Jeremia 3:18 - Ghari

¹⁸ Igira na Israel sauba kara sai alaala kolugira na Juda, ma kara visumai tania na totu tseka tana butona momoru tabana i vava, ma kara visutugua tana kao inau au saunogoa vanigira na mumuamui, vaga nimui tamani pukuga.”

Jeremia 3:18 Referans Kwoze

Jeremia 31:8

Inau sauba kau adivisugira talu i vava ma kau adisaigira tugua ke tû tana e vosa na barangengo, igira sui lakalaka kolugira na koko ma na tuamatea, migira goto na daki titiana, migira e varavara kara vasusu. Eo, na alaala loki sosongo na tinoni sauba kara visumai.

Amos 9:15

Inau sauba kau tsukagira niqu tinoni tana kao inau au saunogoa vanigira, me sauba e utu goto kesa ke tangomana na vutiligiaqira tugua. Inau nogo na Taovia nimui God au tsaria na omea iani.”

Hosea 1:11

Migira na toga tana Juda ma na toga tana Israel kara sai tugua, ma kara lia kesa moa na puku loki. Ma kara vili vanigira segeni ke kesa moa gaqira ida. Me sauba tugua kara pabo babâ, ma kara tamani omea danga i laona niqira butona momoru segeni. !Eo, na danina a Jesreel sauba ke lia na dani loki manana!

Jeremia 50:4

Na Taovia e tsaria, “Mi kalina ke labamai na tagu ia, migira sui na toga ni Israel mi Juda sauba kara ngangai, ma kara laveau inau niqira God.

Jeremia 23:8

Tagara, me sauba kara gini vatsa tana asaqu inau vaga na God mamauri, aia e adirutsumigira na tinoni ni Israel tania kesa na butona kao tabana i vava, me tanigira goto na vera tavosi i tana inau au sarangasigira i sau. Mi muri, ti igira sauba kara totuvia niqira kao segeni.”

Jeremia 16:15

Tagara, sauba moa kara gini vatsa tana asaqu inau vaga na God mamauri aia e adirutsumigira na tinoni ni Israel tania na kao tabana i vava, migira sui goto na vera tavosi i tana inau au sarangasigira nogo. Me sauba kau adivisumaigira tugua tana niqira butona kao segeni, aia na kao inau au saunogoa vanigira na mumuaqira. Inau nogo na Taovia au tsaria na omea iani.”

Jeremia 3:12

Maia e tsarivaniau goto kau bâ ma kau tsarivania Israel, “Israel igoe o tau totukakai i koniqu, nimu aqo nomoa ko visumaitugua i koniqu. E utu goto kau kore vanigo, rongona inau au dona sosongo na galuve, me utu kau kore sailagi vanigo.

Sekaria 10:6

“Inau sauba kau susuligasigira na tinoni ni Juda, ma kau laumaurisigira na tinoni ni Israel. Sauba kau galuvegira ma kau adivisugira sui tugua i veraqira. Me sauba kara totudou vaga moa ti au tau nogo reisavigira. Inau nogo na Taovia niqira God, me sauba kau rongomia niqira nonginongi.

Hosea 11:12

Na Taovia e tsaria, “Igira na tinoni ni Israel ara barapoliginiau niqira goko peropero, migira na tinoni ni Juda ara sove taniau babâ moa inau na God mana saviliu ma na God tabu.

Jeremia 50:20

Mi kalina ke labamai na tagu ia, tagara goto sa sasi kara tsodoa tana Israel, me tagara goto sa tsutsukibo tana Juda, rongona inau sauba ka padalea niqira sasi igira na tinoni inau au gaenogoa na mauriqira. Inau nogo na Taovia au tsaria na omea iani.”

Jeremia 30:3

rongona e maimai varangi nogo na tagu i tana sauba inau kau vaturivisugira tugua igira niqu tinoni ni Israel mi Juda. Me sauba kau adivisumaigira tugua tana kao inau au saunogoa vanigira na mumuaqira, migira sauba kara aditamaniqira tugua. Inau nogo na Taovia au tsaria na omea iani.”

Jeremia 7:7

bâ, mi tana ti inau sauba kau tami vanigamu kamu mauri babâ ieni tana kao au sauvanigira nogo na mumuamui vaga nimui tamani pukuga nogo igamu.

Jeremia 50:5

Igira sauba kara veisuâ iava na sautu na vano i Sion, ma kara vano kalea i tana. Igira sauba kara naua kesa na vaitasogi saliu koluau inau, me utu goto kara kutsia.

Esekiel 11:17

“Bâ, mo ko turupatuna vanigira na omea inau na Taovia God au tsaria. Inau sauba kau adivisumaigira tanigira na butona momoru sui i tana inau sarangasigira bâ, me sauba kau sauvisu vanigira tugua na kao popono tana Israel kara tamanina.

Sekaria 2:6

Na Taovia e tsarivaganana goto iani vanigira nina tinoni, “Inau nogo au sarangasigamu ba vati tana tsukena na barangengo. !Mi kalina ia inau au ketsaligamu kamu tu lalaodo ma kamu tsogoligi tsaku tania na Babilon, ma kamu visumaitugua i Jerusalem.

Tuturigana 12:7

Ma na Taovia e laba vania a Abram me tsarivania, “Iani nogo na kao inau sauba kau sauvanigira igira na kukuamu.” Ma Abram e tû me logoa kesa na belatabu i tana vania na Taovia aia e laba vania.

Isaia 43:5

!Kamu laka goto na matagu, inau nogo au totu kolugamu! “Me ke tû tana butona momoru i longa ao, me tsau bâ i tasi ao, minau sauba kau adivisumaigira nimui tinoni.

Isaia 43:6

Sauba kau tsarivanigira igira i vava kara tamivanigira ma kara vano, ma kau tsarivanigira igira i ata kara laka goto na tangolivisuaqira. Igamu sui na tinoni amu totu tana momoru ao, kamu tamivanigira niqu tinoni kara visumaitugua, talu pipi sui tana nauna polia na barangengo.

Hosea 2:2

Ma God e tsonia na goko tabana tana rongoqira nina tinoni ni Israel kalina e tsarivaganana iani, “Igamu na dalequ, aia Israel na tinamui e tau nogo na tauqu, minau au tau nogo lia na savana. Kamu raia ke mololea nina aqo mala rebi ma na kiboga.