Isaia 1:2 - Ghari

² Na Taovia e tsaria, “!Kagamu na barangengo ma na masaoka kamu ka rongomia na omea inau au tsaria! Igira nogoa na baka inau au lokisigira ara tû mara sove taniau inau.

Isaia 1:2 Referans Kwoze

Na Vaolusi Ketsa 32:1

“Kagamu na barangengo ma na masaoka, kamu ka rongomia niqu tsaqina goko, kamu ka rongomi vatavidoua na omea kau tsaria.

Na Vaolusi Ketsa 30:19

Mi kalina ia inau au molovanigamu kamu vilivotâ na omea amu ngaoa, na mauri se na mate, nina vangalaka se nina vealagi God, minau au soakaira na baragata ma na barangengo kara ka sanga na rorongo tana vivili amu naua. Kamu vilia na mauri.

Mika 1:2

Kamu rongomia na omea iani igamu na tinoni sui. Eo, igamu sui amu mauri tana barangengo kamu rorongo mai. Aia nogo na Taovia God sauba ke taimatamui. !Kamu rorongovata! Aia e totu tana valena tabu i gotu i baragata me gokomai vanigamu.

Na Vaolusi Ketsa 4:26

Inau au soakaira na baragata ma na barangengo kara ka sanga na rongo vataviana na goko inau au naua i dani eni. Me ti vaga igamu kamu petsakoe, me sauba ke tau lelê oka ma kamu nangaligi lê tania na kao ia. Sauba kamu tau mauri oka tana kao i tabana bâ na Kô Jordan aia e varangi nogo kamu ba totuvia. Igamu sauba kamu nangaligi lê saikesa.

Linge 50:4

Aia e soakaira na gotu ma na lao kara ka mai reia kalina aia ke pedevotagira nina tinoni.

Malaki 1:6

Na Taovia Susuliga Sosongo e tsarivaganana vanigira na manetabu, “Na baka mane nina aqo ke kukuni tania na tamana, ma na maneaqo ke kukuni tania gana taovia. ?Minau nogo na tamamui, megua vaga ti igamu amu tau pada mamavasiau? ?Minau nogo gamui taovia, megua vaga ti amu tau kukuni taniau? Migamu amu peaau, mamu tû nomoa mamu veisuaau, ‘?Laka ami pea koeguanigo?’

Mika 3:8

Minau, na Taovia e dangaliginiau na susuligana nina tarunga, me sauvaniau na sasaga gana na pedegoto, ma na malagai na katevulagiana niqira sasi na tinoni ni Israel.

Amos 3:1

Igamu na tinoni ni Israel, kamu rongomi vatavia na goko iani aia na Taovia e tsaria tana rongomui igamu, igamu na tinoni popono aia e adirutsumigamu tania na Ejipt.

Esekiel 36:4

Me vaga ia, mi kalina ia, igamu sui na vungavunga, ma na tetena, na masarina kô, ma na poiatsa, migamu sui goto na nauna amu toroutsa, ma na verabau amu totu mangu lê, eo, igamu sui amu lia nogo niqira mani gilu igira na puku tavosi sui ara totu poligamu, kamu rongomia na omea inau na Taovia God au tsaria.

Jeremia 22:29

!Are kiki igoe na kao, na kao, na kao! Ko rongomia na omea e tsarinogoa na Taovia:

Jeremia 6:19

!Ko rorongo goto igoe na barangengo! Inau au alomaia na rota seko loki vanigira niqu tinoni, na vuana nogo niqira pede segeni. Igira ara sove tania niqu ketsa, mara tau goto rongomangaqu.

Isaia 65:2

Eo, inau au vangarau sailagi laka kau soalakagira niqu tinoni, migira ara tsatsarae sosongo mara naua moa na omea seko, mara muria moa na tobaqira segeni.

Isaia 30:9

Igira ara piloligi sailagi moa tania God, mara peropero sailagi, mara sove saikesa na rongomiana nina parovata na Taovia.

Isaia 30:1

Na Taovia e goko me tsaria: “Sauba nomoa ke seko sosongo vanigira igira ara tagao tana Juda, rongona ara piloligi nogo taniau inau. Ara tau muria niqu papada, mara muria moa niqira papada segeni. Ma niqira vekesai ara tavongani naua kolugira na veratavosi ara tau taonia niqu kili inau, mara gini papi datodatoa moa na sasi.

Jeremia 31:9

Migira niqu tinoni sauba kara ngangai ma kara nonginongi vaniau, kalina inau kau tudumivisugira tugua. Sauba kau mataligira bâ tana kô tatave, mi tana sautu atsa tana e utu goto kara tubulagi. Inau au vaga na tamaga vania na Israel ma Epraim e vaga nogo na dalequ botsa ida.”

Jeremia 13:15

!Igamu na tinoni ni Israel, na Taovia e goko nogo vanigamu! Nimui aqo kamu molotsunali segenimui ma kamu rongomia na omea aia e tsaria.

Na Vaolusi Ketsa 1:31

mi tana kaomate. Mamu reigotoa aia e adidou koeguanigamu tana sautu popono tsaumai tana nauna iani, vaga nogo kesa na tamaga e kalagaia na dalena.’

Aqoaqo 4:20

Mi kagami e utu saikesa kami ka kuti na gini goko na omea ikagami segenimami nogo ami ka reia mami ka rongomia.”

Linge 49:1

!Igamu na tinoni sui kamu rongomia na omea iani! Rongovata igamu na toga pipi sui tana nauna,

Isaia 31:6

Na Taovia e tsaria, “Igamu na tinoni ni Israel, igamu amu sasi sosongo i mataqu mamu suamangaqu. !Bâ, mi kalina ia, kamu visumaitugua i koniqu!

Isaia 34:1

!Kamu mai igamu sui na tinoni pipi tana puku! Kamu saikolumai ma kamu rorongo. Na barangengo popono me pipi sui na tinoni ma na omea amu totu i laona kamu mai ieni ma kamu rorongo.

Isaia 63:16

Igoe nogo na tamamami. Kaira a Abraham ma Jakob na mumuamami ara ka tau nogo reigadovigami igami, migoe segenimu nogo Taovia na tamamami, migoe nogo o suivisugami tû mai nogo i sau.

Jeremia 3:22

Kamu visumaitugua, igamu sui lakalaka amu piloligi taninogoa na Taovia; maia nogo sauba ke maurisigamu me ke naua ma kamu totukakai tugua i konina. Migamu amu tsaria, “Eo, igami ami visumainogoa i konina na Taovia rongona aia nogo nimami God.

Esekiel 24:3

Ko tû, mo ko tsarivanigira na tinoni vanga petsakoe girani na gokolia iani inau na Taovia God au tsarivanigira: Moloa na kuki i laona na lake, ma kamu dangaliginia na kô.

2 Taovia Tsapakae 21:22

Aia e sove tania na Taovia niqira God na mumuana, me peagira sui nina ketsa na Taovia.

Mika 1:1

Tana tagu kalina tugira a Jotam, ma Ahas, ma Hesekia ara tu taovia tsapakae tana Juda, maia na Taovia e goko vania a Mika, aia na mane ni Moreset. Na Taovia e saulabati vania a Mika na omea sui girani tana ka rongogira kaira na verabau ni Samaria mi Jerusalem.