Isaia 26:10 - Ghari

¹⁰ Me atsa moa ti igoe o dou vanigira na vanga tsutsukibo, migira ara tau goto ngaoa na nauana na omea e gotolaka. Me atsa moa goto ieni i laona niqira kao na tinoni gotolaka, migira ara totu matengana moa na nauana na omea e sasi, mara sove na reigadoviana gamu loki tsapakae.

Isaia 26:10 Referans Kwoze

Hosea 11:7

Ara padakuti matena kara piloligi taniau inau. Migira sauba kara ngangai rongona e ngoligira na kalagai mamava ara kalagaia tana kokoveqira, me ke tagara goto ke kesa ke tsebaligia i koniqira.

Na Katemai 2:21

Mau molovania na tagu tana aia ke padasavigira nina sasi, maia e tau moa ngaoa na pilotoba taniana nina nauseko.

Mika 2:10

Kamu tû tsaku ma kamu vanoligi; e tagara goto sa nimui nauna na mani toturavi ieni. Igamu amu gini kaulinaqu i mataqu inau rongona na sasi danga amu tsukigira, me vaga ia, minau sauba kau toroutsanigamu saikesa.

Jeremia 2:7

Minau au molobagira kesa tana kao lakataga, gana kara gini mage na ganiana na vuana na omea tsukatsuka migira na omea dou sui goto ara totu i tana. Migira ara tû mara naqusia niqu kao, mara tangopekea na butona kao popono inau au saunogoa vanigira.

Sasani Sasaga 3:16

Mau reigadovigotoa inau, laka i laona na barangengo iani igita a tsodoa moa na omea seko i tana e tugua ke totu na omea e dou me goto i matana God.

Goko Tabana 1:32

Na tinoni tau sasaga ara mate rongona ara sove tania na sasaga loki. Migira na tinoni ara padâ laka ara dona nogo pipi na omea sui ara vaga moa na tinoni bule. Ma na papada vaga ia sauba ke toroutsanigira saikesa.

Linge 106:43

Danga kalina na Taovia e laumaurisigira nina tinoni, migira ara petsakoe babâ vania moa, mara puka babâ moa tana sasi.

Na Vaolusi Ketsa 32:15

“Igira nina tinoni na Taovia ara tamani omea danga, me atsa moa e vaga ia, migira ara petsakoe mangana moa; ara mutsa sosongo me gini subu na tobaqira. Igira ara piloligi tania God aia e aqosigira mara sove tania niqira vagamauri susuliga.

Binaboli 9:34

Mi kalina na taovia tsapakae e reia e laba na omea vaga ia, maia e tû me sasi tugua. Aia migira goto nina mane sasanga ara tsatsarae sosongo moa,

Binaboli 8:15

Mi kalina na taovia tsapakae e reia laka ara mate sui nogo na qori, maia e totu kalavata tugua tana nina papada, me tau tugua ngaoa na rongomiana ka mangaqira a Moses ma Aaron, vaga nogo na Taovia e kate idanogoa.

Hosea 13:6

Mi kalina igamu amu sage bâ tana kao dou, mamu mutsa masu dou, mi tana amu kaekae mamu padaleau inau.

Hosea 9:3

Igamu na tinoni ni Israel sauba e utu nogo kamu totuvisu tana nina kao na Taovia, ma nimui aqo nomoa kamu visutugua tana Ejipt, ma kamu gania na mutsa e vali vanigamu na ganiana i laona na Asiria.

Jeremia 31:23

Na Taovia Susuliga Sosongo, na God ni Israel, e tsaria, “Kalina inau kau adivisugira na tinoni tana niqira kao segeni, mi tana ti igira na tinoni ara totu tana vera sui i laona na butona kao popono tana Juda, sauba kara tsaritugua na goko vaga iani, ‘Na Taovia ke tabua na tetena tabu ni Jerusalem, na nauna i tana aia e totu.’

Isaia 27:13

Mi kalina ke labamai na tagu ia, me sauba kara uvia na tavuli gana kara soavisumaigira sui na Israel ara totutseka i laona na Asiria ma na Ejipt. Migira sauba kara visumai ma kara samasama vanitugua na Taovia i Jerusalem tana nina vungavunga tabu.

Isaia 24:5

Igira segeniqira nogo na tinoni ara naqugasia na barangengo tana kutsiana nina ketsa ma nina vali God, ma na tau manaliana niqira tabana na vaitasogi God e naua kolugira me ngaoa ke totu saviliu.

Isaia 5:12

Tana nimui kavomutsa amu totu matengana moa na taiaqira na itai tatangi, ma na tuqulu, ma na rekesiana na tsetsê, ma na inu uaeni. Mamu tau lelê padagadovia na omea e naua na Taovia.

Isaia 2:10

Sauba kara ba taopoi i laoqira na vatuluma tana tetena vatuvatuga, se kara tsaia na baba i laona na kao, gana kara tovoa na tsogo taniana na korena na Taovia, ma kara taopoi tania na susuligana ma na mararana.

Linge 143:10

Igoe nogo niqu God; ko sasaniau na nauana na omea igoe o kilia kau naua. Ko tobadou vaniau, mo ko mataliau tana sautu dou.

1 Samuel 15:17

Ma Samuel e tsarivania, “Atsa moa ti igoe o tau padaloki segenimu, migoe nogo o taovia vanigira na puku sui tana Israel. Na Taovia nogo e viligo igoe ko lia niqira taovia tsapakae na tinoni ni Israel,

Isaia 32:6

Na tinoni bule e goko bubulega moa, me pada sailaginia moa na nauana na omea seko. Ma na omea e naua me tsaria, e peaginia moa na Taovia. Maia e tau saikesa dona na palaaqira igira ara vitoa, se na tusu gaqira kô igira ara marou.

Mateo 4:5

Ma na tidao seko e adivanoa a Iesu i Jerusalem, na Vera Tabu. Me molokaea i kelana na Vale Tabu, me tsarivania,

Binaboli 9:30

Minau au donagininogoa laka igoe migira nimu mane sasanga amu tau moa vati matagunia na Taovia God.”

Linge 69:27

Ko maretsunâ na turupatuna pipi sui lakalaka niqira sasi; mo ko laka na tamivaniaqira kara sangapata na totu i laona na veramu igoe.

Isaia 32:7

Na tinoni bule e tinoni seko, me naua moa na omea seko. Aia e vorogokona sailagi na perogaqira na sekona lê gana ke toroutsanigira, me ke utukapusia kara adia na pedegoto tana tinete.

2 Taovia Tsapakae 13:6

Migira ara tau goto mololea na nauana na sasi vaga aia Jeroboam na taovia tsapakae e idagana vanigira na Israel, mara naua babâ moa, mara tamia moa na titinonina ko Asera na god daki ke tototu moa i Samaria.

Sasani Sasaga 8:11

?Rongona gua ti e lakagana lê vanigira na tinoni na nausasi? Rongona God e tau dona na kedeaqira tsaku na tinoni ara nauvaganana ia.

Isaia 1:21

Igoe na verabau ni Jerusalem, i sau igoe o totukakai i konina na Taovia, mi kalina ia nimu sasaga e vaga nina sasaga na daki rebi. I sau ara danga sosongo na tinoni e gotolaka niqira sasaga ara totu i laomu, mi kalina ia na tinoni vanga labumate moa ara danga i konimu.