Luka 13:34 - Ghari

³⁴ “!Jerusalem, Jerusalem! !Igira na tinoni i laomu igoe ara labumatesiigira na propete, mara taimatesigira nina mane adigoko God, aia e molomaigira vanigo! !Danga nogo kalina au ngaoa laka kau adisaigira nimu tinoni vaga moa na kudo kalina aia e sarosaigira na dalena tetelo i vavana na rapona, migoe o tau saikesa tamivaniau!

Luka 13:34 Referans Kwoze

Aqoaqo 7:52

Kamu soamaia na asana kesa vidaqira na propete igira na mumuamui ara tau rotasi sosongolia. Eo, ara labumatesigira igira sui nina mane adigoko God, aia God e molomaigira nogo i sau, kara katevulagia na maiana aia e kesa sauba ke rongomidou saikesalia na mangana. Mi kalina eni, igamu amu sauligia mamu labumatesia.

Isaia 30:15

Na Taovia God, aia na God tabu ni Israel, e tsarivaganana vanigira na tinoni, “Kamu pilovisumai ma kamu vataragi moa i koniqu inau, ma kamu totu rago moa, mi tana ti igamu sauba kamu gini susuliga visutugua ma kamu totu raviravi dou.” Migamu amu sove moa na rorongo.

Luka 23:28

Ma Iesu e pilo baa i koniqira me tsarivanigira: “!Daki ni Jerusalem, kamu laka na ngangaisiaqu inau! !Kamu ngangaisigamu segeni, migira goto na dalemui!

Luka 19:44

!Sauba kara vuipukaligo igoe, ma kara labu matesigira na toga i laomu, me ke tagara lelee goto ke kesa na vatuna na valemu ke totuvisu tana sasana, rongona igoe o tau nogo reigadovia na tagu kalina God e mai me tsigovigo!”

Sekaria 1:4

Igamu kamu laka na usuliaqira na mumuamui. I sau igira na propete ara kate vanigira na mumuamui niqu goko, mara raigira kara mololea na mauri tana sasi. Migira ara sove saikesa na rongomangaqu, mara nausasi babâ moa.

Hosea 11:7

Ara padakuti matena kara piloligi taniau inau. Migira sauba kara ngangai rongona e ngoligira na kalagai mamava ara kalagaia tana kokoveqira, me ke tagara goto ke kesa ke tsebaligia i koniqira.

Hosea 11:2

Danga sosongo tagu inau au soâ, maia e pipiloligi taniau moa. Igira niqu tinoni ara ba savori-kodoputsa vania Baal, mara kodoa na bulungai uruuru vanigira na god peropero.

Jeremia 6:16

Na Taovia e goko me tsarivanigira nina tinoni, “Kamu tû i tana ara labasai na sautu, ma kamu papada dou laka iava na sautu i tana amu ngaoa na muriana. Kamu lavea na sautu ni oka ara muria igira na mumuamui. Aia nogo na sautu dou bâ. Kamu muritaonia aia, me sauba kamu totu tana rago.” Migira ara tsaria, “!Tagara, igami ami sove!”

Jeremia 2:30

Inau au kedegamu, me tau lelê pelugamu rongona igamu amu tau ngaoa kau gotosigamu. Mamu tû mamu matesigira sui nimui propete, vaga saikesa moa na laeone veveiga.

Linge 36:7

!Igoe God, e loki tsapakae nomoa nimu galuve vo oli! Migami sui nimu tinoni ami dona kami ba totu raviravi i vavana na rapomu igoe.

Nina Papi Ko Rut 2:12

Na Taovia ke sauvanigo na peluna nimu aqo sui igoe o naugira. !Ma na Taovia na God ni Israel, aia igoe o mai totu vataragi i konina, aia nogo ke sauvanigo na matena popono nimu aqo dou!”

Mateo 22:6

Me visana ara tuu, mara tangoligira nina maneaqo na taovia loki, mara ramitsigira mara labumatesigira.

Mateo 22:3

Mi kalina aia e vangaraugira sui nogo pipi na omea, maia e molovanogira nina maneaqo kara baa, ma kara soamaigira igira sui aia e viligira nogo kara mai na totogoro tana kavomutsa. Migira sui ara sove na mai.

Tangitangi 1:16

“Aia nogo na rongona ti e gini sarara tsuna na kô na mataqu. Me tagara goto ke kesa tangomana ke vereau se ke malagaisiau. Igira gaqu gala ara tuliusiau nogo, migira niqu tinoni ara tau goto tamanina sa omea.

Isaia 50:2

“?Kalina inau au mai na laveamui ma na rongona gua ti au tau reia sa tinoni? ?Mi kalina inau au soagamu, ma na rongona gua ti amu tau gokovisu vaniau? ?Me laka amu padâ inau au maluku sosongo me tau tangomana kau maurisigamu? Bâ, minau tangomana kau goko moa me ke gini mamatsa na tasi, ma kau oligira na kô tatave ma kara lia na kaomate lê, ma kara gini viri mate na tsetse i laoqira rongona e mamatsa lê na kô.

Linge 91:4

Aia sauba ke tsavupoiginigo na rapona, migoe sauba ko totu raviravi dou i laona nina reitutugu aia; ma nina doulaka na Taovia sauba ke lia gamu tako me ke isutugumu.

Linge 81:13

!Ti vaga niqu tinoni kara rongomiau moa inau; ma kara naua na omea inau au ketsaligira kara naua!

Linge 57:1

Ko galuveau kiki niqu God, ko galuveau, rongona inau au mai kau toturavi i konimu. Tana auauna na rapomu igoe inau kau toturavi poi tsau ke puka na legai loki.

Nehemia 9:30

E danga nogo na ngalitupa igoe o berengiti na parovataviaqira. Mo mologira nimu propete kara goko vanigira, migira nimu tinoni ara tau goto rorongo, te igoe o tami vanigira na puku tavosi kara tangoligira.

Jeremia 35:14

Igira na kukuana a Jonadab ara muridoua nina vali kara laka na inu uaeni, me tsau mai nogo i dani eni me tagara goto sa vidaqira ke inu uaeni. Minau au totu matengana moa na goko vaniamui igamu, mamu tau goto rongomangaqu.

Jeremia 26:23

Migira ara bâ mara adivisumaia a Uria vania a Jehoiakim na taovia tsapakae, maia e ketsaligira kara labumatesia, ma na konina ara ba tsonia tana qiluqilu na vera.

Linge 149:2

!Kamu gini magemage igamu na Israel, rongona God nogo e aqosigamu; kamu gini mage loki igamu na toga ni Sion, tana rongona nimui taovia tsapakae!

Nehemia 9:26

“Migira nimu tinoni ara sove tanigo moa mara peamangamu; mara pilo tavamuri vania nimu Ketsa. Ara labumatesigira na propete igira ara sauparovata vanigira gana kara pilovisu tugua i konimu igoe. Me pipi kalina moa igira ara peago,

Na Vaolusi Ketsa 32:29

Ara tau tangomana kara reigadovia na rongona gua ti gaqira gala ara tuliusigira, mara tau goto tangomana kara padagadovia na omea vaga ia ara laba.

Na Vaolusi Ketsa 5:29

!Ke dou sosongo ti vaga igira kara papada vaga nomoa iani pipi tagu! Ma kara padalokiau inau, ma kara murigira pipi sui niqu ketsa, rongona ke gini vano dou sailagi pipi na omea sui vanigira igira, migira goto na kukuaqira.

Na Katemai 11:8

Ma ka koniqira kaira sauba kara ka tsaro lee tana sautu loki i levugana na verabau, i tana nogo ara pogalobatia ka gaqira Taovia tana gai ulutaligu. Ma na soa ara levaginia na verabau ia, aia nogoria Sodom, se Ejipt.

Aqoaqo 8:1

Me dou moa na tobana a Saul na rongona ara taimatesia a Stivin. Me tuu tana dani ia, igira popono na tinoni tutuni i Jerusalem ara tuturiga na tsodoana na rota loki tana rongona na lotu. Ara viri tsogo piriutsa bamai tana butona na momoru ni Judea mi Samaria. Igira segeni moa na apostolo ara tau tsogo mara totuvisu.

Aqoaqo 7:59

Mara taia babaa a Stivin, maia e soaa na Taovia me tsaria, “!Taovia Iesu, ko adia na tidaoqu!”

Luka 15:28

“Ma na tasina loki e kore loki sosongo, me sove na sage i vale. Ma na tamana e tsuna i tano, me soaa ke sage i vale.

Joel 2:23

“Kamu mage igamu na tinoni ni Sion, kamu gini magemage tana rongona na omea dou na Taovia nimui God e naua vanigamu. Aia e moloa ke tumu na usa tana taguna laka, me molomaia vanigamu na arausausa, vaga nogo tana idana.

Tangitangi 4:13

Me gini laba vaga ia tana rongona igira nina propete ara sasi sui, ma nina manetabu ara tsutsukibo tana matesileaqira na tinoni dou.

Linge 17:8

Ko reitutuguau vaga igoe o reitutugua na lakana matamu. Ko molopoiau tana auauna na rapomu,

Jeremia 35:17

Bâ, mi kalina ia, inau na Taovia Susuliga Sosongo, na God ni Israel, sauba kau alomaia i konimui, igamu na tinoni tana Juda mi Jerusalem, pipi sui na omea seko inau au vekenogoa. Eo, inau sauba kau naua na omea iani tana rongona igamu amu sove na rorongo kalina inau au goko vanigamu, mamu tau goto gokovisu vaniau kalina au soagamu.”