Joel 2:17 - Ghari

¹⁷ Migira na manetabu ara aqo vania na Taovia tana pakoka i ka levugaqira na belatabu ma na matsapana na Vale Tabu, niqira aqo kara ngangaidato vania na Taovia ma kara nongia, “Taovia ko galuvegira nimu tinoni. Ko laka na tamivaniaqira na tinoni tavosi kara peagami, ma kara kiataginigami, ma kara tsaria, ‘?Laka iava nimui God igamu?’ ”

Joel 2:17 Referans Kwoze

Esekiel 8:16

Maia e adivanoau tana pakoka i matana na Vale Tabu. Mi tana ligisana na mani sage bâ tana Nauna Tabu, mi tana ka levugaqira na belatabu ma na mani sage bâ ara totu rukapatu tsege na mane. Ara pilo tavamuri vania na Nauna Tabu, mara tsuporu tsuna kalea tabana i longa, mara samasama vania na aso kalina e botsa vaolu.

Linge 115:2

?Egua vaga ti igira na puku tavosi ara veisuagita mara tsaria, “?Laka iava e totu nimui God igamu?”

Linge 79:10

?Ara gua vaga igira na puku tavosi te ara tû mara veisuagami igami, “?Laka iava e totu nimui God igamu?” Taovia, ko tamivanigami ma kami reia kalina igoe ko kedegira na puku tavosi tana rongona ara reoa na gabuqira nimu maneaqo.

Mateo 23:35

Eo, me sauba ke gado i konimui igamu na kede matena na gabuqira pipi tinoni dou sui ara labumatesigira, tuu konina a Abel na mane dou sosongo, me ke tsau baa tana mateana a Sakaria, na dalena a Berakia, aia igamu amu labumatesia ka levugaqira na Vale Tabu ma na bela na mani kodoputsa.

Amos 7:2

Mau morosigotoa na kipo ara tuturiga na gani suiana pipi na omea marao ara dato i laona na kao popono. Mi tana, minau au gudato mau tsaria, “!Taovia God ko padalea niqira sasi nimu tinoni! ?Kara koegua vaga ti kara gini mauri igira nimu tinoni? !Igira ara tetelo lê sosongo mara maluku saikesa!”

Joel 1:9

Me tagara goto sa uiti se sa uaeni agana na savoriana tana Vale Tabu. Migira na manetabu ara gini tangitangi rongona ara tau goto tamanina sa omea kara savori vania na Taovia.

Hosea 14:2

Kamu visumai i konina na Taovia, ma kamu tsaria na nonginongi iani ngiti sausau vania: “Kiki Taovia, ko padalegira sui nimami sasi, mo ko tabedoua nimami nonginongi, migami sauba kami tsonikaego vaga ami veke vanigo nogo i sau.

1 Taovia Tsapakae 6:3

Ma na kovokovo i matana na Vale Tabu e sangava ruka tinaqe ruka labu tsege na mangasana, me sangava vati tabailima na damana, ma na damana e atsa kolunogoa na damana na Vale Tabu.

Binaboli 34:9

Me tsaria, “Taovia, ti vaga igoe o reingaoau manana inau, mau nongigo ko dulikolugami mo ko reitutugugami i sautu. Eo, e manana nomoa laka na tinoni girani ara tsatsarae sosongo, me atsa moa e vaga Taovia, migoe ko padalegira moa na omea seko ami naua, ma nimami sasi, mo ko tabegami moa vaga nogo nimu tinoni segeni.”

Mika 7:10

Mi tana ti igira gada gala kara reia e laba vaga ia, me sauba kara gini vangamâ lê, igira nogo ara gilu gada tana idana mara veisuagita vaga iani, “?Laka iava e totu aia na Taovia nimui God?” Migita sauba ka reia kalina na Taovia ke tsogori pukaligira, ma na tinoni kara tsotso i kelaqira vaga moa ti na boko tana sautu.

Amos 7:5

Mi tana minau au gudato mau tsaria, “!Taovia God ko laka! ?Kara koegua vaga ti kara gini mauri igira nimu tinoni? !Igira ara tetelo lê sosongo mara maluku saikesa!”

Esekiel 20:9

Mau tau moa nauvanigira sa omea, rongona au tau ngaoa ke tangiseko na asaqu i mataqira na tinoni i tana igira ara totu, rongona igira ara rongominogoa kalina inau au veke vanigira moa na Israel laka sauba kau adirutsumigira tania na Ejipt.

Isaia 37:20

Mi kalina ia, Taovia nimami God, ko laumaurisigami tania na limaqira na Asiria, mi tana ti igira na puku sui tana barangengo popono sauba kara donaginia laka igoe segeni moa o God mana.”

Linge 89:51

!Taovia, igira gamu gala ara vaitsirigana na taovia tsapakae igoe o vilinogoa! Ara gokotsiri vania moa pipi tana nauna tana aia e liu bâ.

Linge 89:41

Migira sui ara liu i tana ara komigira nina omea levolevo; migira sui ara totu tana vera varangi ara reivaganana ia mara kiataginia.

Linge 79:4

Igira sui na puku tavosi ara totu poligami ara peagami mara kiataginigami mara tsirigami.

Linge 74:10

?God, sauba ke oka koegua igira gamami gala kara kiataginigo igoe? ?Se laka kara totu matengana sailagi moa na soa sekoliana na asamu igoe?

Linge 42:10

Ara bingiginiau sosongo niqira goko peapea, mara totu matengana moa na veisuaqu sailagi, “?Laka iava e totu nimu God igoe?”

2 Turupatu Dato 8:12

Ma Solomon e savorigira na kodoputsa vania na Taovia tana belatabu aia e logonogoa i matana na Vale Tabu.

Na Vaolusi Ketsa 32:27

Mau tau moa ngaoa igira gaqira gala kara gokokae ma kara tsaria laka igira nogo ara tuliusigira niqu tinoni, kalina inau segeniqu nogo au kedegira.’

Mateo 27:43

Aia e norua God, me tsarisegenina laka aia na Dalena God. !Eo, vaga ia, ma ka reia ti God ke maurisia kalina ia!”

Malaki 1:9

Bâ, mi kalina ia, migamu nogo na manetabu, kamu tovoa na nongiana God ke tobadou vanigita igita nina tinoni. ?Me ti aia God ke tau goto rongomia nimui nonginongi igamu, masei nina sasi? Ma nimui sasi nogo igamu.

Nehemia 9:36

Mi kalina ia igami ami totu tseka moa i laona na kao igoe o sauvanigami, tana kao lakataga nogo iani e sauvanigami gamami mutsa.

Joel 1:13

Migamu na manetabu amu aqo tana na belatabu, kamu sageligira nimui polo baubau papadana na melu ma kamu ngangai. Kamu vano tana Vale Tabu ma kamu tangitangi tana bongi popono. E tagara lelê goto sa mutsa se sa uaeni gana na savorivaniana nimui God.

Linge 42:3

Na dani ma na bongi inau au ngangai moa, ma na kô na mataqu e lia gaqu mutsa; pipi kalina moa ara veisuaau igira gaqu gala mara tsaria, “?Laka iava e totu nimu God igoe?”

2 Turupatu Dato 7:20

mi tana, minau sauba kau tsialigigamu tania na kao au saunogoa vanigamu, me sauba kau vanoligi tanigotoa na Vale Tabu iani inau au vasini moa baloa ke lia na nauna i tana kara mai samasama vaniau igira na tinoni. Migira na tinoni pipi tana nauna sui sauba kara gilugana ma kara tsiria na Vale Tabu iani.

1 Taovia Tsapakae 9:7

mi tana minau sauba kau tsialigigira niqu tinoni ni Israel tania na kao inau au saunogoa vanigira. Me sauba kau vanoligi tanigotoa na Vale Tabu iani aia au vasini baloa ke lia na nauna i tana kara mai samasama vaniau igira na tinoni. Migira na tinoni pipi tana nauna sui sauba kara gilugamu igamu na Israel ma kara peagamu lê.

Na Vaolusi Ketsa 28:37

Migira na tinoni i laoqira na vera i tana sauba na Taovia ke sarangasigamu bâ sauba kara gini beke na reiana na omea seko vaga ara laba vanigamu; ma kara kiataginigamu ma kara tsirigamu.

Tsoko Tinoni 25:6

Me kesa na mane i laoqira na tinoni ni Israel e tû me adisagea i valena kesa na daki ni Midian i matana a Moses migira na saikolu popono, kalina igira ara tangitangi tana matsapana na Valepolo i tana e totu na Taovia.

Isaia 22:12

Mi tana tagu ia ma na Taovia God Susuliga Sosongo e nongigamu kamu ngangai ma kamu tangitangi, ma kamu tsara koakoa na lovamui, ma kamu sagelia na polo baubau papadana na melu.

Josua 7:9

!Eo, migira sui na tinoni ni Kanaan, ma na tinoni tavosi sui ara totu i laona na butona kao ia, sauba kara rongomia na omea vaga ia e laba. Me sauba kara mai ma kara tupoligami ma kara matesigami sui lakalaka! ?Migoe ma nagua sauba ko naua gana ko dilaginia na tangisekona na asamu?”

Linge 42:4

E seko manana nomoa na tobaqu kalina au padavisugira na omea ara laba i sau, kalina au dulikolugira na toga mami bâ tana valena God mau idana sautu vanigira kalina ami vavano i tana, migira na toga ara magemage mara lilinge mara gudato tana tsonikaeana God.

Linge 42:11

?Megua vaga inau ti au melu sosongo vaga ia? ?Megua vaga ti e ponopala sosongo na tobaqu? Sauba kau noru saikesalia moa niqu God, ma kau tsonikaetugua aia niqu vagamauri ma niqu God.