Isaia 48:12 - Ghari

¹² Na Taovia e tsaria, “!Kamu rongomiau inau, igamu na Israel, na tinoni inau au viligamu! Inau segeni moa au God. Inau na idana tsotsodo, ma na susuina tsotsodo, me tagara goto sa god tavosi.

Isaia 48:12 Referans Kwoze

Isaia 41:4

?Masei sagata nomoa e naua mara gini laba na omea girani? Inau nogo na Taovia au pedea na omea sui ara laba tû mai nogo i sau. Inau nogo na Taovia au totu tû tana tuturigana na omea sui, minau goto nogo na Taovia God sauba kau totu tana susuina.

Na Katemai 22:13

Inau nogo na idana tsotsodo ma na murina tsotsodo, na tuturigana ma na susuina.”

Na Katemai 1:8

“Inau na Idana tsotsodo, ma na Susuina tsotsodo,” e tsaria na Taovia God susuliga sosongo, aia e totu kalina ia, me totu nogo tuu tana tuturigana, me sauba ke visumaitugua.

Isaia 44:6

Na Taovia, aia e tagaovigira me reitutugugira na tinoni ni Israel, aia na Taovia Susuliga Sosongo e tsaria na omea iani: “Inau nogo na kesanina ma na susuina, me tagara goto sa god tavosi, inau segeni lelê moa au God.

Isaia 55:3

“Kamu rorongo dou kalina ia igamu niqu tinoni, ma kamu pilomai i koniqu inau. Eo, kamu mai i koniqu me sauba kamu tamanina na mauri. Inau sauba kau naua kesa na vaitasogi saliu kolugamu, ma kau sauvanigamu niqu vangalaka vaga au vekenogoa vania a David.

Isaia 43:11

“Inau segeni moa na Taovia, minau lelê moa tangomana kau laumaurisigamu.

Isaia 49:1

!Kamu rongomiau inau igamu na tinoni tana vera ao mi tana tasi taligu! Idavia kalina au tau vati botsa inau, ma na Taovia e viliau, me moloau kau lia nina maneaqo.

Isaia 46:3

“Migamu na kukuana a Jakob, igamu sui niqu tinoni amu kauvisu, kamu rongomiau inau. Inau au aragogamu tu nogo tana tagu amu botsa.

Na Vaolusi Ketsa 32:39

“ ‘Inau, inau segeni au God; me tagara goto sa god tavosi ke mana. Inau nogo au matesi tinoni, mau maurisi tinoni, mau bokali tinoni mau tali tinoni, me tagara goto ke kesa tangomana ke utusia na omea inau au naua.

Na Katemai 17:14

Mi tugira sauba kara tu gini vailabugi kolua na Dalena Sipi. Maia na Dalena Sipi kolugira nina tinoni segeni, igira aia e viligira sui nogo, me kolugira goto igira ara muridoua nina goko, sauba kara sugutitugira na sangavulu na taovia tsapakae, rongona na Dalena Sipi aia nogo e Taovia Loki vanigira na taovia loki sui, me Taovia Tsapakae vanigira goto na taovia tsapakae sui.”

Na Katemai 2:8

“Ko mamare baa vania na angelo e reitutugua na lotu i Smirna, mo ko tsarivaganana vania: “Iani nogo e vaga na goko e talumai i konina aia na Idana tsotsodo ma na Susuina tsotsodo, aia e mate me maurivisu tugua nogo.

Na Katemai 1:11

Maia e tsarivaniau: “Ko maretsunagira na omea sui o reigira, mo ko tusu baa na papi vanitugira na vera na lotu tana vitu na vera loki tugirani: i Epesus, mi Smirna, mi Pergamum, mi Tiatira, mi Sardis, mi Piladelpia, mi Laodisea.”

1 Petero 2:9

Migamu, amu nina mamatana tinoni vivili ma nina manetabu God na Taovia Tsapakae. Mamu lia nogo na vera tabu loki, ma nina tinoni segeni nogo God. Aia e viligamu kamu gini tsarivulagigira na omea loki God e nauvanigamu kalina aia e soa rutusumiligigamu tania na totu rodo, me tudumi sagegamu tana nina marara loki segeni nogo ia.

1 Korint 1:24

Me vanigita, aia God e viligita nogo i laomami igami na Tsiu, mi laomui goto igamu na Grik, a Iesu Kristo aia nogoria na susuligana God, ma na sasagana God.

Roma 8:28

Igita a dona nogo laka God e dona na gini aqo pipi na omea sui ti ke gini laba na omea dou vanigira ara galuvea, igira nogo aia e viligira kara naua na omea aia e kilia.

Mateo 20:16

Ma Iesu e suilavaginia nina gokolia vaga iani: “Eo, igira ara muri tsotsodo kalina eni, sauba kara palaida, migira ara ida tsotsodo kalina eni, sauba kara palamuri.”

Isaia 51:7

“Kamu rongomiau inau, igamu amu donagininogoa na omea e goto me mana, me pukuga kalavata nogo i tobamui niqu sasani. Kamu laka na matagu kalina kara tsari levolevo vanigamu ma kara gokopeagamu,

Isaia 51:4

“Kamu rongomiau inau igamu niqu tinoni, kamu rongomidoua na omea inau au tsaria: Inau sauba kau sasaniginigira na tinoni sui niqu ketsa, ma niqu pede gotolaka sauba ke mararasigira na tinoni pipi sui tana vera.

Isaia 51:1

Na Taovia e tsaria, “Kamu rongomiau inau igamu amu ngaoa kau maurisigamu, igamu sui amu mai na lave sasanga i koniqu inau. Kamu padavisukaira a Abraham ma ko Sara, kaira na mumuamui, i tana igamu amu botsamai. Kaira ara ka vaga na vatu i tana au katsugamu mau aqosiginigamu. Mi kalina inau au vilia a Abraham, aia e tau tamani sa dalena, minau au vangalaka vania mau tusuvania danga na dalena, ma na kukuana aia ara pabo babâ mara lia na puku loki.

Isaia 34:1

!Kamu mai igamu sui na tinoni pipi tana puku! Kamu saikolumai ma kamu rorongo. Na barangengo popono me pipi sui na tinoni ma na omea amu totu i laona kamu mai ieni ma kamu rorongo.

Goko Tabana 8:32

“Mi kalina ia, igamu na tinoni vaolu, kamu rongomiau inau. Kamu naua na omea au tsarivanigamu, me sauba kamu gini mage.

Goko Tabana 7:24

Mi kalina ia na dalequ, ko rongomiau inau. Ko puku kalavatavidougira na omea au tsarivanigo.

Isaia 40:26

!Kamu morodato tana masaoka! ?Laka asei nomoa e volagira na veitugu igamu amu reigira? Aia nogo na Taovia. Maia segenina nogo e ida vanigira vaga moa kesa na alaala na mane vaumate, me donaginia na dangaqira, me molovania pipi vidaqira na soana segeni. Mi tana rongona aia e susuliga sosongo, te e tau goto dona ke tsida sa vidaqira.

Isaia 43:10

“Igamu na tinoni ni Israel, igamu nogo niqu rongovata inau. Inau nogo au viligamu kamu lia niqu maneaqo, gana kamu donaginiau inau ma kamu tutuniqu, ma kamu gini padagadovia laka inau segeni moa au God. Me tagara saikesa sa god tavosi ke totu i sau, me sauba ke tagara saikesa goto ke kesa ke totu tana tagu ke mai.

Isaia 46:4

Inau nogo nimui God, me sauba kau aragogamu babâ poi kamu tuqatuqa ma kamu dakidaki me ke senge na ivumui. Inau nogo au aqosigamu, me sauba kau reitutugugamu, ma kau sangagamu, ma kau laumaurisigamu.

Isaia 44:1

Ma na Taovia e tsaria, “Mi kalina ia kamu rorongo igamu na Israel niqu maneaqo, ma na kukuana a Jakob niqu tinoni vivili.