Jeremia 12:12 - Ghari

¹² Me taligu popono tana tetena i laona na kaomate ara alamai igira na tinoni vanga komi. Ma niqu isi segeni nogo inau au toroutsaniginia na kao popono; me gini tau tangomana ke kesa ke totu tana rago.

Jeremia 12:12 Referans Kwoze

Amos 9:4

Me ti vaga igira gaqira gala kara aditsekavanogira kesa tana vera tavosi, minau sauba kau ketsaligira kara labumatesigira. Inau au padakuti matena nogo kau matesigira sui lakalaka, me utu goto kau sangagira.”

Jeremia 47:6

Igamu amu ngangaidato mamu tsaria, ‘!Igoe nina isi na Taovia! ?Ke oka koegua sagata ko kavigami babâ moa? !Ko visutugua tana lapamu mo ko totudodo i tana, mo ko mango rago!’

Esekiel 14:17

“Se e tau utu kau mologira na gala kolua niqira sagore na vailabu, kara baginia na butona momoru ia, ma kara labumatesigira sui lakalaka na tinoni ma na omea tuavati ara totu i tana.

Isaia 34:6

Na gabuqira ma na seregaqira na tinoni ni Edom sauba ke dangalia nina isi na Taovia vaga moa na gabuqira ma na seregaqira na sipi ma na naniqoti ara matesigira gana na gini savori-kodoputsa. Na Taovia sauba ke naua na labumate loki iani tana verabau ni Bosra tana kao ni Edom.

Na Katemai 6:4

Me kesa tavosi goto na ose e laba rutsumai, maia na tsitsina. Maia e sage i gotuna e adia na susuligana i konina God gana ke ratsiginia na vailabu loki tana barangengo, ma kara gini vaimatesigi na tinoni tabana mi tabana. Mara tusuvania kesa na isi loki.

Sepania 2:12

Ma na Taovia sauba ke matesigira goto na tinoni ni Sudan.

Esekiel 5:2

Mi kalina ke tovu na dani au molovanigo ko tsatsaro, migoe ko tû. Miani nogoria ke lia na papadana vanigira na Israel laka na gala ara tangolinogoa na Jerusalem. Mi tana, migoe ko adia kesa turina na ivumu, mo ko kodoa i kelana na nununa na vera ni Jerusalem aia igoe o aqosinogoa. Mo ko adia na rukanina turina na ivumu, mo ko liu kolua polipolia na briki ia, mo ko putsi kutsiginia nimu isi. Ma na tolunina turina ko rasavagini bamaia, minau sauba kau adia niqu isi ma kau takuvi tsarimuria.

Jeremia 48:2

E sui saikesa nogo gana tangirongo na Moab. Igira na gala ara tangolinogoa na verabau ni Hesbon, mara vorogokona na toroutsaniana na puku popono tana Moab. Me sauba kara mangusia na vera ni Madmen, kalina igira na mane vaumate kara ala baginia.

Jeremia 34:17

Bâ, mi kalina ia, inau na Taovia au tsarivanigamu nogo laka igamu amu petsakoe mangaqu, mamu tau mologira gamui verakolu kara totu tanusi, ma kara pede segenia na omea kara naua. E dou moa, minau sauba kau molovanigamu kamu pede segenimui na omea amu ngaoa: kamu vilia na mate tana vailabu, se tana liuna na lobogu, se na vitoa. Me sauba kau naua migira na puku sui tana barangengo popono kara gini beke loki na reiana na omea inau au naua vanigamu.

Jeremia 15:2

Mi kalina kara veisuago laka iava tana sauba kara vano, mo ko tsarivanigira laka inau au tsarivaganana iani: Igira visana sauba ke laba gaqira matemate tana liuna na lobogu loki, mi tana nogo sauba igira kara vano. Migira visana sauba ke laba gaqira matemate tana vailabu, mi tana sauba igira kara vano. Migira goto visana sauba kara tsodoa gaqira matemate tana liuna na vitoa, mi tana sauba igira kara vano. Migira goto visana sauba kara tsodoa niqira matemate kalina kara aditsekavanogira, mi tana sauba igira kara vano.

Jeremia 3:2

Ko morodato tana kelaqira na tetena gira. ?Laka e tagara sa nauna i tana o tau ba samasama vanigira na god peropero vaga moa na daki rebi? Igoe o ba pipitugira gamu udu i liligina na sautu, vaga moa kalina igira na Arab ara pipitugira gaqira lamuta tana kaomate. Igoe o naqugasinogoa na kao popono tana nimu aqo mala rebi.

Isaia 57:21

Ma na Taovia e tsaria, “Igira na tinoni vanga tsutsukibo e utu goto kara tsodoa na rago.”

Aqo Manetabu 26:33

Inau kau adia niqu isi ma kau takuvi rasavaginigamu, migamu sauba kamu viri tsogo piriutsa bamai i laona niqira kao na tinoni ni veratavosi. Ma nimui kao segeni ke totu mangu lê, ma nimui verabau kara toroutsa sui.

Na Vaolusi Ketsa 32:42

Tana niqu pipili sauba ke kukudu na gabuqira, ma niqu isi kau matesiginigira sui igira ara suamangaqu inau. Me sauba e utu goto kau gaea asei ke vailabu koluau; e atsa moa igira ara boka migira ara laugira tana vailabu, sauba kara mate sui.’

Jeremia 3:21

Ara rongomia kesa na leleo loki i kelana na tetena. Igira nogo na tinoni ni Israel ara ngangai dato vania God ke galuvegira, rongona igira ara sasi sosongo, mara padalea na Taovia niqira God.

Jeremia 4:27

Na Taovia e tsari idanogoa na omea iani, “Na barangengo popono sauba ke lia na kaomate, me utu nomoa kau toroutsani saikesalia.

Jeremia 16:5

“Igoe ko laka na sage bâ tana vale i tana ara tangitangi. Mo ko laka goto na gini melu tana rongona ke kesa. Inau e utu goto kau gini vangalaka na rago vanigira niqu tinoni, se kau galuvegira, se kau tobalaka vanigira.

Jeremia 25:11

Na butona kao popono iani sauba ke totu seko lê ma kara gini beke na reiana, migira na puku sui ara totu varangisigira sauba kara aqotseka vania na taovia tsapakae ni Babilonia i laona ke vitu sangavulu na ngalitupa.

Jeremia 30:5

“Au rongomigira ara gudato tana padasavi loki, mara ngangai tana matagu, mara tau saikesa goto totu tana rago.

Jeremia 46:10

Iani nogo nina dani na Taovia God Susuliga Sosongo, na dani i tana aia ke tangotugu, me ke kedegira gana gala. Ma nina isi sauba ke ganigira poi tsau kalina ke masu doka, me ke inuvia na gabuqira poi tsau kalina ke vatsa. I dani eni nogo na Taovia God e savorigira gana lamuta tana butona kao tabana i vava ligisana na Kô Euprates.

Tangitangi 3:17

Me tau nogo totu na rago i tobaqu, mau padale saikesalinogoa nagua vaga na mage.

Esekiel 21:4

Inau sauba kau gini aqo niqu isi gana na labumatesiginiamui sui tuturiga i vava me ke tada laba i ata.

Esekiel 21:28

“Dalena tinoni igoe, ko katevulagia niqu goko vanigira na tinoni ni Amon igira ara pea sosongoligira na Israel, mo ko tsarivanigira na omea iani inau na Taovia God au tsaria: ‘Kesa na isi e totu vangarau manoga nogo gana na matesiligiamui. Maia ara kotsa malenogoa agana na labumate, me anga vaga moa na kirapina na angaanga.

Jeremia 8:15

Igita a amesia ke laba na tagu na rago ma na mauri doutugua, me tau moa laba vaga ia, migira moa na gala ara mai mara molo matagu vanigita.

Esekiel 21:8

Ma na Taovia e tsarivaniau goto,

Esekiel 21:9

“Dalena tinoni igoe, ko katevulagi vanigira niqu gokotabana iani inau na Taovia au tsarivanigira: E totu kesa na isi, ma na isi ia ara asa manogatinogoa mara kotsa maledoua.