Tangitangi 1:1 - Ghari

¹ !Eo kiki, e totu mangu lê nomoa na verabau ni Jerusalem, i tana ara mauri danga sosongo na tinoni i sau! Maia nogo na verabau ara padaloki sosongolia tana barangengo popono, mi kalina ia e vaga saikesa moa ti na daki tinamate. Aia e paladato bâ i laoqira na vera sui, mi kalina ia ara aditsekagira sui na tinonina.

Tangitangi 1:1 Referans Kwoze

Isaia 3:26

Ma na verabau nogo ia sauba ke lia vaga moa na daki ara tsoraligi vania na polona me malaiole, me totu raparapa lê tana kao. Migira na matsapakapuna na vera kara morosi vaganana ia, ma kara tangitangi ma kara ngangai.

Esra 4:20

I sau nogo ara visana na taovia tsapakae susuliga ara tagaovi kaputia na butona momoru popono tana Kô Euprates Tabana i Tasi, mara adia danga na vatana na qolo na takesi koniqira na tinoni.

1 Taovia Tsapakae 4:21

A Solomon e tagaovi kaputigira popono na puku tavosi sui tû tana Kô Euprates me tsau bâ i Pilistia mi tana vovosana na Ejipt. Migira sui na tinoni tana vera gira ara saua niqira takisi vania, mara totu i vavana nina tagao a Solomon tana maurina popono.

Isaia 54:4

“Jerusalem, ko laka na matagu, sauba e utu kara paluvangamamu tugua. Igoe sauba ko padalea na vangamâ e gadovigo kalina o vavaolu moa, ma nimu rota na totu segeni vaga na daki tinamate.

Sepania 2:15

Aia saikesa nogo ke vaga na omea sauba ke laba vania na verabau ni Ninive, aia e gini kaekae sosongo na susuligana segeni, me padâ laka aia e loki liusigira bâ na vera sui tavosi tana barangengo. !Bâ, maia sauba ke totu mangu lê saikesa, migira segeni moa na omea tuavati atsi sauba kara dona na ba totu i tana! Migira sui ara liu putsi i tana sauba kara gini beke loki na reiana, ma kara sugavisu tana matagu.

Tangitangi 5:16

Me tagara lelê goto sa omea ke kauvisu i laoqira pipi sui na omea ami gini kaekae, me gini puka lê gamami tangirongo. E sarevo sosongo nomoa vanigami rongona ami sasi.

Isaia 22:2

Na gugu loki, ma na galaleleo, ma na magemage e dangali poponoa na verabau. Igira nimui mane ara mate tana vailabu iani ara tau gini mate na vailabu.

2 Taovia Tsapakae 23:35

Ma Jehoiakim na taovia tsapakae e aditakesi i koniqira nina tinoni, taonia na dangana nina tamani pipi tinoni, gana ke gini tsodo qolona na takesi vaga na taovia tsapakae ni Ejipt e kilia kara sauvania.

Na Katemai 18:7

Aia e mauri tana tsonikae segenina mi tana magemage, baa, mi kalina eni igamu kamu nautuguna vania tana rota loki ma na vatsangisavi. Aia e goko kaekae me tsari segenina sailagi vaga iani: ‘!Inau na daki taovia, mau totukae tana sasaqu na totu! !Minau tau na daki tinamate, mau tau goto dona kau vatsangisavi kesa dani!’

Esekiel 26:16

Migira sui na taovia tsapakae tana puku ara totu i tasi taligu sauba kara gini matagu loki sosongo bâ na reiana na omea e laba vanigo, me sauba kara tû ma kara tsunaligi tania niqira sasana na totukae, ma kara tsoraligigira na poloqira sagesage katsi ara tula mamaregasia, ma kara totu tsuna tana kao lê ma kara gagariri.

Tangitangi 4:1

Reia bâ nida qolumila angaanga ara pura nogo kiki kalina ia, ma na vatuna na Vale Tabu ara viri totu piriutsa bamai tana sautu loki.

Tangitangi 2:10

Migira na tuqatuqa ni Jerusalem ara totu muimui moa i lao, mara ulia na papasa tana lovaqira mara sagelia na polo baubau papadana na melu. Migira na baka daki ara tsuporu tsuna moa tana kao.

Tangitangi 2:1

Tana nina momosatoba loki na Taovia aia e molomaia na rodo ke tsavu poponoa na Sion. Na Jerusalem, aia na verabau rereidou sosongo i sau, mi kalina ia na Taovia e vuipukali saikesalia. Mi tana dani nina kore loki, me atsa moa nina Vale Tabu me vano tanigotoa aia.

Jeremia 50:23

I sau na Babilon e vaga kesa na tupi e gini tupirutua na barangengo popono, mi kalina ia, ma na tupi ia e tarutu saikesa nogo. Migira na puku tavosi sui ara gini beke na reiana na omea e laba vaga ia.

Jeremia 40:9

Ma Gedalia e tsarivanigira, “Inau au vatsa vanigamu laka e tagara sa rongona kamu gini matagu na molo segenimui i limaqira na Babilonia. Kamu totu rago tana kao iani, ma kamu aqo vania na taovia tsapakae ni Babilonia, me sauba pipi sui na omea ke vano dou vanigamu.

Jeremia 9:11

Ma na Taovia e tsaria, “Inau sauba kau toroutsania na Jerusalem, me ke lia na nauna i tana ara totu igira na pai atsi. Migira na verabau sui tana Juda sauba kara lia na kaomate, na nauna i tana e tau totuvia sa tinoni.”

Isaia 52:7

!E dou sosongo na morosiana aia e adi turupatu mai. E ulo gaukutimai tana vungavunga, me adimaia na turupatu dou, na turupatuna na rago! E katevulagia laka God e laumaurisigira nogo nina tinoni, me tsarivania Sion: “!Nimu God aia nogo e taovia tsapakae!”

Isaia 52:2

Jerusalem, igoe o totu sosori kalina ia, ko tû mo ko tsapuligia na papasa tania na konimu, mo ko nusiligia na itai tapala ara soriginigo, mo ko ba totukae tugua tana nimu sasana na totukae.

Isaia 14:12

!Igoe na taovia tsapakae ni Babilonia, i sau e tangi loki gamu rongo, mi mataqira na tinoni o vaga moa na veitugusidani marara, mi kalina ia igoe o pukaligi taninogoa na baragata! I sau igoe o sugutigira na puku danga, mi kalina ia ara tsonitsunago nogo tana kao.

Linge 122:4

Mi konina nogo ia ara kalemaia igira na duli sui ni Israel, igira nina tinoni nogo na Taovia, rongona e totu nogo i laona na mamarena nina ketsa na Taovia laka i tana nogo kara soadoua.

Nehemia 9:37

Ma na vuana sui nimami kao nimami aqo kami tusuvanigira moa na taovia tsapakae igira igoe o mologira kara tagaovi kaputigami rongona nimami sasi. !Migira ara nauvanigami igami ma nimami omea tuavati na omea gua moa igira ara padangaoa, migami ami totu i laona na rota loki manana!”

Nehemia 5:4

Me visana segeni goto ara tsaria, “Igami ami kaoni qolo gana kami voli takesi vania na taovia tsapakae matena nimami uta na mutsa ma nimami uta na uaeni.

2 Taovia Tsapakae 23:33

Me sui nina aqotagao a Joahas kalina a Neko na taovia tsapakae ni Ejipt e aditsekâ i Ribla tana butona kao ni Hamat, me turugira na Juda kara tusu takesi vania ke 3,400 kilo na siliva, me tolu sangavulu vati kilo na qolumila.

Isaia 50:5

Na Taovia e sangavinogoa na kuliqu gana kau rongomiginia na omea aia e sasaniginiau, minau au tau sove tania mau tau goto pilovisu tania.

2 Turupatu Dato 9:26

Maia e taovia loki kaputigira sui na taovia tsapakae, tû tana Kô Euprates me tsau bâ tana Pilistia mi tana vovotana na Ejipt.

Isaia 49:21

Mi tana ti sauba igoe ko tsarisegenimu, ‘?Asei nomoa e vasuvaniau na baka girani? Minau au nangaligira sui nogo na dalequ, me utu goto kau tangomana na tamani dalequ tugua. ?Mara tsiligiau nogo mau ba totu tsinogo, masei nomoa e lokisigira na baka dangadanga girani? ?Inau ara mololeau nogo kau totu segeni, miava sagata ara talumai na baka girani?’ ”

Jeremia 31:7

Na Taovia e tsaria, “Linge dato tana magemage tana rongona na puku ni Israel, aia e loki tsapakae bâ i laoqira na puku sui tavosi. Kamu linge ma kamu tsonikaea na Taovia ma kamu tsaria, ‘Na Taovia e maurisigira nina tinoni ni Israel; e laumaurisigira sui igira ara kauvisu.’

Jeremia 42:2

mara tsarivaniau, “!Kiki ko nauvanigami na omea ami nongia i konimu! Ko nongia na Taovia nida God vanigami. Ko nonginongi vanigami sui igami ami pitsa tania na mate. Tana idana igami ami danga sosongo; mi kalina ia, vaga igoe o morosinogoa, igami ami tsaurae lê moa ami kauvisu.

Esekiel 5:5

Ma na Taovia God e tsarigotoa, “Ko morosi bâ na vera ni Jerusalem. Inau nogo au moloa ke totu i levugana patupatu na vera sui tana barangengo.

Aqo Manetabu 26:31

Me sauba kau toroutsanigira na veramui, ma kau toroveogira pipi nauna i tana amu samasama, me utu kau tabegira nimui omea amu gini savori-kodoputsa.

Aqo Manetabu 26:33

Inau kau adia niqu isi ma kau takuvi rasavaginigamu, migamu sauba kamu viri tsogo piriutsa bamai i laona niqira kao na tinoni ni veratavosi. Ma nimui kao segeni ke totu mangu lê, ma nimui verabau kara toroutsa sui.

Jeremia 44:2

Mau tû, mau goko vanigira na tinoni mau tsaria, “Na Taovia Susuliga Sosongo, na God ni Israel, e tsaria: Igamu segeni nogo amu reia na toroutsa inau au alomaia vania na Jerusalem migira sui na verabau tavosi goto tana Juda. Me tsau mai i dani eni, igira ara tototu toroutsa moa, me tagara goto sa tinoni ke totuvigira,

Jeremia 44:6

Me vaga ia, ma na korequ ma niqu momosatoba loki e botsa laba tana vera sui i laona na Juda, mi tana sautu loki i Jerusalem, mau mololakeqira. Igira ara toroutsa saikesa me tsau mai i dani eni.

Tangitangi 1:19

“Minau au soagira igira ara tabana koluau i sau, migira sui ara sove saikesa na sangaaqu. Migira niqu manetabu ma na tinoni lokiloki ara viri mate sui tana niqu sautu loki, kalina ara lalave gaqira mutsa gana ke tangoligira ma kara gini mauri.

Esekiel 26:2

“Dalena tinoni igoe, iani nogo e vaga na omea igira na tinoni tana verabau ni Tire ara tsovula gokona. Ara gugû mara tsaria, ‘!Na Jerusalem e toroutsa saikesa nogo! !Me utu goto nogo kara bâ na tinoni na voli omea i konina! !Mi kalina ia sauba kara mai na voli omea i konida igita, migita ka gini tamani qolo danga!’