Jeremia 51:5 - Ghari

⁵ Minau na Taovia God Susuliga Sosongo au tau tsonikidaqira na Israel ma na Juda, atsa moa ti igira ara totu i laona na Babilon ara sasi sosongo i mataqu inau na God Tabu Loki ni Israel.

Jeremia 51:5 Referans Kwoze

Sekaria 12:8

Mi tana tagu ia, ma na Taovia sauba ke reitutugira igira ara totu i Jerusalem, me ke susuligasigira, me atsa moa igira ara labelabeaga lê i laoqira, migira goto sauba kara susuliga vaga moa a David i sau. Migira na kukuana a David sauba kara tagaovidougira vaga moa nina angelo na Taovia, me vaga goto moa God segeni nogo.

Sekaria 12:6

“Mi tana tagu goto ia, minau sauba kau naua migira na duli tana Juda kara lia vaga na lake loki i laona na gamosa, se i laona na uta na uiti ganoga. Migira sauba kara toroutsanigira sui lakalaka na puku tavosi ara totu varangi. Migira moa na tinoni ni Jerusalem sauba kara totu raviravi dou i laona niqira verabau.

Hosea 4:1

Na Taovia e ngaoa ke taimataqira na tinoni ara totu i laona na kao iani. Rorongo dou igamu na Israel tana omea God e tsaria: “I laona na kao popono iani na tinoni ara tau dona na tobasai ma na vaigaluvegi, mara tau goto reigadovia laka inau nogo niqira God.

Sekaria 2:12

Eo, na Taovia sauba ke tango livisutugua na Juda, aia e totu tana Israel me ke lia tugua nina tamani segeni, me ke galuve sosongolia bâ na verabau ni Jerusalem liusigira pipi na vera sui.

Mika 7:20

Me sauba ko sauvulagia nimu tobalaka ma nimu galuve vo oli vanigira nimu tinoni, igira ka kukuaqira kaira a Abraham ma Jakob, vaga nogo igoe o vekea vanigira na mumuamami i sau.

Mika 7:18

Me tagara goto sa god ke vaga igoe Taovia; igoe o padale vanigira niqira sasi nimu tinoni igira ara kauvisu. Mo tau goto dona na tangoli okaana nimu kore, mo gini mage moa na sauvulagi vaniamami nimu galuve vo oli.

Hosea 1:10

Migira na tinoni ni Israel sauba nomoa kara danga vaga na one i tasi, me ke utu na tsokoraeaqira se na tovoaqira. Mi kalina eni God e tsarivanigira “Igamu amu tau niqu tinoni inau.” Eo, me maimai nogo na dani i tana aia sauba ke tsarivanigira, “Igamu na dalena na God mamauri!”

Esekiel 9:9

Ma God e gokovisu me tsaria, “Igira na toga tana Israel ma na Juda ara gini loaga na sasi loki sosongo. Ara naua moa na labumate i laona na kao popono, mara dangaliginia na Jerusalem niqira tsutsukibo. Mara tsarigotoa laka inau na Taovia au vanoligi nogo tania na veraqira, me laka au tau saikesa nogo morosigira.

Esekiel 8:17

Ma na Taovia e veisuaau goto, “?Dalena tinoni igoe, laka o morosia na omea ara naua igira? Na tinoni ni Juda girani ara tau moa gini vatsa na nauana pipi na omea marasibiga igoe o morosinogoa ieni, ma na tangopeke seko ara naua bamaia i laona na butona kao popono. Tagara. Ara mai naugira goto ieni i laona saikesa nogo na Vale Tabu, me naua mau gini kore loki sosongo bâ. Ko reigira bâ igira ara pea sosongoliau, mara pada laka na omea lê ngatsu inau te ara naugira na omea marasibiga vaga gira.

Jeremia 50:20

Mi kalina ke labamai na tagu ia, tagara goto sa sasi kara tsodoa tana Israel, me tagara goto sa tsutsukibo tana Juda, rongona inau sauba ka padalea niqira sasi igira na tinoni inau au gaenogoa na mauriqira. Inau nogo na Taovia au tsaria na omea iani.”

Jeremia 46:28

Igamu na Israel, igamu niqu tinoni, kamu laka na matagu rongona inau nogo au totu kolugamu. Sauba kau toroutsanigira saikesa pipi sui na puku tavosi i tana inau au sarangasigamu, migamu moa e utu kau toroutsanigamu saikesa. E mana, sauba nomoa kau kedegamu, mi kalina kau kedegamu ma kau naua moa tana pedegoto. Inau nogo na Taovia au tsaria na omea iani.”

Jeremia 31:37

Me ti vaga kesa dani kara tangomana na tovoana na katsina na masaoka, ma na liuvi tovuana na papakana na barangengo, mi tana moa ti inau kau sove tanigira na tinoni ni Israel tana rongona na omea tabaruga sui ara naugira. Inau nogo na Taovia au tsaria na omea iani.”

Jeremia 23:15

“Me vaga ia, miani nogo na omea inau na Taovia Susuliga Sosongo au katea tana rongoqira igira na propete ni Jerusalem: Inau sauba kau palaginigira na kusa vavai kara gania, ma kara inuvia na tabatu, rongona igira nogo ara rasavaginia na sasaga ponotoba i laona na kao popono iani.”

Jeremia 19:4

Minau sauba kau naua na omea iani tana rongona igira na tinoni ara piloligi taniau inau, mara naqugasia na nauna ieni tana savoriaqira na kodoputsa vaniaqira na god peropero, na god igira na mumuaqira, migira goto na taovia tsapakae tana Juda, ara tau goto donaginigira i sau. Ara dangaliginia na nauna iani na gabuqira na tinoni dou ara tau tsukia sa sasi,

Jeremia 16:18

Sauba kau paboa ke ruka kalina na kedena niqira sasi ma niqira tsutsukibo, rongona ara dangaligini poponoa mara naqugasiginia niqu kao niqira titinonina na god peropero, igira na kubu lê moa vaga saikesa nogo na kubuna tinoni mate.”

Isaia 62:12

Me sauba kara soaginigamu, “Igira Nina Tinoni Tabu God,” “Igira na Tinoni na Taovia e Suivisugira nogo.” Ma na Jerusalem nimui verabau sauba kara soaginia “Na Verabau God e Reingao Sosongolia,” “Na Verabau Aia God e Tau Tsonitsunâ.”

Isaia 44:21

Na Taovia e tsarigotoa, “Igamu na Israel, na kukuana a Jakob, kamu padatugua na omea iani. Kamu padatugua laka igamu niqu maneaqo inau. Inau nogo au vusagamu gana kamu lia niqu maneaqo, me utu saikesa kau padalegamu.

Linge 94:14

Na Taovia sauba e utu ke mololegira nina tinoni; me utu goto ke tsonilegira igira aia e tamanigira.

Esra 9:9

Igami ami totu tseka rago, migoe o tau moa mologami kami totu tseka kalavata. Igoe nogo o naua, te igira na taovia tsapakae ni Persia ara tobadou vanigami, mara tamivanigami na visumai ma na logo visutuguana nimu Vale Tabu aia e toroutsa saikesa nogo, ma kami totu raviravi dou ieni tana Juda mi Jerusalem.

1 Samuel 12:22

Na Taovia e gini vatsa me vekenogoa laka e utu goto ke piloligi tanigamu, rongona tana nina padangao segeni nogo ia te aia e viligamu mamu lia nina tinoni segeni.

2 Taovia Tsapakae 21:16

Maia Manase e labumatesigira ara danga sosongo na tinoni dou, me gini dangadato na gabu tana sautu popono ni Jerusalem. Me naua na omea vaga ia, me gini pabogotoa nina raqa sasiliaqira na tinoni ni Juda tana samasama vaniaqira na god peropero, me naua migira sui ara sasi i matana na Taovia.

1 Taovia Tsapakae 6:13

Sauba inau kau totu i laoqira niqu tinoni ni Israel i laona nogo na Vale Tabu iani igoe o logoa, me utu goto kau vanoligi tanigira.”

Hosea 4:2

Igira ara vekeragoa vaniau, mara tau moa dona na manaliana na omea ara vekea; ara dona moa na peropero, ma na labumate, ma na komi, ma na kiboga. Eo, na tangopeke seko ara dato babâ moa i laoqira, ma na labumate ara puka vaimurigi.

Isaia 51:15

“Inau nogo na Taovia nimui God. Inau nogo au vulokaea na tasi, mau naua mara karara na panuna. !Na Taovia Susuliga Sosongo aia nogo na soaqu inau!

Jeremia 14:9

?Megua goto ti o vaga moa na tinoni e ponopala tobana, me vaga na mane vaumate e tau nogo susuliga na tuliusiaqira na gala? !Igami ami tutunina nomoa laka igoe Taovia o totu moa kolugami! Igami nimu tinoni nogo, mami nongigo ko laka na tsonikidamami.’ ”

Jeremia 14:19

?Taovia, laka igoe o sove saikesa tanigira na Juda? ?Laka o reisavigira manana na tinoni ni Sion? ?Megua ti o bokaligami sosongo vaga ia, me tau tangomana ke mavu visutugua na bokamami? Igami ami lavea moa na rago, me tau goto laba vanigami sa omea dou. Mami amesia laka kami totudoutugua, mara mai molo matagu vanigami moa igira na gala.

Jeremia 51:19

Maia nina God a Jakob e tau saikesa vaga gira. Aia nogo e aqosia pipi sui na omea, me viligira nogo na Israel kara lia nina tinoni segeni nogo ia. Na Taovia Susuliga Sosongo aia nogo na asana.

Hosea 2:1

Me vaga ia, migamu kamu soaginigira gamui verakolu na Israel, “Nina Tinoni God” ma “Igira na Tinoni na Taovia e Galuvegira.”

Hosea 2:3

Me ti vaga aia ke tau mololea nina sasaga tabaru, minau sauba kau tsoraligi vania na polona, me ke malaiole vaga moa tana dani aia e botsa. Minau sauba kau naua maia ke lia vaga na kaomate mamatsa, me ke gini mate na marou.