Jesús vajanacasivatëpaecujinae, Dioso icatsia asaëyaexanatsi petëpaejavavecua. Dioso icatsia itsamatacabi asaëyaexanaena daxita pamonae Dioso pepua pejumecovënëtsivi petëpaevimi. Bajarapalivaisi vaxaitsi baja jumecovënëtatsi.

1 Corintios 15:20

Itsiata baitsi jane mapalivaisije xaniajai cajena. Tsipaji baja Cristo petëpaecujinae, capanepaeya baja icatsia Dioso asaëyaexanatsi. Nexata pacuenia Cristo petëpaecujinae mëthëvecua pitsapa, bajara pijinia pacuenia itsamatacabi mëthëvecua pitsapaena daxita pamonaemi tëpa Dioso pepua pejumecovënëtsivi. Nexata baja Cristo petëpaecujinae, mëthëvecua itsa pitsapa, daxita petëpaevivecua Cristo baja namataxainaeya pitsapa mëthëvecua.

1 Tesalonicenses 5:10

Jesucristo baja cajena nacasivatëpa vajanacayajavaponaponaenexa vajaasaëtsavanapaevi mapanacuataje. Vajatëpaecujinae ata, Dioso pijanacuatatsia Cristo nacayajavaponaponaena.

1 Corintios 15:51

Nexata panamuxunaevere mapalivaisije, Dioso bajayata muetsia pexainabuatsilivaisimi, palivaisi aeconoxae Dioso nacayapëtaeyaexanapona. Daxitatsi raja vaxaitsi Cristo icatsia pepatsimatacabinexatsica pevajënaeya, apo tëpaetsi tsane. Itsiata baitsi jane apo tëpae atatsi tsane, pamatacabi Cristo patsianica, daxitatsi nacaperabëitothianaena Dioso.

1 Corintios 11:30

Bajaraxuata paxamë ayaibitsaëto payajuvënëavitanemë. Nexata itsamonae payajuvënëcueraname. Itsamonae payajuvënëtëpame baja.

Hechos 7:60

Bajaraxuacujinae Esteban pematabacabëta nuca. Aëjai pinijijumeta. —Tajatuxanenë, itaxutobejiobiataema mapamonaeje. Vecuaajibiaexanare paneconi natsiexana xamëjavabelia tanebejiobiaexanaexae mapacueniaje, jai Esteban. Bajaraxuacujinae Esteban tëpanajereca baja.

San Juan 11:11

Bajaraxuacujinae Jesús peponaevajënae jumaitsi pijajivijavabelia: —Vajayapëtaenë rabaja Lázaro majitanuca. Nexata baja ponajë. Itavabijitsianë Lázaro, jai Jesús.