Nehemia 9:35 - Ghari

³⁵ Tana nimu vangalaka loki igoe o sangagira nimami taovia tsapakae kara tagaovidougira nimu tinoni, kalina igira ara totu moa i laona na kao dama lakataga igoe o saunogoa vanigira; migira ara tau goto tangomana kara piloligi tania niqira sasi ma kara aqo vanigo.

Nehemia 9:35 Referans Kwoze

Na Vaolusi Ketsa 28:47

Na Taovia e tabugamu nogo pipi tana omea, migamu moa amu tau aqo dou vania tana magemage mi tana tobamui popono.

Jeremia 5:19

Mi kalina kara veisuago na rongona gua ti au naugira na omea sui vaga girani, migoe a Jeremia ko tsarivanigira laka au nauvaganana ia rongona igira ara piloligi taniau inau, mara aqo vanigira na god peropero ni veratavosi i laona niqira kao segeni nogo, me vaga ia minau sauba kau mologira kara ba aqo vanigira na tinoni tavosi kesa tana kao e tau niqira kao segeni.”

Nehemia 9:25

Migira nimu tinoni ara tangoligira na vera loki tamani baravatuna, ma na kao lakataga, migira na vale e danga na omea levolevo dou i laoqira, ma na tuvu na kô ara tsai manogatinogoa, ma na gai na olive, ma na gai mutsamutsa, ma na uta na uaeni. Mara gania moa pipi na omea ara ngaoa mara gini paquru; me gini laoqira sosongo pipi sui na omea dou igoe o tusuvanigira.

Na Vaolusi Ketsa 31:21

mi tana ti sauba ke danga na rota seko loki kara gadovigira. Ma na linge iani sauba kara lilingena sailagi moa, ma na gokona nogo ke kateli vanigira niqu kede e totupitugira. Mi kalina goto ia, idavia kau adivanogira tana kao aia au vekenogoa kau sauvanigira, inau au dona ida nogo na omea ara padâ.”

Nehemia 9:34

Igira na mumuamami, ma nimami taovia tsapakae, ma gamami ida, migira goto na manetabu igira sui ara tau nogo muria nimu Ketsa. Igoe o parovatavigira kara muridougira nimu ketsa ma nimu vali, migira ara sove nomoa na rorongo.

Isaia 63:7

Inau sauba kau turupatuna tana rongona nina galuve vo oli na Taovia, ma kau tsonikaea rongona na omea dou sui aia e naua vanigita. Tana nina tobalaka ma nina galuve vo oli, aia e vangalaka loki vanigira na tinoni ni Israel.

Na Vaolusi Ketsa 28:48

Me vaga ia, migamu sauba kamu aqo vanigira gamui gala igira aia na Taovia nimui God sauba ke mologira kara maiginigamu. Migamu sauba kamu vitoa, ma kamu marou, ma kamu malaiole, ma kamu tau goto tamanina sa omea. Ma na Taovia sauba ke bingi sekoligamu kakai poi tsau kamu viri mate sui.

Esekiel 5:6

Migira na tinoni ni Jerusalem ara sove na muriaqira niqu ketsa, mara gini sauvulagia laka igira ara tinoni vanga tsutsukibo liusigira bâ na tinoni tavosi tana veraloki ara totu poligira. Igira na Jerusalem ara sove mananâ na muriaqira niqu ketsa ma niqu vali.