Linge 53:6 - Ghari

⁶ Inau au amesi sosongolia laka ke kesa ke talumai i Sion maia ke laumaurisigira na tinoni ni Israel. !Sauba kara mage loki sosongo nomoa igira na tinoni ni Israel kalina God ke naua me ke dou visutugua niqira mauri!

Linge 53:6 Referans Kwoze

Linge 14:7

Inau au amesi sosongolia ke talu mai i Sion ke kesa aia ke laumaurisigira na tinoni ni Israel. !Eo, me sauba kara mage loki sosongo igira na toga ni Israel kalina aia na Taovia ke naua me ke dou visutugua niqira mauri!

Jeremia 30:18

Na Taovia e tsaria, “Inau sauba kau adivisugira tugua niqu tinoni i laona niqira kao, ma kau galuvegira pipi sui na tamadale. Maia na verabau ni Jerusalem sauba kara logo vaolusitugua, ma kara vaturikae visugotoa na valena na taovia tsapakae.

Isaia 12:6

!Igamu sui amu totu i Sion kamu gudato tana mage ma kamu linge! Rongona nimui God tabu igamu na Israel e loki tsapakae, me totu nogo i laomui igamu nina tinoni.”

Isaia 14:32

?Sauba ka tuguvisu koegu nia niqira goko na Pilistia ara mai nongigita ka sangagira? Sauba moa igita ka tsarivanigira laka na Taovia e vaturikakainogoa na verana i Sion, migira nina tinoni ara totu tana rota sauba kara ba totu raviravi dou i tana.

Linge 85:1

Taovia igoe o galuve sosongolia nimu kao; mo naua migami na Israel ami douvisutugua.

Nehemia 12:43

Mi tana dani ia ara savorigira danga na kodoputsa, migira na tinoni sui ara mage loki sosongo, rongona God nogo e naua mara gini magemage loki vaga ia. Migira na daki ma na baka ara sanga goto tana mage loki ia, ma na gala leleo ara naua e tugua kara rongomia igira na tinoni tana vera ao.

Amos 9:14

Inau sauba kau adivisugira tugua niqu tinoni tana niqira kao. Me sauba kara logovisugira niqira verabau ma kara totuvigira; sauba kara tsukâ niqira uta na uaeni ma kara inuvia na uaenina, sauba kara aqoa niqira uta ma kara gania na vuana na omea ara tsukâ.

Joel 3:1

Na Taovia e tsaria: “Mi tana tagu ia, inau sauba kau naua ma kara tamani omea danga tugua igira na tinoni tana Juda mi Jerusalem.

Jeremia 31:23

Na Taovia Susuliga Sosongo, na God ni Israel, e tsaria, “Kalina inau kau adivisugira na tinoni tana niqira kao segeni, mi tana ti igira na tinoni ara totu tana vera sui i laona na butona kao popono tana Juda, sauba kara tsaritugua na goko vaga iani, ‘Na Taovia ke tabua na tetena tabu ni Jerusalem, na nauna i tana aia e totu.’

Linge 50:2

Na mararana God e talumai tû i Sion, aia na verabau e dou laka na rereina.

Nina Papi A Job 42:10

Mi murina kalina a Job e nonginongi sui tu mateqira tugira gana duli, ma na Taovia e naua me gini tamani omea danga tugua, me pabovanigotoa ruka kalina na dangana na omea vaga aia e tamanigira nogo tana idana.

Esra 3:11

Ara linge na tsonikaeana na Taovia mara gini gokovisu na tsaqina goko vaga iani: “Na Taovia e dou sosongo, ma nina galuve vanigira na Israel e totu saviliu me vo oli.” Migira sui ara linge mi gotu na lioqira mara tsonikaea na Taovia, rongona e tuturiga nogo na aqo na molo papakana na Vale Tabu.

Aqo Manetabu 26:17

Inau sauba kau piloligi tanigamu, migira gamui gala kara tuliusigamu lê. Migira ara reisavigamu sauba kara tagaovi kaputigamu. Migamu sauba kamu matagu loki sosongo, ma kamu tavongani tsogo lê kalina ke tau vati takuvigamu moa ke kesa.

Aqo Manetabu 26:36

“Me sauba inau kau naua, migamu amu totu tsinogo sauba kamu gini matagu loki sosongo kalina kamu rongomia na rerekena na rau e uvia na guguri, ma kamu viri tsogo lê. Ma kamu ulo vaga moa kalina ti kara takuvigamu tana tagu na vailabu, me sauba kamu viri puka lê kalina e tagara goto sa gamui gala ke varangisigamu.

Goko Tabana 28:1

Igira na tinoni vanga tsutsukibo ara dona na tsogo kalina e tau takuvigira kesa, ma na tinoni e gotolaka nina sasaga e malagai vaga na laeone.