Isaia 27:6 - Ghari

⁶ Mi tana tagu ke mai, igira na tinoni ni Israel igira na kukuana a Jakob, sauba kara molo lamuqira vaga na itai na uaeni nogo ma kara latse ma kara molo vuaqira dangadanga, ma na vuaqira sauba kara dangadato i laona na barangengo popono.

Isaia 27:6 Referans Kwoze

Isaia 37:31

Migira na tinoni ni Juda, igira ara matepitsa tana vailabu, sauba kara mauri dou vaga saikesa nogo na omea tsukatsuka e tsuna ao dou na lamuqira i laona na kao mara molo vuaqira danga.

Sekaria 2:11

Mi tana tagu ia sauba kara danga na puku tavosi kara mai konina na Taovia ma kara lia goto nina tinoni segeni. Maia na Taovia sauba ke totu i laomui, mi tana ti igamu kamu donaginia laka aia nogo e molomaiau vanigamu.

Hosea 2:23

Inau sauba kau vaturikakaigira niqu tinoni i laona niqira kao, ma kau naua ma kara tamani omea danga tugua. Me sauba kau galuvegira tugua igira au soaginigira ‘Tau Galuve’ tana idana. Migira au soaginigira ‘Tau Niqu Tinoni’ tana idana, sauba kau tsarivanigira, ‘Igamu amu niqu tinoni inau.’ Migira sauba kara tuguvisua ma kara tsaria, ‘Igoe nogo nimami God.’ ”

Isaia 60:22

Me atsa moa aia na tetelona bâ i laoqira sui nimu tamadale, maia goto sauba ke lia kesa na vungu loki. Ma na vungu tetelo bâ, sauba ke pabo babâ goto me ke lia na puku loki susuliga. Mi kalina ke laba na tagu i tana inau au titivaninogoa, minau sauba kau naua ma kara laba tsaku na omea sui girani. !Inau nogo na Taovia!”

Na Katemai 11:15

Mi muri, ma na vitunina na angelo e uvia nina tavuli. Mau rongomia na tatangina na goko dangadanga i baragata ara viri guu mara tsaria, “!Kalina nogo ia, kaira God ma na Dalena, aia nogo na Mesia, ara ka tagaovi kaputigira na vera sui tana barangengo popono, me sauba aia nogo ke tagao pukuga na dani ma na dani!”

Pilipi 3:3

Igita nogoria a adia na paripapadana mainana, me tau igira, rongona igita nogoria a samasama vania God tana nina sasanga na Tarunga Tabu, ma magemage tana nida mauripata koluana a Iesu Kristo. Igita a tau vataraginia nida tutuni kesa tana aqotabu ni taba lee moa, vaga ti tana paripapadana.

Galatia 3:29

Ti vaga igamu nina tinoni nogo a Iesu Kristo, vaga ia migamu goto na kukuana manana a Abraham, me sauba igamu sui goto kamu adia na omea God e vekenogoa.

Jeremia 30:19

Migira na toga kara totu i tana sauba kara linge na lingena na tsonikae, ma kara gugû tana magemage. Minau kau vangalaka vanigira me sauba ke pabo goto bâ na dangaqira, migira na tinoni tavosi kara gini padalokigira.

Isaia 6:13

Me atsa moa ti vaga kara visana lelê moa na tinoni kara kauvisu tana kao ia, me sauba inau kau labumatesigira goto. Me atsa goto moa ti ke totu mangu lê na kao ia, me sauba nomoa ke botsa vaolutugua niqu puku na tinoni, me ke vaga saikesa na gai loki ara kavitsunâ ma na tuturina lê moa e totuvisu, mi muri, maia e dona ke vasu vaolutugua.”

Nina Papi A Job 37:12

Ara vano bamai tana nina kili God vanigira, mara muria pipi sui na omea aia e ketsaligira kara naua pipi nauna i laona na barangengo popono.

Isaia 4:2

E maimai nogo na tagu i tana na Taovia sauba ke naua pipi sui na omea tsukatsuka ke vuaga dou, me pipi sui na gai i laona na butona kao ia kara dato katsi ma kara rereidou. Migira sui na tinoni ni Israel igira ara tau mate tana vailabu, sauba kara morosigira na omea tsukatsuka ara dato dou, ma kara gini magemage.

Isaia 35:1

Ma na kaomate sauba ke magemage tugua, ma kara viri tavuresi pipi vatana na tsitsi sui tana kao mamatsa.

Isaia 35:2

Na kaomate sauba ke lilinge me ke gudato tana mage; me sauba ke rereidou saikesa vaga nogo na Vungavunga ni Lebanon, migira na omea tsukatsuka i laona sauba kara dato magobu dou saikesa, vaga moa i laona na uta tana Vungavunga Karmel, mi tana poiatsa ni Saron. Mi tana tagu ia migira na tinoni sui sauba kara reivulagia gana loki tsapakae na Taovia, ma na susuligana loki nida God.

Esekiel 36:8

Migamu na vungavunga ni Israel nimui gai sauba kara dato varimauri doutugua, ma kara latsu vaolu na rauqira, ma kara molo vuaqira danga vanigira niqu tinoni. Eo, e varangi sosongo nogo kara visumaitugua tana veraqira igira niqu tinoni ni Israel.

Esekiel 36:10

Minau sauba kau naua ma kara pabo babâ igira na puku tana Israel ma kara totuvigira tugua nimui verabau. Me sauba kara arago visutugua na nauna sui i tana igira na gala ara toroutsanigira.