Mateo 23:37 - Ghari

³⁷ “!Jerusalem, Jerusalem! !Igira na tinoni i laomu ara labumatesigira na propete, mara taimatesigira nina mane adigoko aia God e molomaigira vanigo! !Danga nogo kalina au ngaoa laka kau adisaigira nimu tinoni, vaga moa na kudo kalina aia e sarosaigira na dalena tetelo i vavana na rapona, migoe o tau saikesa tamivaniau!

Mateo 23:37 Referans Kwoze

Nina Papi Ko Rut 2:12

Na Taovia ke sauvanigo na peluna nimu aqo sui igoe o naugira. !Ma na Taovia na God ni Israel, aia igoe o mai totu vataragi i konina, aia nogo ke sauvanigo na matena popono nimu aqo dou!”

Linge 91:4

Aia sauba ke tsavupoiginigo na rapona, migoe sauba ko totu raviravi dou i laona nina reitutugu aia; ma nina doulaka na Taovia sauba ke lia gamu tako me ke isutugumu.

Linge 17:8

Ko reitutuguau vaga igoe o reitutugua na lakana matamu. Ko molopoiau tana auauna na rapomu,

Linge 36:7

!Igoe God, e loki tsapakae nomoa nimu galuve vo oli! Migami sui nimu tinoni ami dona kami ba totu raviravi i vavana na rapomu igoe.

Nehemia 9:26

“Migira nimu tinoni ara sove tanigo moa mara peamangamu; mara pilo tavamuri vania nimu Ketsa. Ara labumatesigira na propete igira ara sauparovata vanigira gana kara pilovisu tugua i konimu igoe. Me pipi kalina moa igira ara peago,

Linge 63:7

rongona igoe nogo o tau kuti na sangaaqu sailagi. Minau au totu raviravi dou i konimu, vaga na dalena kokoroko i vavana na rapona tinana, mau linge tana magemage.

Jeremia 35:15

Mau tau goto kuti na molo bâ vaniamui pipi sui niqu maneaqo igira na propete, ma kara tsarivanigamu, ‘Kamu mololea kalina ia na nauana na omea tabaruga, ma kamu naua moa na omea e goto, ma kamu laka na bâ samasama ma na aqo vaniaqira na god peropero, gana kamu gini tangomana na mauri babâ tana butona kao aia na Taovia e saunogoa vanigamu igamu migira na mumuamui.’ Migamu amu tau ngaoa na rongomangaqu.

Mateo 23:30

Mamu tsaria laka ti igamu kamu mauri i sau kalina igira na mumuamui ara labumatesigira na propete gira, me utu saikesa igamu kamu sanga na labuaqira.

Mateo 22:3

Mi kalina aia e vangaraugira sui nogo pipi na omea, maia e molovanogira nina maneaqo kara baa, ma kara soamaigira igira sui aia e viligira nogo kara mai na totogoro tana kavomutsa. Migira sui ara sove na mai.

Mateo 5:12

Eo, kamu gini mage manana, matena God e vangaraunogoa na peluna loki vanigamu i baragata. Ma kamu dona dou laka na omea vaga igira ara nauvanigamu kalina eni, e atsa vaga saikesa nogo na omea igira ara nauvanigira na propete i sau.

Hosea 11:2

Danga sosongo tagu inau au soâ, maia e pipiloligi taniau moa. Igira niqu tinoni ara ba savori-kodoputsa vania Baal, mara kodoa na bulungai uruuru vanigira na god peropero.

Linge 57:1

Ko galuveau kiki niqu God, ko galuveau, rongona inau au mai kau toturavi i konimu. Tana auauna na rapomu igoe inau kau toturavi poi tsau ke puka na legai loki.

1 Tesalonika 2:15

Igira nogo ara matesia a Iesu na Taovia, mara matesigira goto na propete ni sau, mara rotasigami goto igami. !Igira nogo ara tsaia na korena God mara tsogori tsunagira na tinoni sui!

Jeremia 44:4

Inau au tau kuti na molovanoaqira niqu maneaqo igira na propete kara ba tsarivanigamu kamu mololea na nauana na omea tabaruga loki vaga ia inau au reisavi sosongolia.

Mateo 22:6

Me visana ara tuu, mara tangoligira nina maneaqo na taovia loki, mara ramitsigira mara labumatesigira.

Sekaria 1:4

Igamu kamu laka na usuliaqira na mumuamui. I sau igira na propete ara kate vanigira na mumuamui niqu goko, mara raigira kara mololea na mauri tana sasi. Migira ara sove saikesa na rongomangaqu, mara nausasi babâ moa.

Hosea 11:7

Ara padakuti matena kara piloligi taniau inau. Migira sauba kara ngangai rongona e ngoligira na kalagai mamava ara kalagaia tana kokoveqira, me ke tagara goto ke kesa ke tsebaligia i koniqira.

Jeremia 26:23

Migira ara bâ mara adivisumaia a Uria vania a Jehoiakim na taovia tsapakae, maia e ketsaligira kara labumatesia, ma na konina ara ba tsonia tana qiluqilu na vera.

Jeremia 6:8

Igamu na tinoni ni Jerusalem, kamu parovata dou, ma kamu rongomangaqu inau. Me ti tagara, minau sauba kau tsonikidamui saikesa, ma kau naua ma nimui verabau ke lia vaga na kaomate, na nauna mangu i tana e tau nogo totu sa tinoni.”

Jeremia 4:14

Igamu na Jerusalem, kamu malesiligia na omea tabaruga tania na tobamui, gana kamu gini mauri. ?Ke oka koegua sagata ti kamu totu matengana moa na padaana na omea seko i laona na tobamui?

Jeremia 2:30

Inau au kedegamu, me tau lelê pelugamu rongona igamu amu tau ngaoa kau gotosigamu. Mamu tû mamu matesigira sui nimui propete, vaga saikesa moa na laeone veveiga.

Isaia 50:2

“?Kalina inau au mai na laveamui ma na rongona gua ti au tau reia sa tinoni? ?Mi kalina inau au soagamu, ma na rongona gua ti amu tau gokovisu vaniau? ?Me laka amu padâ inau au maluku sosongo me tau tangomana kau maurisigamu? Bâ, minau tangomana kau goko moa me ke gini mamatsa na tasi, ma kau oligira na kô tatave ma kara lia na kaomate lê, ma kara gini viri mate na tsetse i laoqira rongona e mamatsa lê na kô.

Na Katemai 17:6

Minau au reia na daki ia e ulavia na gabuqira nina tinoni God, ma na gabuqira igira ara labumatesigira matena ara totu kakai tana niqira tutuni tana rongona a Iesu. Mi kalina au morosia na daki vaga ia, minau au gini novo sosongo.

Luka 15:28

“Ma na tasina loki e kore loki sosongo, me sove na sage i vale. Ma na tamana e tsuna i tano, me soaa ke sage i vale.

Isaia 5:4

?Laka sa omea ngatsu inau au tau naudoua te e gini tau dou niqu uta? ?Megua te e tau molo vuana dou vaga au amesia inau, me molo vuana vavai moa?

Jeremia 32:31

Eo, tû tana dani ara logo vaolua na verabau iani, me tsau mai i dani eni, igira na tinonina ara naua me gini momosa loki na tobaqu. Minau au padakuti matena nogo kau toroutsania,

Jeremia 36:26

Mi muri, maia e ketsalitugira a Jerameel na dalena mane segeni nogo ia, ma Seraia na dalena a Asriel, ma Selemia na dalena a Abdeel, kara tu tangolikaira a Jeremia na propete ma Baruk nina mane mamare. Ma na Taovia e molopoikaira nogo.

Hosea 7:13

“!Igira sauba nomoa kara toroutsa! Ara mololeau inau mara sove taniau. Me sauba nomoa kara mate. Inau au ngaoa kau laumaurisigira, migira ara peropero moa tana rongoqu inau.

Mateo 23:31

!Me vaga ia, migamu amu katevulagi segenimui nogo laka igamu nogo na kukuaqira na tinoni ara labumatesigira na propete i sau!