Jeremia 2:15 - Ghari

¹⁵ Igira ara kanga vaga moa ti na laeone, mara toroutsanigira pipi sui na verana, me tau goto totu sa tinoni i laoqira, mara sekolia nina kao popono, me gini lia vaga moa ti na kaomate.

Jeremia 2:15 Referans Kwoze

Jeremia 4:7

Vaga saikesa nogo kalina kesa na laeone e laba rutsumai tania na nauna i tana e taopoi, igira na gala ara mololenogoa na veraqira segeni mara maimai nogo i sautu. Ara mai gana kara toroutsania na Juda. Igira sui na verabau tana Juda sauba kara toroutsa saikesa, me ke tagara goto ke kesa ke totuvisu i laoqira.

Jeremia 50:17

Na Taovia e tsaria, “Igira na tinoni ni Israel ara vaga saikesa moa na sipi e takuvigira na laeone mara viri saranga bamai. Tana idana, aia na taovia tsapakae ni Asiria e baginigira, mi muri ma Nebukadnesar na taovia tsapakae ni Babilonia e suilavaginigira saikesa.

Jeremia 9:11

Ma na Taovia e tsaria, “Inau sauba kau toroutsania na Jerusalem, me ke lia na nauna i tana ara totu igira na pai atsi. Migira na verabau sui tana Juda sauba kara lia na kaomate, na nauna i tana e tau totuvia sa tinoni.”

Isaia 5:29

Migira na mane vaumate ara kanga loki vaga moa kalina na laeone e matesia kesa gana omea tuavati, me kalagaivanoa kesa tana nauna i tana e tau tangomana ke kesa ke ba lauligia i konina.

Isaia 1:7

Igira gamui gala ara toroutsani poponoa nimui butona kao, mara tungigira sui nimui verabau. I matamui nogo igamu, igira na tinoni ni veratavosi ara laugira nimui kao, mara toroutsanigira nimui omea sui.

Sepania 3:6

Ma na Taovia e tsaria, “Inau au matesiligigira nogo danga na puku popono; mau toroutsanigira niqira verabau, mau vui pukaligira niqira baravatu ma niqira kusudato. Mara totu mangu lê niqira verabau, me tagara goto sa tinoni ke liu bamai tana niqira sautu loki, rongona e tau nogo kauvisu ke kesa.

Sepania 2:5

Igamu na Pilistia tana tasi taligu amu totu vania moa na mate. Na Taovia e vota vanigamu nogo gamui kede. Aia sauba ke matesiligigamu, me ke tau lelê goto kauvisu ke kesa.

Sepania 1:18

Me atsa moa ti igira sui niqira siliva ma niqira qolumila me tau goto tangomana ke maurisigira tana dani ke poda na korena na Taovia. Mi tana dani ia, ma na barangengo popono sauba ke toroutsa saikesa tana lakena nina momosatoba loki. Maia sauba ke tavongani suilavaginigira na tinoni sui lakalaka tana barangengo.

Nahum 2:11

Tana idana na verabau ni Ninive e vaga moa kesa na babana laeone, i tana ara ba totu raviravi dou igira na laeone loki kolu daleqira tetelo. Maia na laeone mane e ba ruguvia gaqira sabo, me matesia, me gati ngotsingotsia, me ba dangaliginia na babana na velesina, gana ke palaginigira na laeone daki kolu daleqira. ?Miava nogo na verabau ri kalina ia? E toroutsa saikesa nogo.

Amos 3:12

Me tsarigotoa na Taovia, “E vaga kesa na mane pitusipi e lauligi tania na mangana na laeone ruka tuana sipi, se kesa lelê moa na tabana kulina, maia nogo sauba ke vaga vanigira na tinoni ni Samaria tana tagu ia, sauba kara tsaurae lê moa i laoqira na tinoni tamani omea danga sosongo kara mauri.

Amos 3:8

?Mi kalina e kanga loki kesa na laeone, masei sauba ke tau gini matagu? ?Mi kalina na Taovia God e goko, masei ke baribari me ke tau katevulagia nina goko?

Amos 3:4

?Laka kesa na laeone e dona ke tavongani kanga loki tana goana, ti vaga ke tau vati tsodotalua sa gana lamuta? ?Se laka kesa na dalena laeone ke tavongani ngeo i laona babana, ti ke tau tangolitalua kesa na omea ke gania?

Hosea 11:10

“Sauba igira niqu tinoni kara muriau inau kalina kau kanga loki vaga moa na laeone vanigira gaqira gala. Sauba kara ulomai tsaku i koniqu talu tabana i tasi.

Hosea 5:14

Eo, minau segeniqu nogo sauba kau baginigira na tinoni ni Israel mi Juda vaga moa kesa na laeone. Sauba kau ngotsigira, ma kau mololegira i tana. Mi kalina inau kau raqaligigira, me sauba ke tagara goto ke kesa tangomana ke laumaurisigira.

Esekiel 5:14

Migira sui na tinoni tana vera ara totu polipoligamu sauba kara reigamu ma kara kiataginigamu ma kara tsaria, ‘Reia bâ, ara seko pitsu nogo igira. Na Taovia e morosia niqira sasaga tabaru me matesiligigira sui nogo.

Jeremia 44:22

Ma na Taovia e utu goto ke baria na reiaqira na omea tabaruga ma na tsutsukibo amu naugira, maia nogoria na rongona ti nimui kao e totu mangu lê saikesa me tagara goto ke kesa ke totu i laona, migira na tinoni tavosi ara gini novo loki mara matagu, tana rongona na omea vaga ia e laba, mara gini aqo na soana na veramui gana na vealagi.

Jeremia 34:22

Minau sauba kau ketsaligira, ma kara visumaitugua tana verabau iani. Sauba kara bokia, ma kara tangolia, ma kara mololakena, me ke iru sui saikesa. Inau sauba kau naua ma na vera sui tana Juda kara vaga saikesa moa na kaomate i tana e tau tangomana vania ke kesa ke mauri. Inau nogo na Taovia au tsaria na omea iani.”

Jeremia 33:10

Ma na Taovia e tsarigotoa, “Igira na tinoni ara tsaria laka na nauna iani e vaga saikesa nogo na kaomate, me laka e tagara goto sa tinoni se sa omea tuavati ke totu i laona. Me mana nomoa. Ara mangu lê sui nogo na vera tana Juda, ma na sautuna na verabau ni Jerusalem; me tagara goto sa tinoni se sa omea tuavati ke mamauri i laona. Bâ, mi tana nauna nogo girani sauba kamu rongomitugua na

Jeremia 26:9

?Laka rongona gua ti o tsaria o goko tana asana na Taovia mo katea laka na Vale Tabu iani sauba ke lia vaga i Silo, me laka na verabau iani sauba ke toroutsa me ke tagara goto ke kesa ke mauri i laona?” Mi tana, migira na toga ara mai tupolia a Jeremia i laona na Vale Tabu.

Jeremia 25:30

“Migoe a Jeremia, nimu aqo ko katevulagigira na omea sui inau au tsarivanigo. Nimu aqo ko tsarivanigira na tinoni girani na goko vaga iani, ‘Na Taovia sauba ke qululu tû i gotu i baragata, me ke poda vaga na vivisa tû i kelana na baragata. Aia sauba ke kangalaginigira nina tinoni, me ke gudato vaga na mane e tsogori rapasia na vuana uaeni. Migira sui lakalaka na tinoni tana barangengo popono sauba kara rongomia,

Jeremia 5:6

Aia nogoria na rongona ti sauba igira na laeone kara talu tana goana atsi ma kara mai matesigira, migira na pai atsi kara talu tana kaomate ma kara gati matesigira, migira na kusi atsi kara tuvia na veraqira, rongona ti vaga kesa ke rutsuligi tania na vera, me sauba kara gati ngotsingotsigira, rongona niqira sasi na tinoni girani ara danga seko sosongo, mara piloligi sailagi moa tania God.

Isaia 24:1

Na Taovia sauba ke toroustania na barangengo me ke moloa ke totu mangu lê. Aia sauba ke birua na barangengo, me ke sarangasigira na tinonina.

Isaia 6:11

Minau au veisuâ, “?Taovia sauba ke oka koegua sagata inau kau nauvaganana ia?” Maia e gokovisu vaniau me tsaria, “Poi tsau kalina kara toroutsa sui na verabau ma kara kokoma, me ke tagara goto sa tinoni ke totu i laona na valeqira, ma na butona kao segenina goto nogo ke lia na kaomate.

Isaia 5:9

Minau au rongominogoa na Taovia Susuliga Sosongo e tsarivaganana iani, “Igira sui lakalaka na vale loki rerei dou girani sauba kara toroutsa sui ma kara totu kobakoba lê.

Linge 57:4

Ara totu poliau igira gaqu gala, vaga saikesa moa ti na laeone veveiga. Na livoqira ara vaga moa na bao ma na pipili; ma na lapiqira ara vaga na isi vavanga.

Nina Papi A Job 4:10

Igira na vanga tsutsukibo ara ngunguru mara kakanga loki vaga moa na laeone, maia God e muisigira me bokua na livoqira.

Tinoni Pede 14:5

Maia Samson e dulikolukaira tamana ma na tinana mara tu vano i Timna. Mi kalina ara tu liu tsapatugu i laoqira na uta na uaeni i tana, maia e rongomia kesa na dalena laeone e ngunguru.

Jeremia 51:38

Migira sui na tinoni ni Babilon ara kanga vaga moa ti na laeone, mara nguru vaga moa ti na dalena laeone.

Esekiel 36:3

“Bâ, mi kalina ia, migoe ko bâ mo ko katevulagi vanigira na omea inau na Taovia God au tsaria: Kalina igira na puku tavosi ara totu varangi ara tû mara mai tangoligira na vungavunga ni Israel mara aditamaniqira, migira sui ara gilugana moa na Israel.

Sekaria 11:3

!Igira na tagaovera ara ngangaidato tana padasavi loki, rongona e puka lê gaqira tangirongo! !Kamu rongomigira na laeone ara kanga loki, rongona e toroutsa sui nogo na veraqira i laona na goana atsi ligisana na Kô Jordan!

Jeremia 6:8

Igamu na tinoni ni Jerusalem, kamu parovata dou, ma kamu rongomangaqu inau. Me ti tagara, minau sauba kau tsonikidamui saikesa, ma kau naua ma nimui verabau ke lia vaga na kaomate, na nauna mangu i tana e tau nogo totu sa tinoni.”

Jeremia 9:10

Minau a Jeremia au tû mau tsaria, “Sauba kau tangisigira na vungavunga, ma kau ngangaisigira na butona kao i tana e dato dou na buruburu, rongona ara viri makede takuti, me tagara goto ke kesa ke liu i laoqira. Ma na tatangina niqira kanga na buluka ara tau nogo rongomia i tana; migira na manu ma na omea tuavati atsi ara tsogoligi sui taninogoa.”

Jeremia 10:22

!Kamu rongomia bâ! !E labamai kesa na turupatu! !Kesa na leleo loki e tangilaba i laona kesa na puku tavosi tabana i vava; migira nina mane vaumate ara maimai nogo gana kara sekoligira sui na verabau tana Juda ma kara lia na kaomate, niqira mani totu na pai atsi.”

Jeremia 25:9

‘Kamu rorongo, inau sauba kau mologoko bâ vanigira na tinoni sui ara totu tabana i vava, me vanigotoa niqu maneaqo a Nebukadnesar na taovia tsapakae ni Babilonia. Sauba kau soamaigira kara vailabu kolugira na tinoni tana Juda, migira sui goto na puku tavosi ara totu varangisigira. Minau sauba kau toroutsani saikesalia na puku iani, migira goto ara totu varangisigira, migira sui kara morosia na omea iani au naua vanigira, sauba kara gini beke ma kara matagu loki. Inau nogo na Taovia au tsaria na omea iani.