Sekaria 9:10 - Ghari

¹⁰ Ma na Taovia e tsaria, “Inau sauba kau adiligi tanigira niqira terê na vailabu igira na Israel, ma niqira ose igira na Jerusalem; ma kau biru putsia niqira parige ara gini vanavana tana vailabu. Ma nimui taovia tsapakae sauba ke moloa na rago i laoqira na puku sui; maia sauba ke tagaovi kaputigira na vera sui tû kesa tabana na tasi loki me tsau bâ kesa tabana, me tû tana Kô Euprates, me tsau bâ tana susuina na barangengo.”

Sekaria 9:10 Referans Kwoze

Hosea 2:18

“Mi tana tagu ia, minau sauba kau naua kesa na vaitasogi kolugira sui na omea tuavati atsi ma na manu, rongona kara tau goto sekoligira niqu tinoni. Me sauba kau adiligigira goto pipi sui na sagorena na vailabu vaga na isi ma na parige tania na kao ia, ma kau tamivanigira niqu tinoni kara totu raviravi dou tana rago.

Hosea 1:7

Migira moa na tinoni tana Juda sauba kau galuvegira. Inau nogo na Taovia niqira God, me sauba nomoa kau maurisigira. Me ke tau goto kilia kau maurisigira tana vailabu kolua na isi, na parige, ma na pipili, se kau mologira na mane vaumate ara sage tana ose kara ba sangagira.”

Na Katemai 11:15

Mi muri, ma na vitunina na angelo e uvia nina tavuli. Mau rongomia na tatangina na goko dangadanga i baragata ara viri guu mara tsaria, “!Kalina nogo ia, kaira God ma na Dalena, aia nogo na Mesia, ara ka tagaovi kaputigira na vera sui tana barangengo popono, me sauba aia nogo ke tagao pukuga na dani ma na dani!”

Mika 5:4

Mi kalina aia ke mai, maia sauba ke tagaovi kaputigira nina tinoni kolua na susuliga e talumai konina na Taovia, me kolugotoa gana tangirongo tsapakae na Taovia God segenina nogo. Migira nina tinoni sauba kara totu raviravi dou, rongona na tinoni sui lakalaka polia na barangengo sauba kara donaginia gana loki tsapakae ia,

Isaia 60:12

Migira moa na puku ara sove na aqo vanigo igoe, sauba kara toroutsaligi sui saikesa.

Isaia 49:6

Ma na Taovia e tsarivaniau, “Eo, igoe niqu mane aqo, sauba rago ko adikaetugua gaqira tangirongo na tinoni ni Israel, igira ara matepitsa tana vailabu, ma kara lia tugua na puku loki. Bâ, mi kalina ia, inau au ngaoa kau moloa kesa goto na aqo vanigo, me ke loki goto bâ. Minau sauba kau naua migoe ko lia vaga na marara loki ke mararasigira na puku sui, rongona kara gini mauri na tinoni sui lakalaka tana barangengo popono.”

2 Korint 5:20

Vaga ia, mami goko vanigamu tana asana a Iesu Kristo, ma God segenina nogo e nongigamu tana mangamami igami. !Eo, tana asana nogo a Iesu Kristo ami ngasugamu kakai: kamu tamivania God me ke mologotosigamu i matana!

2 Korint 5:18

God nogo e naua na omea sui girani. Eo, tana rongona nogo nina aqo a Iesu Kristo, ti God e mologotosigami i matana, maia e molovataragini vanigami na aqo kami gini turupatuna vanigira na tinoni tavosi, rongona igira goto kara gini totugoto i matana God.

Aqoaqo 10:36

Igamu dona nogo laka God e molomainogoa nina goko vanigira na tinoni ni Israel, ma na Turupatu Dou na rago e mai vanigira nogo ginia a Iesu Kristo, maia nogo gaqira Taovia igira pipi sui na vatana na tinoni i barangengo.

Hagai 2:22

ma kau pukalia gaqira susuliga na taovia tsapakae sui, ma kau kovoraginia niqira terê kolugira na mane ara tagaovigira; migira niqira ose sauba kara viri mate lê, migira ara sagekae i kelaqira sauba kara vaimatesigi segeni.

Isaia 11:10

E maimai nogo na tagu i tana aia na taovia tsapakae vaolu ke talumai tana vungu konina a David, me ke tû ngiti padapada vanigira na tinoni pipi sui tana vera. Migira sui sauba kara saimai tana verana aia ma kara tsonikaea.

Linge 72:17

Kara tsonikaea na asana na taovia tsapakae; ma kara tau goto padalea na dani ma na dani; ma gana tangirongo ia ke totu kalavata vaga moa na aso. Migira na tinoni pipi tana vera sui kara tsonikaea ma kara nongia God ke vangalaka vanigira vaga nogo aia e vangalaka vania na taovia tsapakae.

Linge 72:3

Ko naua me ke peluga sosongo na vuana niqira aqo tana vera ia, ma kara vatsangia na douna nimu gotolaka.

Na Vaolusi Ketsa 11:24

Me pipi sui na kao igamu kamu liu bâ i konina sauba kara lia nogo nimui tamani igamu. Ma nimui butona kao sauba ke tuturiga tana kaomate i ata, me ke tsau bâ tana Vungavunga Lebanon i vava, me ke tû tana Kô Euprates i longa me ke votu bâ tsau tana Tasi Mediteranean.

1 Taovia Tsapakae 4:21

A Solomon e tagaovi kaputigira popono na puku tavosi sui tû tana Kô Euprates me tsau bâ i Pilistia mi tana vovosana na Ejipt. Migira sui na tinoni tana vera gira ara saua niqira takisi vania, mara totu i vavana nina tagao a Solomon tana maurina popono.

Linge 85:8

Inau sauba kau rongomi vatavia na omea God ke tsarivaniau. Aia e vekea laka sauba ke saua na rago vanigita igita nina tinoni segeni, ti vaga igita ka tau visutugua tana sautu sasi a muria i sau.

Isaia 2:4

Maia nogo sauba ke gotosia niqira vaikoregi na puku sui, me ke vaturia na goto i laoqira. Migira sauba kara tupia niqira isi na vailabu me ke lia lê na mani tsaikao tana niqira uta, ma niqira bao ke lia lê niqira gau na aqo. Me sauba ke tagara sa puku ke ngaoa na labuana na puku tavosi, se ke vangarautugua na vano tana vailabu.

Mika 4:8

Migoe Jerusalem, God nogo e totu i laomu, me reitutugugira nimu tinoni, vaga moa kesa na mane reitutugu sipi dou e reitutugugira nina sipi. Migoe sauba ko lia tugua na verabau pukuga vaga nogo i sau.

Linge 89:26

Maia sauba ke tsarivaganana vaniau, ‘Igoe nogo na tamaqu ma niqu God; igoe niqu reitutugu ma niqu vagamauri.’

Hosea 2:20

Minau sauba kau manalia niqu veke au naunogoa vanigo laka ko lia na tamaniqu, mi tana ti igoe ko reigadoviginia laka inau nogo nimu Taovia.

Mika 5:9

Migira na Israel sauba kara tuliusigira gaqira gala ma kara matesiligigira sui.