Hosea 6:1 - Ghari

¹ Migira na tinoni ara tsaria, “!Ida gita ma ka visutugua i konina na Taovia! Aia nogo e gati ngotsingotsigita; me sauba nomoa ke taligita; aia e bokaligita, me sauba nomoa ke veqoa na bokada.

Hosea 6:1 Referans Kwoze

Na Vaolusi Ketsa 32:39

“ ‘Inau, inau segeni au God; me tagara goto sa god tavosi ke mana. Inau nogo au matesi tinoni, mau maurisi tinoni, mau bokali tinoni mau tali tinoni, me tagara goto ke kesa tangomana ke utusia na omea inau au naua.

Nina Papi A Job 5:18

Igita a dona laka ti vaga God ke bokalia kesa, maia nogo sauba ke talivania na bokana; na limana nogo ia e labuginigo, ma na limana goto nogo ia sauba ke taliginigo.

1 Samuel 2:6

Na Taovia e dona na matesi tinoni ma na maurisivisu tinoni; aia e molovanogira na tinoni tana barangengo na mate, me maurisivisugira tugua igira ara mate nogo.

Hosea 14:4

Ma na Taovia e tsaria, “Inau sauba kau adivisumaigira tugua niqu tinoni i koniqu. Sauba kau galuvegira tana tobaqu popono, rongona au tau nogo kore vanigira.

Isaia 55:7

Igira na tinoni vanga tsutsukibo niqira aqo nomoa kara mololea niqira sautu sasi ma kara olia niqira sasaga, ma kara pilo bâ saikesa moa i konina na Taovia nida God, rongona aia e dona sosongo na galuve, me tsaku na padaleaqira na sasi.

Jeremia 30:17

Minau sauba kau talia na bokamui, ma kamu gini mauri doutugua, atsa moa ti igira gamui gala ara tsaria, ‘Sion e tau nogo reingaoa ke kesa, me tagara goto ke kesa ke boeginia.’ Inau nogo na Taovia au tsaria na omea iani.”

Isaia 2:3

migira niqira tinoni sauba kara tsarivaganana iani, “Ida gita ma ka ba dato tana nina vungavunga na Taovia, tana nina Vale Tabu niqira God igira na Israel. Maia sauba ke sasanigita na omea e ngaoa igita ka naua; mi tana ti ka dona na liu bâ tana sautu aia e vilinogoa vanigita. Rongona igira sui nina sasani na Taovia ara talumai moa i Jerusalem i kelana na Vungavunga Sion; i tana nogo aia e tû te e mologoko bâ vanigira nina tinoni.”

Nina Papi A Job 34:29

“?Me ti vaga God ke tau goto padangaoa na nauana sa omea, me laka tangomana kesa ke vaitsarigana? ?Me ti vaga aia ke poia na ngorana, masei sauba ke reilakana? Maia segenina moa e reitutugu kaputigira na tinoni ma na vera sui,

Hosea 14:1

Igamu na tinoni ni Israel kamu visumaitugua i konina na Taovia nimui God. Nimui sasi segeni nogo e naua mamu gini tubulagi mamu puka.

Jeremia 50:4

Na Taovia e tsaria, “Mi kalina ke labamai na tagu ia, migira sui na toga ni Israel mi Juda sauba kara ngangai, ma kara laveau inau niqira God.

Jeremia 3:22

Kamu visumaitugua, igamu sui lakalaka amu piloligi taninogoa na Taovia; maia nogo sauba ke maurisigamu me ke naua ma kamu totukakai tugua i konina. Migamu amu tsaria, “Eo, igami ami visumainogoa i konina na Taovia rongona aia nogo nimami God.

Isaia 30:26

Ma na vula sauba ke sina maka vaga na aso, ma na aso sauba ke vitu goto kalina ke marara goto bâ, vaga moa na mararana vitu dani ke sai moa konina kesa dani. Ma na omea sui girani sauba kara laba kalina na Taovia ke veqogira me ke taligira na boka aia nogo e bokaliginigira nina tinoni.

Jeremia 33:5

Igira na Babilonia ara maimai nogo na vailabu, me sauba kara dangaliginigira na vale girani na kubuqira igira inau au matesigira tana niqu kore loki ma niqu momosatoba, rongona inau au piloligi nogo tania na verabau iani tana rongona na omea tabaruga sosongo ara naua igira na tinonina.

Linge 30:7

Migoe nogo Taovia o dou vaniau. Mo didikapusiau dou vaga moa ti na vungavunga kakai. Mi muri mo tû mo taopoi taniau, minau au gini matagu loki.

Jeremia 30:12

Ma na Taovia e tsarigotoa vanigira nina tinoni, “Ara bokali sekoligamu, me utu goto ke mavu na bokamui.

Isaia 30:22

Migamu sauba kamu adigira na titinonina nimui god peropero amu lesoviginigira na siliva, migira goto amu tsavu poponoginigira na qolumila, ma kamu tsoniligilegira vaga moa na omea marasibiga, ma kamu gugû ma kamu tsaria, “!Kamu baligi tanigami!”

Sepania 2:1

Igamu na puku na tinoni amu vô na gini vangamâ nimui sasaga tabaru, kamu padasavigira nimui sasi ma kamu pilotoba tsaku nogo,

1 Samuel 7:3

Ma Samuel e tû, me tsarivanigira na tinoni ni Israel, “Ti vaga amu ngao mananâ na pilovisubâtugua i konina na Taovia tana tobamui popono, ma nimui aqo kamu tsoniligigira sui niqira god na veratavosi, ma na nununa lê na god daki ko Astarte. Kamu sausegenimui vanisaikesalia na Taovia, maia segeni moa kamu samasama vania, me sauba aia ke laumaurisigamu tania na limaqira igira na Pilistia.”

Nina Papi A Job 16:9

Eo, God e kore loki sosongo vaniau me sasi votaau; me vusuliau tana tobakore.

Linge 6:2

!Au maluku sosongo nogo Taovia; ko galuveau! Ko sangaau ma kau susuliga tugua; e labe nogo na koniqu popono,

Linge 71:20

Migoe nogo o molomaia vaniau danga na rota ma na omea seko, migoe goto nogo sauba ko aragovisuau tugua, me sauba ko didia taniau na vano tana qilu.

Sasani Sasaga 3:3

Na tagu na labumate ma na tagu na tatali, na tagu na veo vale ma na tagu na logoana.

Isaia 17:7

Mi kalina ke mailaba na dani ia, me sauba na tinoni kara pilo bâ tugua i konina na God tabu ni Israel aia nogo e aqosigira, ma kara nongia ke sangagira.

Jeremia 33:6

Me sauba moa kau maurisitugua na verabau iani ma na tinonina, ma kara dou visutugua, ma kau mologira kara totu raviravi dou tana rago.

Jeremia 50:5

Igira sauba kara veisuâ iava na sautu na vano i Sion, ma kara vano kalea i tana. Igira sauba kara naua kesa na vaitasogi saliu koluau inau, me utu goto kara kutsia.

Tangitangi 3:11

Aia e takuvi tsariau mau gini tova tania na sautu, me gati ngotsingotsiau, me mololeau i tana.

Hosea 11:10

“Sauba igira niqu tinoni kara muriau inau kalina kau kanga loki vaga moa na laeone vanigira gaqira gala. Sauba kara ulomai tsaku i koniqu talu tabana i tasi.

Hosea 12:6

Mi kalina ia igamu na kukuana a Jakob kamu norukakaia nimui God ma kamu visubatugua i konina. Kamu totukakai kalavata i konina, me ke goto nimui sasaga, ma kamu pitudoua nimui God ke mai sangagamu.

Aqo Manetabu 14:48

“Me ti vaga kalina na manetabu ke mai na vilekeana tugua na vale ia, me ke tau reia na voko ke labavisutugua murina kalina ara poro vaolusitugua, maia sauba ke tsarivulagia laka na vale ia e tau nogo kaulinaqu, rongona na voko e nangaligi saikesa nogo.

2 Turupatu Dato 30:6

Mi tana, migira na mane adigoko ara tû, mara liuvia na Juda ma na Israel popono kolua nina leta na taovia tsapakae migira nina mane sasanga, vaga nogo na taovia tsapakae e ketsaligira. Miani nogo na goko e totu i laona na leta ia: “Igamu na tinoni ni Israel, igamu amu matepitsa taninogoa na limaqira na Asiria. Mi kalina nogo ia e dou ti kamu pilovisutugua i konina na Taovia aia tu niqira God a Abraham ma Isaak ma Jakob, rongona aia ke gini pilovisumaitugua i konimui goto igamu.

Nina Papi A Job 22:23

Eo, ma nimu aqo nomoa ko totu palatsuna mo ko pilovisu bâ i konina God, mo ko tsidavaginigira sui lakalaka na sasaga tabaru tania na valemu.

Hosea 3:5

Me sauba ke labamai na tagu i tana igira na tinoni ni Israel kara pilovisutugua i konina na Taovia niqira God, mi konina kesa niqira taovia tsapakae aia na kukuana a David. Mi muri ti igira kara kukuni tania na Taovia, maia ke vangalaka vanigira tugua.