Mateo 5:8 - Ghari

⁸ !Kara gini mage igira ara tobamale; rongona sauba kara reia God!

Mateo 5:8 Referans Kwoze

Linge 24:4

Igira moa e male dou niqira sasaga ma niqira papada, mara tau samasama vanigira na god peropero, mara tau goto dona kara naua na veke peropero lê.

Linge 51:10

Niqu God, ko naua me ke maletugua na tobaqu. Ko vaolusia na tidaoqu ma kau totukakai i konimu.

Hibru 10:22

Ida gita, ma ka sage baa varangisia God tana tobalaka ma na tutuni manana, rongona na gabuna a Iesu Kristo e vulimalegita nogo tanigira nida sasi, me lesovigininogoa na konida na ko male dou.

Hibru 12:14

Kamu tovokakaia na totu tana rago koluaqira na tinoni sui, ma kamu tovoa na mauri tobamale pipi kalina, rongona sauba ke utu vania kesa na reiana na Taovia ti vaga ke tau male na tobana.

Goko Tabana 22:11

Masei ti vaga ke totu male i matana God, me ke dou sailagi nina goko, ma na taovia tsapakae sauba ke lia na kulana.

Iakobo 4:8

Kamu garu baa varangisia God, maia God sauba ke garu mai varangisigamu. Vulia na limamui, igamu na tinoni seko, na papadana amu piloligi nogo tanigira nimui sasi. !Malesia na tobamui, igamu na vanga malapalu!

1 Petero 1:22

Mi kalina eni, igamu amu murinogoa nina sasani a Iesu Kristo. Mamu tapiu taninogoa na sasi e sorivatavigamu i sau. Mamu gini dona nogo na vaigaluvegi koluaqira gamui tutunikolu. Vaga ia, me dou baa ti kamu vaigaluvegi manana tana tobamui popono.

Iakobo 3:17

Ma na sasaga loki e talu i gotu, aia e male liuliu baa. E rago saviliu me tsalapo, me dona na itsa ma na atsa. E loki na galuve i konina, mara gini laba danga na vuana nina aqo galuve. E vo saikesa na galuve tsikaitaba ma na malapalu.

Titus 1:15

Pipi sui na omea ara masidi dou vanigira igira e masidi dou na tobaqira. Me utu sa omea ke masidi dou vanigira igira e seko na tobaqira mara sove na tutuni, rongona e seko sui nogo niqira papada, me naquga niqira sasaga.

Linge 15:2

Aia moa na tinoni e rongomangana God pipi tana omea sui, me nau sailaginia na omea e goto. Ma nina tsaqina goko ara mana mara male sui,

Aqoaqo 15:9

E tau nau tatavosia vanigita igita, me vanigira igira. E nusiligia niqira sasi rongona ara tutunina.

Linge 73:1

God aia e dou manana vanigira nomoa na Israel, me vanigira goto igira e male na tobaqira.

Hibru 9:14

Eo, e mana rago nomoa na omea iani. !Ma na gabuna a Iesu Kristo e susuliga sosongo goto baa liusia na omea vaga ia! Tana susuligana nogo na Tarunga Tabu aia e totu saliu, a Iesu Kristo e sausegenina tana gai ulutaligu vaga na savori laka saikesa vania God. Ma na gabuna aia e dona ke malesia na tidaoda tanigira pipi na vatana na aqo na lotu ara tau pelu, rongona ti igita ka gini totu saviliu moa tana aqo dou vania na God mamauri.

2 Korint 7:1

!Igamu na kulaqu galugaluve, na veke sui vaga igira, God e naugira vanigita nogo igita! Me ti ke vaga ia, ma nida aqo igita ka malesia na tobada tanigira pipi sui na omea e dona ke bausia na konida se na tidaoda, ma ka tovokakaia na mauri male saikesa tana kukuni taniana God.

Linge 18:26

Igoe o sauvulagia nimu sasaga male vanigira igira ara sasaga male i matamu. Mo reisavigira igira e tabaru niqira sasaga.

1 Korint 13:12

Ma na omea igita a reia kalina eni e tau maka. E vaga moa ti kalina na tinoni e gini moro na tironunu pasapasa lee. Me sauba kesa dani igita ka reilakana ginia na matada segeni. Ma na omea au donaginia kalina eni, aia na turina moa ia. Me sauba kesa dani inau kau donaginia na omea popono, vaga nogo God aia e donaginiau popono.

Na Katemai 22:4

Ma kara morosia na matana God, ma na asana aia ke totu tana raeqira.

Tuturigana 32:30

Ma Jakob e tsaria, “!Alao! !Inau au morosilakana nogo God ginia na mataqu segeni, mau mamauri moa!” Me vaga ia maia e soaginia tana nauna ia i Peniel.

Linge 51:6

Igoe o kilia na tinoni kara mana me ke goto dou na tobaqira; me vaga ia, minau au nongigo ko dangaliginia na tobaqu nimu sasaga loki.

2 Samuel 22:27

Igoe o sauvulagia nimu sasaga male vanigira igira ara sasaga male i matamu, mo reisavigira igira e tabaru niqira sasaga.