Jeremia 15:15 - Ghari

¹⁵ Mi muri, minau au tsaria, “Taovia, igoe o donagininogoa niqu rota loki. Ko padaau inau mo ko sangaau. Ko tangotuguqu i koniqira igira ara rotasiau. Ko padatugua laka tana rongona au aqo vanigo nogo igoe, te ara peaginiau inau.

Jeremia 15:15 Referans Kwoze

Jeremia 12:3

Bâ, migoe Taovia o donaginiau nogo inau; mo morosigira sui na omea inau au naugira, mo donaginigotoa laka inau au galuvego. Mi kalina ia inau au nongigo ko raqaligigira na tinoni vanga tsutsukibo girani vaga na sipi ara raqavanogira tana nauna i tana kara matesigira; ko tangoligira poi tsau ke laba na dani igoe o titinogoa vania na labumatesiaqira.

Luka 21:17

Pipi gira sui lakalaka sauba kara reisavigamu rongona amu tsarimuriqu inau.

Jeremia 20:12

Migoe segeni moa Taovia Susuliga Sosongo o dona na pedegoto, mo donaginia na omea e totu i laona na tobaqira ma na papadaqira na tinoni sui. Me vaga ia, mau nongigo ko tamivaniau kau reigo igoe kalina ko tangotuguqu i koniqira gaqu gala, rongona inau au noru saikesaligo moa igoe Taovia.

Jeremia 17:16

Bâ, migoe Taovia o donagininogoa laka inau au tau raigo ko alomaia na rota seko loki vanigira; mau tau goto ngaoa ke gadovigira na tagu seko. Eo, Taovia, igoe o donagininogoa na omea sui inau au tsaria.

Nehemia 13:22

Mau ketsaligira na Levite kara suisui segeniqira, ma kara ba mataligira na matsapakapu, rongona na Dani na Sabat ke lia na dani tabu manana. Niqu God, ko padaau goto tana rongona na aqo iani inau au nauvanigo, mo ko galuveau tana nimu galuve vo oli.

Mateo 10:22

Igira sui sauba kara reisavigamu igamu tana rongoqu inau. Masei moa ti ke tukakai poi ke tsau tana susuina, aia moa sauba ke mauri.

Jeremia 20:8

Me pipi kalina ti kau tû na goko, migoe o raiau moa laka kau gudato ma kau katea, “!Na Vailabugi Loki sauba ke laba, migamu sauba kamu viri mate sui!” Taovia ko reigira ara tsiriau mara peaau pipi moa kalina, tana rongona nogo nimu goko igoe o raiginiau na katevulagiana.

Linge 119:84

?Me sauba ke oka koegua sagata inau kau pipitu? ?Me ke ngisa ti sauba ko kedegira igira ara rotasiau inau?

Linge 106:4

Taovia ko padaau goto inau, kalina igoe ko sangagira nimu tinoni; mo ko maurisiau goto inau kalina ko maurisigira igira.

Nehemia 5:19

Niqu God, au nongigo ko padatugutugua na aqo sui iani inau au nauvanigira na tinoni girani, mo ko saupeluna vaniau.

Na Katemai 18:20

!Ko magemage igoe na baragata, migamu sui goto nina tinoni God, migamu na apostolo ma na propete, rongona God e pedenogoa na vera loki ia tana rongona na omea seko aia e naua vanigamu!

Na Katemai 6:10

Mara gudato mara tsaria, “!Taovia susuliga sosongo, igoe o tabu loki mo mana saviliu! ?Sauba ke oka koegua sagata ko pipitu ti ko mai na pedeaqira na tinoni tana barangengo, mo ko kekegira igira ara labumatesigami igami?”

2 Timoti 4:14

A Aleksader na mane e aqo tana tapala, aia e seko sosongo vaniau. Me dou moa, sauba na Taovia ke kedea matena na omea seko aia e naua.

2 Korint 5:11

Igami ami donagininogoa nagua na kukuni taniana na Taovia. Aia nogo na rongona ti igami ami gini aqo kakai kara gini tutunina na tinoni. God e donaginigami manana nogo igami, minau au amesia laka i laona na tobamui goto igamu kamu donaginiau goto inau.

Roma 12:19

Kulaqu igamu, kamu laka goto na tuguvisuana na omea seko ara nauvanigamu na tinoni tavosi. Kamu molovania moa na korena God ke naua, matena ara marenogoa tana Mamare Tabu laka na Taovia e tsaria, “Inau nogo sauba kau tuguvisua na omea seko ara nauvanigamu.”

Mateo 19:29

Masei ti ke mololegira na valena, ma na tasina, ma na vavinena, ma na tamana, ma na tinana, ma na dalena, ma nina uta tana rongoqu inau, maia sauba ke tamanina kesa sangatu liusia na dangana, me ke tamanina goto na mauri saliu.

Jeremia 15:10

!Inau a Jeremia, e melu loki sosongo nomoa na tobaqu! ?Matena gua te e vasuau tinaqu? Inau niqu aqo kau vaiganigi, ma kau vaimangabarigi, kolugira na tinoni sui tana butona kao iani. Minau kesa au tau dona na kaoni, migira na tinoni tavosi ara tau goto kaoni i koniqu inau. Me atsa moa e vaga ia, migira na tinoni sui ara vealaginiau moa inau.

Isaia 38:3

“Taovia, ko padatugua laka inau au totukakai i konimu igoe mau aqo dou vanigo, mau tovo sailaginia na naudouana moa na omea igoe o ngaoa kau naua.” Mi tana maia e ngangai loki sosongo.

Linge 102:24

Niqu God ko laka mavi na adiligiaqu kalina ia, inau au tau vati tuqatuqa moa. Taovia igoe o totu saviliu na dani ma na dani;

Linge 39:13

Ko mololeau ma kau totu segeniqu rongona kau gini tamanina na tagu tana kau totu magemage idavia kau mate ma kau tagara nogo inau.

Linge 17:3

Igoe nogo o donaginia na laona na tobaqu. Igoe o mai nogo i koniqu tana bongi, mo vilekegira sui niqu sasaga. Mo tau goto tsodoa ke kesa na omea seko i laoqu.

Nina Papi A Job 10:7

Migoe o donagininogoa laka au tau tsukia sa sasi, me laka e tagara goto sa tinoni tangomana ke laumaurisiau tania na limamu igoe.

Nehemia 13:31

Mau mologira visana kara adilake mai tana tagu titi gana na kodoputsa, migira na tinoni kara adimaigira goto na kesanina lakana niqira omea tsukatsuka, ma na kesanina vuana ara mada tana niqira gai mutsamutsa. Kiki God, ko padatugugira sui na omea girani, mo ko tobadou vaniau.

Nehemia 6:14

Minau au tû mau nonginongi, “Niqu God, ko padatugua na omea ara ka naua kaira a Tobia ma Sanbalat mo ko kedekaira, maia goto na daki ia ko Nodia migira sui goto na propete tavosi ara tovoa laka kara molomatagu vaniau.”

Roma 8:35

E tagara saikesa sa omea tugua ke molovotagita tania na galuvena a Iesu Kristo, atsa moa ti na rota se na vatsangisavi loki, se na tsodo rota tana rongona na lotu, se na vitoa, se na totu sekona lee, se na mate ke gadovigita.

Tinoni Pede 16:28

Mi tana ma Samson e nonginongi me tsaria, “Taovia God ko padavisuau tugua kiki inau. Kiki niqu God, ko sauvisu vaniau na susuligaqu ke kesa goto moa kalina, rongona kau tuguvisua vanigira na omea ara nauvaniau igira na Pilistia ara putsiligikaira na mataqu.”

Linge 44:22

Mi tana rongomu segeni nogo igoe te ara labumatesigami pipi kalina, mara naua vanigami vaga saikesa nogo ti na sipi ara vangaraua na labumatesiaqira.

Jeremia 15:20

Minau sauba kau naua, migoe sauba ko tukakai i mataqira vaga saikesa moa na baravatu tapalamila. Igira sauba kara vailabu kolugo igoe, me utu moa kara tuliusigo. Inau sauba kau totu kolugo, ma kau dilago, ma kau ravisigo.

Jeremia 20:11

Migoe Taovia o tabana koluau, mo malagai susuliga sosongo, migira ara rotasiau e utu moa ke managaqira. Sauba kara paluvangamaqira saviliu, rongona e utu saikesa kara tangomana. Ma niqira paluvangamâ sauba e utu saikesa na tinoni kara padalea.

Jeremia 18:23

Migoe Taovia, o donagininogoa laka ara voro gaqu mate inau. Ko laka saikesa na padaleana niqira sasaga tabaru se na nusileana niqira sasi. Ko tamivanigira gaqira gala kara tuliusigira, migoe segeni moa ko kedegira tana nimu momosa loki.”

Tangitangi 3:64

“Taovia, ko kedegira tana rongona na omea seko ara nauvaniau.

Tangitangi 3:66

!Ko takuvi tsarigira, mo ko matesiligigira saikesa tania na barangengo!”