Luka 4:18 - Ghari

¹⁸ “Nina Tarunga Tabu na Taovia e totu i koniqu, maia nogo e viliau, gana kau adivanoa na Turupatu Dou vanigira na tinoni ara tau tamanina sa omea. Aia e molomaiau rongona kau tsarivulagia laka kara tanusi igira ara totu sosori, ma kara momorotugua igira ara koko, ma kara totu sabe igira ara bingi sekoligira,

Luka 4:18 Referans Kwoze

Isaia 61:1

Na Taovia God e dangaliginiau nina Tarunga. Me viliau kau adivanoa na turupatu dou vanigira na tinoni sekona lê, ma kau veregira igira e melu loki na tobaqira, ma kau suivisugira igira ara lautsekagira, ma kau maurisigira igira ara totu sosori.

Mateo 11:5

na koko ara moro, mara vanovano na logu, migira na mudo e mavutugua na kokoraqira, ara rorongo na muikuli, migira na tinoni mate ara maurivisutugua, ma na Turupatu Dou ara turupatuna nogo vanigira na tinoni ara tau tamanina sa omea.

Aqoaqo 10:38

Igamu amu donagininogoa a Iesu ni Nasaret, me koegua God e vilia me dangali tovuginia na susuligana ma na Tarunga Tabu. E liu pipi tana vera, me aqo galuve vanigira na tinoni sui, me maurisigira igira e totuvigira na susuligana na tidao seko, rongona God nogo e totu i konina.

Luka 7:22

Me goko vanikaira nina mane adigoko a Ioane me tsaria, “Kamu ka visu baa kagamu, ma kamu ka ba tsarivania a Ioane nagua amu ka reia mamu ka rongomia: na koko ara moro, na logu ara vanovano, migira na mudo e mavutugua na kokoraqira, na muikuli ara rorongo, migira na tinoni mate ara maurivisutugua, ma na Turupatu Dou ara turupatuna vanigira na tinoni ara tau tamanina sa omea.

Aqoaqo 26:18

Igoe nogo nimu aqo ko sangavia na mataqira, mo ko pilovisugira tania na rodo ti kara reiginia na marara, ma kara gini piloligi tania na susuligana Satan, ma kara pilo baa i konina God. Mi tana niqira tutuni i laoqu inau, ti kara gini tanusi niqira sasi, ma kara sangasage i laoqira nina tinoni vivili God.’

Isaia 42:7

Migoe sauba ko naua ma kara moro igira na koko, mo ko nusigira igira ara totu sosori i laona na vale rodo.

Ioane 12:46

Inau au mai i barangengo ngiti marara, rongona pipi sei ti ke tutuniqu inau ke tau totu i laona na rodo.

1 Petero 2:9

Migamu, amu nina mamatana tinoni vivili ma nina manetabu God na Taovia Tsapakae. Mamu lia nogo na vera tabu loki, ma nina tinoni segeni nogo God. Aia e viligamu kamu gini tsarivulagigira na omea loki God e nauvanigamu kalina aia e soa rutusumiligigamu tania na totu rodo, me tudumi sagegamu tana nina marara loki segeni nogo ia.

Kolose 1:13

Aia nogo e maurisigita tania na susuligana na rodo e tangoli kaputigita i sau, me adigita baa tana verana na Dalena galugaluve,

Mateo 4:16

Migira na tinoni ni tana ara totu moa tana rodo na sasi, me sauba kara reia kesa e mai vaga na marara loki, me ke mararasia na tobaqira. Migira ara totu moa tana ungana na mate, sauba na marara loki ia ke mararasigira.”

Isaia 32:3

Na mataqira sauba kara morogado, ma na kuliqira sauba kara rorongogado.

Linge 147:3

Aia e veregira igira e ngoligira na melu, me talia na bokaqira.

Isaia 35:5

Na koko sauba kara momoro, ma na muikuli sauba kara rorongo.

Mateo 5:3

“!Kara gini mage igira ara totu palatsuna i matana God, rongona na Verana God niqira nogo igira!

Luka 6:20

Ma Iesu e moro baa i koniqira gana duli me tsaria, “!Kamu gini mage igamu amu tau tamanina sa omea, rongona nimui nogo na Verana God!

Malaki 4:2

Migamu na tinoni amu rongomangaqu inau, sauba na susuligaqu gana na tusumauri ke sinarigamu vaga na aso, ma na lalaina ke maurisiginigamu. Me sauba kamu totu tanusi ma kamu magemage vaga moa na dalena buluka kalina ara sangavi vanigira na matsapana na baraqira, mara gini mage na rutsu ma na ulo bamai i taba.

Iakobo 2:5

!Kamu rorongo dou, tasiqu galugaluve! God e viligira na tinoni sekona lee i barangengo kara gini tamani tsapakae na tutuni, ma kara gini tamanina na verana God e vekenogoa vanigira igira ara galuvea.

Ioane 3:34

Aia moa God e molomaia, aia segeni moa e dona ke gini turupatuna na goko e talumai i konina God, rongona God e dangali tovuginia nina Tarunga Tabu.

Isaia 59:21

Minau au naua kesa na vaitasogi vaolu kolugamu: Inau au tusuvanigamu nogo na susuligaqu ma niqu sasani kamu tamanina sailagi, me tû kalina ia me ke bâ, migamu nimui aqo kamu rongomangaqu inau, ma kamu sasanigira na dalemui ma na kukuamui na rongomangaqu sailagi inau tana tagu sui ke mai.”

Isaia 50:4

Na Taovia God e sasaniginiau nogo na goko gua kau tsaria, ti kau gini tangomana na susuligasiginiaqira igira ara kolae. Me pipi tana matsaraka aia e sangaau mau gini madodo na rongomiana na omea aia ke sasaniginiau.

Linge 102:20

Aia e rongominogoa niqira kukungu igira ara totu tana vale sosori, me nusigira lê igira ara pede vanigira nogo laka kara matesigira.

Daniel 9:24

“God e titinogoa laka e kau goto ke vitu kalina vitu sangavulu na ngalitupa ti aia ke maurisigira nimu tinoni igoe ma nimu vera tabu, ma kara totu tanusi tania niqira sasi ma niqira nauseko. Sauba God ke padalegira niqira sasi, me ke turuvagini kakaia na pedegoto, me ke balo visutugua na Vale Tabu. Mi tana nauvaganana nogo ia ti God sauba ke manaliginia na omea o morosia tana bolebole ma na omea na propete e kate idanogoa.

Isaia 57:15

“Inau nogo na God tabu loki mau totu saviliu. Inau au totu i gotu vasau tana nauna tabu, mau totu goto i laoqira na tinoni ara totu palatsuna mara padasavia niqira sasi, gana kau kakaisia na tobaqira, ma kara gini mauri doutugua.

Isaia 49:9

Minau sauba kau tsarivanigira igira ara totu sosori, ‘!Kamu totu tanusi!’ Me vanigira igira ara totu tana rodo, ‘!Kamu rutsumai tana marara!’ Me sauba igira kara magemage vaga na sipi ara mutsamutsa i kelaqira na tetena;

Isaia 45:13

Inau segeniqu nogo au molo papada vania a Sirus ke naua na aqo au molovania, me ke mologotosigira na omea sui. Minau sauba kau gotoli vania pipi sui na sautu i tana aia ke liu bâ. Maia sauba ke logovisutugua na Jerusalem niqu verabau, me ke nusigira igira niqu tinoni ara totu sosori. Me tau gana ke adi vovolina na aqo iani, se ke gini tangi loki gana rongo. Tagara. Inau nogo na Taovia Susuliga Sosongo au tsaria na omea iani.”

Linge 34:18

Na Taovia e totu varangisigira igira e ponopala na tobaqira; me maurisigira igira ara padâ laka e utu vanigira nogo kara lia sa omea.

Linge 2:6

Me tsarivaganana vanigira, “Inau segeniqu nogo au turuvaginia aia au vilia ke lia na taovia tsapakae, mi Sion nogo tana niqu vungavunga tabu au molovania ke totu.”

Sepania 3:12

Rongona inau sauba kau mologira moa igira na tinoni ara totu palatsuna mara vô na kaekae, kara totu kalavata tana niqu vungavunga tabu, migira sauba kara dona na mai i koniqu, ma na nongiaqu kau sangagira.

Linge 2:2

Igira na taovia tsapakae ni lao eni ara tû, mara vangarau segeniqira nogo, migira sui na tagao ara vorogokona sai na tukapusiana na Taovia, ma na tukapusiana goto na taovia tsapakae aia e vilinogoa.

Ioane 1:41

Ma Adrea e ba reia a Simone na tasina me tsarivania, “Ami tsodovulagia na Mesia.” Ma na rongona na goko “Mesia”, e vaga moa “Na Kristo”, ma na rongona na goko “Kristo” e vaga moa “Aia kesa God e vilia.”

Mateo 12:20

Me sauba ke tsalapo dou moa vanigira igira ara maluku lee, me ke sangadougira igira e tagara kesa ke sangagira. Me sauba ke berengiti me ke tukakai babaa, poi tsau kalina aia ke managana, migira na tinoni sui kara naua na omea vaga God e kilia kara naua.

Linge 51:17

Ngiti niqu kodoputsa aia nogoria niqu molotsunali segeniqu i matamu igoe niqu God; me utu igoe ko sove tania kesa aia e molotsunali segenina me pilotoba tanigira nina sasi.

Sekaria 11:11

Me vaga ia, ma na taso ia e luvu lê tana dani nogo ia. Migira ara vovoli mara tsabiri sipi ara bungutiau moa inau, mara donaginia laka na Taovia e goko vanigira nogo tana omea inau au naua.

Esekiel 9:4

“Ko liuvia na Jerusalem popono, mo ko moloa kesa na padapada tana raeqira igira sui ara gini melu mara padasavi tana rongoqira na omea marasibiga sui ara laba i laona na verabau iani.”

Isaia 66:2

Inau segeniqu nogo au vusagira na omea sui. Minau au reingaogira bâ igira ara totu palatsuna, mara padasavia niqira sasi, mara kukuni taniau, mara rongomangaqu.

Tuturigana 3:15

Me sauba kau naua ma kamu ka vaireisavigi kagamu igoe ma na daki; ma na dalena aia ma na dalemu igoe sauba kara ka vaigalagi sailagi. Ma na dalena aia sauba ke tsogori rutua na lovamu, migoe sauba ko gatia na bobouna na tuana.”

Aqoaqo 4:27

“Me laba saikesa vaga nogo, kalina kaira a Herod ma Pontius Pilate ara ka labasai tana vera loki iani, kolugira na tinoni ni Israel ma na tinoni ni veratavosi goto, mara voroa gana mate a Iesu na Dalemu Tabu, aia o vili segenimu nogo ke lia na Mesia.

Linge 45:7

Igoe o reingaoa na omea e goto mo reisavia na omea e seko. Aia nogoria na rongona ti aia God nimu God e viliginigo igoe me ninaginigo na oela na mage liusigira sui na taovia tsapakae tavosi.

2 Turupatu Dato 34:27

mo gini padasavi sosongo nogo, mo molotsunali segenimu i mataqu inau, mo ratsivotâ na polomu mo ngangai kalina igoe o rongomia laka sauba kau kede koeguania inau na Jerusalem migira na tinoni i laona. Minau au rongominogoa nimu nonginongi,

Mateo 12:18

“Iani nogoria niqu maneaqo au vilinogoa, aia au galuve sosongolia, me gini dou sosongo tobaqu na reiana. Sauba inau kau moloa niqu Tarunga i konina aia, maia sauba ke katevulagigira na omea inau au kilia kara naua igira na tinoni tana vera sui.

Luka 4:17

migira ara sauvania na papi e marea a Isaia na propete. Maia e adia me vuresia, me reia na nauna tana ara marea na tsaqina goko vaga iani, me tsokoa vanigira:

Aqoaqo 4:26

Igira na taovia loki ni lao eni ara vangarau manogati segeniqira, migira na tagao sui ara saikolu, gana ti kara tukapusia na Taovia God ma nina Mesia.’