Malaki 4:3 - Ghari

³ Mi tana dani kalina inau kau nauvaganana ia, me sauba igamu kamu tsogori pukaligira na tinoni vanga nauseko, migira sauba kara lia vaga na papasa lê i vavana na tuamui.

Malaki 4:3 Referans Kwoze

Nina Papi A Job 40:12

Eo, ko moro bâ i koniqira mo ko tsogori tsunaligira; mo ko bingi rutugira igira na vanga tsutsukibo i tana nogo ara totu.

Roma 16:20

Ma God, aia na pukuna na rago vanigita, sauba ke tau oka me ke tsogori rutua i vavana na tuamui na susuligana Satan. Au nongia a Iesu nida Taovia ke vangalaka vanigamu sui.

Malaki 3:17

Ma na Taovia Susuliga Sosongo e tsaria, “Igira sauba kara lia niqu tinoni. Mi tana tagu inau au titinogoa, migira sauba kara lia niqu tamani segeni saikesa nogo inau. Me sauba kau galuvegira vaga nogo na tamaga e galuve sosongolia na dalena aia e aqo dou vania.

Sekaria 10:5

Migira na tinoni ni Juda sauba kara vaga moa na mane vaumate susuliga ara tsogori pukaligira gaqira gala i laona na boko tana sautu loki. Sauba kara vailabu susuliga, ma kara tuliusigira gaqira gala atsa moa igira ara sage tana ose, rongona na Taovia nogo e totu kolugira.

Mika 7:10

Mi tana ti igira gada gala kara reia e laba vaga ia, me sauba kara gini vangamâ lê, igira nogo ara gilu gada tana idana mara veisuagita vaga iani, “?Laka iava e totu aia na Taovia nimui God?” Migita sauba ka reia kalina na Taovia ke tsogori pukaligira, ma na tinoni kara tsotso i kelaqira vaga moa ti na boko tana sautu.

Mika 5:8

Migira na tinoni ni Israel ara kauvisu i laoqira na puku tavosi, sauba kara vaga moa kesa na laeone e rurugu bamai na lave gana mutsa i laona na legai atsi, se tana poiatsa i tana ara mutsamutsa na sipi. Me ke tsipusage i laoqira na sipi, me ke gati ngotsingotsigira, me tagara goto kesa tangomana ke laumaurisigira.

Isaia 26:6

Migira na tinoni igira ara bingi sekoligira i sau ara liu i kelana kalina ia, mara tsogoriginia na perana tuaqira.

Na Katemai 14:20

Mara rapasigira na vuana tana vale na rapasi uaeni e totu i taba tania na vera loki, ma na gabu e rutsu talumai tana vale ia e nara bamai vaga moa ti na oboloki, me liuvi poponoa na nauna e tugua ke tolu sangatu na kilometa na katsina, me kesa sangava na maona.

Na Katemai 11:15

Mi muri, ma na vitunina na angelo e uvia nina tavuli. Mau rongomia na tatangina na goko dangadanga i baragata ara viri guu mara tsaria, “!Kalina nogo ia, kaira God ma na Dalena, aia nogo na Mesia, ara ka tagaovi kaputigira na vera sui tana barangengo popono, me sauba aia nogo ke tagao pukuga na dani ma na dani!”

Daniel 7:27

Ma kara sauvanigira nina tinoni segeni na God Loki Tsapakae kara tamanina gaqira susuliga ma gaqira tangirongo igira na vera loki sui i laona na barangengo. Me sauba kara tangolidato sailaginia na susuliga taovia tsapakae, migira sui na tagaovera tavosi tana barangengo popono sauba kara aqo vanigira ma kara rongomangaqira.”

Daniel 7:18

Migira nogo nina tinoni aia na God Loki Tsapakae sauba kara tamanina gaqira susuliga tangirongo taovia, ma kara tamanina baba moa na dani ma na dani.”

Esekiel 28:18

Tana nimu aqo na vovoli ma na tsabiri igoe o peqo sosongoligira na tinoni, mo nagugasiginigira nimu nauna na mani samasama. Mi tana minau au mololakena nimu verabau me iru sui saikesa. Migira sui ara morosigo kalina ia, ara reia moa na tsupu na tora.

Isaia 25:10

Na Taovia nogo sauba ke reitutugua na Vungavunga Sion, me ke tsogori rapasigira na tinoni ni Moab vaga saikesa nogo kalina ara tsogoria na buruburu makede tana tae.

Linge 91:13

Migoe sauba ko tsogorigira lê na laeone ma na muata, igira na laeone veveiga ma na muata vogata.

2 Samuel 22:43

Inau au tsogori rapasigira, migira ara rapa vaga saikesa ti na papasa lê; mau tsogorigira lê vaga moa ti na boko tana sautu.

Tuturigana 3:15

Me sauba kau naua ma kamu ka vaireisavigi kagamu igoe ma na daki; ma na dalena aia ma na dalemu igoe sauba kara ka vaigalagi sailagi. Ma na dalena aia sauba ke tsogori rutua na lovamu, migoe sauba ko gatia na bobouna na tuana.”

2 Samuel 22:39

Au labupukaligira me utu goto vanigira kara tû; ara viri pukatsuna sui i tuaqu.

Linge 49:14

na matemate e totupitugira vaga moa na sipi ara totupitua na matesiaqira, ma na Mate aia nogo sauba ke lia niqira reitutugu. Migira nogo na tinoni e goto niqira sasaga sauba kara tagaovi kaputigira, ma na koniqira igira ke ratsa tsaku lê i laona na barangengo na mate ao tania na veraqira.

Tangitangi 1:15

“Na Taovia e sove tanigira sui niqu mane vaumate susuliga. Me molomaia kesa na alaala na mane vaumate ni veratavosi kara matesigira sui niqu mane vaolu. Mara tsogori rapasigira niqu tinoni, vaga saikesa moa na vuana uaeni ara tsogori rapasigira tana nauna na mani rapasi uaeni.

Linge 147:6

Na Taovia e sulukaegira igira ara palatsuna; me tsogori rapasigira tana kao igira na vanga tsutsukibo.