1 Samuel 18:6 - Ghari

⁶ Mi kalina igira na mane vaumate ara visumai tugua i vera murina a David e labumatesia a Goliat, migira na daki pipi tana vera i laona na Israel ara rutsu tania na veraqira na valaleana a Saul na taovia tsapakae. Mara lingena na linge na mage, mara gavai mara rekesia niqira tsetsê mara taia niqira itai tatangi.

1 Samuel 18:6 Referans Kwoze

Tinoni Pede 11:34

Mi kalina a Jepta e visutugua i Mispa verana, maia na dalena daki e rutsumai talu i vale me mai na valaleana, me gavai me rekesia na tsetsê. Aia kesa lelê moa ngiti dalena.

Binaboli 15:20

Maia ko Miriam na propete, na tasina daki a Aaron, e adia nina tsetsê, migira sui na daki ara tsarimurina ara rerekesigotoa niqira tsetsê mara gagavai.

Linge 68:25

Igira na alaala na linge ara idaida i nago, migira ara uvi riga mara taigira na omea tatangi ara maimai i muri, mi levuga buto igira na baka daki ara rerekesia niqira tsetsê.

Binaboli 15:21

Ma ko Miriam e lilinge vanigira me tsaria: “Linge vania na Taovia, rongona aia e mana sosongo gana; aia e tsoni luvusigira i laona na tasi igira sui na ose migira ara sage i koniqira.”

1 Samuel 18:5

Ma David e tangomana pipi tana omea a Saul e ketsalia ke naua, me vaga ia ma Saul e mologinia ke lia niqira taovia nina mane vaumate, mara gini mage sosongo igira sui na tinoni, migira goto nina mane sasanga a Saul.

2 Samuel 1:20

Kamu laka na ba tsarivulagiana tana vera ni Gat, se tana sautu loki i Askelon. Kara tau gini mage igira na daki ni Pilistia; ma kara tau magemage loki na daleqira daki igira na ponotoba.

2 Samuel 6:5

Ma David migira sui na Israel ara totu kolua ara gagavai mara lilinge tana susuligaqira popono gana na tsonikaeana na Taovia. Mara taigira niqira itai tatangi, ma niqira tuqulu, ma niqira kuku, mara rekesia niqira tsetsê.

Linge 68:11

Ma na Taovia e saua nina ketsa vanigira, migira danga na daki ara adibamaia na turupatuna mara tsaria,

Linge 149:3

Tsonikaea na asana ma kamu gavai vania; taigira na kuku ma na itai tatangi tana tsonikaeana.

Isaia 30:32

Mi kalina na Taovia ke tsoni gaqira tsari babâ moa, migira nina tinoni segeni sauba kara gini muri tsakutua na tatangina na kuku ma na itai tatangi. God segenina nogo sauba ke vailabugi kolugira na Asiria.