Sekaria 1:12 - Ghari

¹² Mi muri ma na angelo e tsaria, “Taovia God i laona vitu sangavulu nogo na ngalitupa igoe o kore loki sosongo vania na Jerusalem, migira sui goto na verabau tana Juda. ?Ke oka koegua sagata ti ko galuvegira tugua?”

Sekaria 1:12 Referans Kwoze

Sekaria 7:5

“Ko bâ mo ko tsarivanigira na tinoni tana butona momoru iani, migira goto na manetabu, laka kalina igira ara tsoni vitoaqira segeni, mara tangitangi pipi tana tsegenina ma na vitunina vula i laona vitu sangavulu na ngalitupa tugirani, mara tau saikesa naua tana padalokiginiaqu inau.

Daniel 9:2

Mi tana kesanina ngalitupa nina aqotagao aia, minau a Daniel au totu matengana na tsokoana na papi tabu, mau papada moa na goko aia na Taovia e tsarivania a Jeremia na propete, laka na Jerusalem ke totu toroutsa lê i laona ke vitu sangavulu na ngalitupa.

Jeremia 29:10

“Ma na Taovia e tsarigotoa, ‘Au pedenogoa laka i laona ke vitu sangavulu na ngalitupa sauba ke vano dou na omea sui vanigira na Babilonia. Mi kalina ke putsi vitu sangavulu na ngalitupa, minau sauba kau mai tsigovigamu, ma kau manalia niqu veke au naua laka kau adivisugamu tugua tana nimui kao segeni.

Linge 102:13

Me sauba ko tû mo ko galuvetugua na vera ni Sion; e labamai nogo na tagu na galuveana aia; kalina ieni nogo na tagu dou vania na sangaana.

Linge 74:10

?God, sauba ke oka koegua igira gamami gala kara kiataginigo igoe? ?Se laka kara totu matengana sailagi moa na soa sekoliana na asamu igoe?

Na Katemai 6:10

Mara gudato mara tsaria, “!Taovia susuliga sosongo, igoe o tabu loki mo mana saviliu! ?Sauba ke oka koegua sagata ko pipitu ti ko mai na pedeaqira na tinoni tana barangengo, mo ko kekegira igira ara labumatesigami igami?”

Sekaria 1:8

Inau au rei bâ kesa nina angelo na Taovia e sagekae i kelana kesa na ose tsitsi. Aia e ba tutû i levugaqira na gai i laona na poiatsa, mara visana goto na ose tsitsi, ma na tuputupugana, ma na serena, ara tutû i murina.

2 Turupatu Dato 36:21

Me gini laba vaga ia rongona ke gini manatovu na omea na Taovia e katemai idanogoa tana mangana na propete Jeremia. Aia e goko vaga iani: “Sauba na veraqira ke totu mangu lê i laona ke vitu sangavulu na ngalitupa, gana kara gini sese matena niqira petsakoe rongona ara tau muria na ketsa na mango tana Sabat.”

Hibru 7:25

Maia nogoria na rongona ti a Iesu e tangomana, kalina eni me pipi tana tagu sui, na maurisiaqira na tinoni ara mai i konina God tana asana aia, matena e mauri saliu tana rongona nogo ke gini isutuguqira i konina God.

Isaia 63:9

tania niqira totu rota. Me tau goto molo bâ sa nina angelo ke laumaurisigira, tagara, tana nina galuve ma nina tobalaka loki aia segenina nogo na Taovia e tû me laumaurisigira. Maia nogo e reitutugugira tu mai nogo i sau.

Linge 69:5

Niqu God, igira sui niqu sasi ara tau goto popoi tanigo; migoe o dona nogo laka inau na tinoni bubulega lê moa.

Jeremia 12:4

?Laka ke oka koegua sagata ke makede nimami kao igami, ma kara matsele na buruburu pipi tana poi? Igira na omea tuavati ma na manu ara viri mate tana rongona nogo niqira sasaga tabaruga igira nimami tinoni, igira ara tsaria, ‘God e tau saikesa reigira na omea igita a naugira.’ ”

Jeremia 15:17

Inau au tau ba totu lê kau kiakia ma kau magemage kolugira na tinoni tavosi, tagara. Inau au rongomangamu moa igoe, mau totu segeniqu, rongona igoe o dangaliginiau na koremu loki.

Jeremia 30:18

Na Taovia e tsaria, “Inau sauba kau adivisugira tugua niqu tinoni i laona niqira kao, ma kau galuvegira pipi sui na tamadale. Maia na verabau ni Jerusalem sauba kara logo vaolusitugua, ma kara vaturikae visugotoa na valena na taovia tsapakae.

Daniel 12:6

Me kesa ka vidaqira e veisua na angelo aia e tû tabana i longa, “?Sauba ke oka koegua ti kara sui na omea ganataga loki vaga girani?”

Habakuk 1:2

?Ei, igoe Taovia, ke oka koegua sagata kau ngasugo ko sangagami ti ko rongomia niqu nonginongi, mo ko laumaurisigami tania niqira sasaga vutoro ara naua igira gamami gala, mara gini rotasi sosongoligami?

Linge 79:5

?Taovia kiki igoe, laka sauba nomoa ko kore vanigami saviliu? ?Egua laka na koremu ke iru babâ moa vaga na lake?

Sasani Sasaga 3:3

Na tagu na labumate ma na tagu na tatali, na tagu na veo vale ma na tagu na logoana.

Isaia 47:6

Inau au kore sosongo vanigira niqu tinoni, mau tau nogo nauvaganana vanigira laka ti igira niqu tamani. Inau nogo au mologira i limamu, migoe o tau goto gaegira, me atsa moa igira na tuqatuqa ma na dakidaki migoe o rotasi sosongoligira goto.