Isaia 44:1 - Ghari

¹ Ma na Taovia e tsaria, “Mi kalina ia kamu rorongo igamu na Israel niqu maneaqo, ma na kukuana a Jakob niqu tinoni vivili.

Isaia 44:1 Referans Kwoze

Isaia 41:8

“Migamu na Israel niqu maneaqo, igamu nogoria na tinoni inau au viligamu, igamu na kukuana a Abraham na kulaqu dou.

Jeremia 30:10

“Me vaga ia, migamu niqu tinoni kamu laka na matagu, migamu na toga ni Israel kamu laka goto na kadangaginiana sa omea. Inau sauba kau laumaurisigamu tania na vera ao, aia nogo na vera i tana amu totutseka kalina ia. Igamu sauba kamu visumaitugua i veramui ma kamu totu tana rago, ma kamu totu raviravi dou, me ke tagara goto kesa tangomana ke molo matagu vanigamu.

Jeremia 4:7

Vaga saikesa nogo kalina kesa na laeone e laba rutsumai tania na nauna i tana e taopoi, igira na gala ara mololenogoa na veraqira segeni mara maimai nogo i sautu. Ara mai gana kara toroutsania na Juda. Igira sui na verabau tana Juda sauba kara toroutsa saikesa, me ke tagara goto ke kesa ke totuvisu i laoqira.

Luka 13:34

“!Jerusalem, Jerusalem! !Igira na tinoni i laomu igoe ara labumatesiigira na propete, mara taimatesigira nina mane adigoko God, aia e molomaigira vanigo! !Danga nogo kalina au ngaoa laka kau adisaigira nimu tinoni vaga moa na kudo kalina aia e sarosaigira na dalena tetelo i vavana na rapona, migoe o tau saikesa tamivaniau!

Isaia 55:3

“Kamu rorongo dou kalina ia igamu niqu tinoni, ma kamu pilomai i koniqu inau. Eo, kamu mai i koniqu me sauba kamu tamanina na mauri. Inau sauba kau naua kesa na vaitasogi saliu kolugamu, ma kau sauvanigamu niqu vangalaka vaga au vekenogoa vania a David.

Isaia 43:1

Igamu na Israel, na Taovia aia e vusagamu e goko me tsaria, “Kamu laka na matagu, inau nogo sauba kau laumaurisigamu. Inau nogo au molovanigamu na soamui, migamu niqu tamani nogo inau.

Isaia 42:23

?Me laka ke kesa i laomui ke ngaoa na rongomiana na goko iani? ?Me laka ke tû kalina ia me ke bâ, sauba kamu rorongo kalavata dou?

Tuturigana 17:7

“Inau sauba kau manalia niqu veke au nauvanigo igoe, me vanigira goto na kukuamu kara botsamai i muri vaga na taso saliu. Inau sauba kau lia nimu God igoe, ma niqira God goto igira na kukuamu.

Linge 136:22

me tusulea niqira kao vania Israel nina tinoni aqo ia; rongona nina galuve e totu saviliu.

Isaia 14:1

Na Taovia sauba ke galuvegira tugua nina tinoni Israel, me ke viligira tugua kara lia nina tinoni segeni nogo aia. Me sauba ke tamivanigira kara totuvitugua niqira butona kao segeni, migira na tinoni ni veratavosi kara mai totu kolugira goto i tana.

Isaia 41:9

Inau au adivisumaigamu talu tana susuina na barangengo, mau soa rutsumigamu tana tsuruna saikesa, mau tsarivanigamu, ‘Igamu nogo niqu maneaqo.’ Eo, inau au tau sove tanigamu, au viligamu nogo.

Isaia 44:21

Na Taovia e tsarigotoa, “Igamu na Israel, na kukuana a Jakob, kamu padatugua na omea iani. Kamu padatugua laka igamu niqu maneaqo inau. Inau nogo au vusagamu gana kamu lia niqu maneaqo, me utu saikesa kau padalegamu.

Isaia 45:4

Inau nogo au viliginigo igoe ko sangagira na Israel igira niqu maneaqo, igira na tinoni inau nogo au viligira. Me atsa moa ti igoe o tau vati donaginiau moa inau, minau moa au soâ na asamu igoe mau molokaego ko taovia tsapakae.

Isaia 48:12

Na Taovia e tsaria, “!Kamu rongomiau inau, igamu na Israel, na tinoni inau au viligamu! Inau segeni moa au God. Inau na idana tsotsodo, ma na susuina tsotsodo, me tagara goto sa god tavosi.