Linge 71:22 - Ghari

²² Inau sauba manana kau tsonikaego tana taiana vanigo niqu itai tatangi. Sauba kau tsonikaea nimu doulaka tsapakae igoe niqu God. Tana niqu itai tatangi nogo inau, sauba kau gini linge vanigo igoe na God ni Israel igoe o tabu loki manana.

Linge 71:22 Referans Kwoze

2 Taovia Tsapakae 19:22

?Masei sagata nomoa igoe o peâ mo tsiria? Igoe o tau saikesa kukuni taniau, inau na God tabu loki ni Israel.

Linge 33:2

Taia nimui tuqulu ma kamu soadoua na Taovia. Linge vania tana itai tatangi.

Linge 89:18

Igoe nogo Taovia o vilia vanigami aia kesa ke reitutugugami; igoe na God Tabu ni Israel, igoe nogo o tusuvanigami gamami taovia tsapakae.

Isaia 60:9

Igira nogo na vaka ara maimai talu tana momoru ao, mara adivisumaigira tugua nina tinoni God, kolugotoa danga na siliva ma na qolumila, gana na tsonikaeginiana na asana na Taovia, na God Tabu ni Israel, rongona aia e naua migira na puku sui ara padalokigira nina tinoni.

Isaia 57:15

“Inau nogo na God tabu loki mau totu saviliu. Inau au totu i gotu vasau tana nauna tabu, mau totu goto i laoqira na tinoni ara totu palatsuna mara padasavia niqira sasi, gana kau kakaisia na tobaqira, ma kara gini mauri doutugua.

Isaia 12:6

!Igamu sui amu totu i Sion kamu gudato tana mage ma kamu linge! Rongona nimui God tabu igamu na Israel e loki tsapakae, me totu nogo i laomui igamu nina tinoni.”

Isaia 5:24

Bâ mi kalina ia, sauba kamu mate vaga nogo na gai e mabulu nogo na lamuna, mara dudu sui na rauna. Ma na mate ia sauba ke laba tsaku sosongo vanigamu vaga nogo na iruna na lake e lautsakua na buruburu makede, rongona igamu amu sove taninogoa na omea na Taovia Susuliga Sosongo, aia niqira God tabu na Israel, e sasaniginigamu.

Linge 144:9

Niqu God, sauba kau lingena vanigo kesa na linge vaolu; sauba kau gini sinagi vanigo na itai tatangi ma kau linge vanigo.

Linge 98:3

E manalinogoa nina veke e nauvanigira na toga ni Israel ma nina galuve vanigira e totu kalavata me vô ke oli. Migira na tinoni pipi tana nauna sui ara reia kalina e managana nida God.

Mika 7:20

Me sauba ko sauvulagia nimu tobalaka ma nimu galuve vo oli vanigira nimu tinoni, igira ka kukuaqira kaira a Abraham ma Jakob, vaga nogo igoe o vekea vanigira na mumuamami i sau.

Isaia 43:3

Rongona inau na Taovia nimui God, na God tabu ni Israel minau nogo au laumaurisigamu. Kalina igamu amu totu moa tana limaqira gamui gala, inau au tusugira na Ejipt, ma na Sudan, ma na Seba, na tugumui, rongona igamu kamu gini totu tanusi.

Isaia 5:19

Mamu tsaria, “Ke tsaku na Taovia me ke manalia na omea aia e tsaria laka sauba ke naua, ma ka morosiginia. Molovania na God tabu ni Israel ke naua na omea aia e padâ; ma ka gini reia na omea aia e vangaraua na nauana.”

Isaia 5:16

Ma na Taovia Susuliga Sosongo e sauvulagia gana loki tsapakae tana nauana moa na omea e gotolaka, maia e gini molo labatia laka aia e tabu loki tana pede gotosiaqira nina tinoni.

Linge 138:2

Au tsuporu vanigo i matana nimu Vale Tabu, mau tsonikaea na asamu rongona igoe o mana vaniau ma nimu galuve e vo oli; mo sauvulagia vaniau laka na asamu igoe, migira sui nimu ketsa, ara loki tsapakae.

Linge 89:1

Taovia, inau sauba kau lingena sailagi tana rongona nimu galuve vo oli; ma kau katevulagia na manana nimu doulaka saviliu na dani ma na dani.

Linge 78:41

Na dani ma na dani igira ara tau goto kuti na tovoleana God, mara molorota vania aia na God Tabu Loki ni Israel.

Linge 56:4

Au norukakaia moa God mau tau matagu; au tsonikaea rongona na omea aia e vekenogoa vaniau. ?Me vaga ia, ma na seko gua tangomana kesa na tinoni lê moa ke nauvaniau inau?

Linge 25:10

Pipi sui nina sautu na Taovia ara pukuga tana manana ma na galuve, vanigira ara manalia niqira vaitasogi ara naukolua aia, mara muridougira nina ketsa.

Roma 15:8

Inau au tsarinogoa vanigamu laka a Iesu Kristo e mai rongona ke sangagira na Tsiu, me ke gini sauvulagia vanigira laka God e mana, me ngaoa na manaliana na veke aia e nauvanigira na mumuaqira i sau,

Linge 43:4

Mi tana ti sauba inau kau ba tû i matana nimu belatabu igoe niqu God, igoe nogo na pukuna niqu magemage. Me sauba kau taia niqu itai tatangi ma kau lingena na tsonikaeamu, igoe God mo niqu God.

Linge 98:4

!Igamu sui tana barangengo popono, kamu gudato vania na Taovia tana magemage; kamu tsonikaea me ke tangidato nimui linge na magemage!

Linge 98:5

!Linge na tsonikaeana na Taovia! !Taigira na itai tatangi!