Wugubule 20:4 - I CILAGANE CIPYA 1991

⁴ Nghawona magoda ge citemi hamonga ne wanhu wono wali wagekaliye. I wanhu wawo, wakapegwa vilungo vyo kulingʼaniza. Nghawona kanyhi nha vivilya izinhumbula za wono wadumulwa mitwe yawo ku soko ya kumuganula Yesu, na ku soko yo kuyiganula nghani yo Mulungu. Wawano wo wawo wono si walihemba lilimu lililya hamonga ne cihwani calyo, kanyhi hamba si wawicilwa citanjilo mu mahanda go wusu wawo, hamba mu miwoko yawo. Wakawumipa kanyhi, no kutema hamonga na Kilisito myaka elufu monga.

Luganuzi Luswanu Kuli Wanhu Wose 2002

⁴ Nghawona magoda ge citemi hamonga ne wanhu wono wali wagekaliye. I wanhu wawo, wakapegwa vilungo vyo kuling'aniza. Nghawona kanyhi ne zinhumbula za wono wadumulwa mitwe yawo ku soko yo kumuganula Yesu, na ku soko yo kuyiganula nghani yo Mulungu. Wawano wo wawo wono si walihemba lilimu lililya hamonga ne cihwani calyo, kanyhi hamba si wawicilwa citanjilo mu mahanda go wusu wawo, hamba mu miwoko yawo. Wakawumipa kanyhi, no kutema hamonga na Kilisito myaka elufu monga.

Wugubule 20:4 Referans Kwoze

Matayo 19:28

Yesu yakawalonjela, yakatya, “Ane nghumulonjelenyi mbeka, vyono u Mwana wo Munhu yalaza kwikala mwigoda lye nhojo, lyo lukumyo lwakwe, mu yinze yimhya, nanye mono mukunhyatya, molokwikala mu magoda ikumi na mejete, akuno mukuzilingʼaniza izinghungugo ikumi na nyejete za Isilayeli.

Wugubule 6:9

Hanyuma kanyhi u Mwana we ngholo yakacinamatula i cinamatizo ce hano. Ale hasi ye cikumbicilo co kufusiza wuvumba, nghawona awalya wono wawulagwa ku soko ye nghani yo Mulungu, na ku soko yo kuyiganula.

Wugubule 3:21

“Wono wosuma, ale wawo nowekaza hamonga nane mwigoda lyangu lyo wutemi nha vyono ane no mweneco nasuma, nghawa kwikalana hamonga na Baba mwigoda lyakwe lyo wutemi.

2 Timoteyo 2:12

Na hono cijendelele no wukangalile, ale, colotemana nayo nha vivyo. Ninga hono cimukane, ale, kolocikana nayo nha vivyo

Wugubule 20:6

Wena nyemo, kanyhi wamotile muno, wawo wose wono wakuhanga mu wuzuce wuwuno wulongozi. Hambi i lifwa lye kejete nha lyowa lisina vilungo kanyhi muli wene, nawo wowa wakohani wo Mulungu na wa Kilisito, nawo wotemana hamonga nayo, myaka elufu monga.

Luka 22:30

Musume kulya no kungʼwa ha wulilo wangu mu wutemi wangu. Nanye molokwikala mu magoda go wutemi mukugalingʼaniza makungugo ikumi na mejete ga Isilayeli.”

Wugubule 22:5

I cilo si colokwijela kanyhi, hamba si wolosaka wuzelu we tala hamba weʼzuwa, hambi u Muwaha Mulungu nha kowamulicila, nawo wotema cibitilila ne cibitilila.

Wugubule 12:11

Nawo iwandugu zetu wakamusuma ku so sakami yo Mwana we ngholo, na kwe vilungo vye imbeka yono wayiganula, kanyhi wawuwona u wumi wawo si cinji, hamba wafwe.

Wugubule 1:9

Ane yo nene Yohana u ndugu yenyu, na mu wilunza na Kilisito, nghuhanga hamonga nanye mu wukangalila magayo gono gakuwagana wose wono wali mu wutemi wakwe. Ane nawikwa mu cizingwa ca Patimo, ku soko yo kuyiganula nghani yo Mulungu ne mbeka ya Yesu.

Walumi 8:17

Holeka vyono ase cili wana wo Mulungu, ale cawubocela uwumoti wose wo Mulungu wono yawawiciye iwanhu wakwe, kanyhi cohanga uwuhazi wuwo hamonga na Kilisito, hambi hono cihanje uwugaye wakwe Kilisito, cohanga kanyhi no lukumyo lwakwe.

Wugubule 15:2

Nghawona cinhu cihwanile lilenga nha cilole, lyono lihangahanjlie no moto. Nghawawona ne wanhu wa walya nha vivyo, wono walisuma lilimu lilya hamonga ne cihwani calyo, i lilimu lyono litagwa lyalyo likutambulwa mu nzila ye liwalo lililya. Ne wanhu wawo wali wemile heʼlenga lye cilole, akuno wena ne masumbi gono Mulungu yawapela.

Wugubule 14:11

Lyosi lyo moto wo wugazwe wawo, lifunghaga cibitilila ne cibitilila. I wanhu wawo langa wono walihembaga lilimu lilyo hamonga ne cihwani calyo, kanyhi wakawicilwa ne citanjilo ce litagwa lyalyo, wawo wolowa wasina wucehe wo wose ku misi na ku cilo.

Wugubule 11:7

Ninga kolo weza wakondya kuyiganula nghani yiyo yo Mulungu, nimu yono yolawila mwikombo lyo wuninyina, yokwihoma nawo, nayo yowasumiza no kuwawulaga.

Yohana 14:19

Hakali hadodo we yinze, si wowa kumbona kanyhi, anye langa mombona, na vyono ane nili mumi, na nyenye nanye mowa womi.

Wugubule 17:8

I lilimu lilyo lyono wuliwene lyono lyali lyumi hamwamulizo, ninga aluno lyakondya kufwa. Ninga hamba nha vivyo, lili behi lyonanuka kulawa kwikombo lyo wuninyina, ninga lyokongomezwa. Na wono wekaye kononze, wokwizina, heya, wanhu wose wono i matagwa gawo si gandikwa mu citabu co wumi ku wulawa mwamulizo weʼnze, wokwizina muno muno kolo wakuliwona i lilimu lilyo lyono ha mwamulizo lyali lyumi, hanyuma likafwa, na aluno likwijela kanyhi!

Wugubule 11:15

Hanyuma, nayo malayika wo mupunghati yakayitowa ndulele yakwe. Ne mazi mawaha gakahulikwa ku wulanga gakutya, “Alu u wutemi wa mononze, weza wo Muwaha wetu na Kilisito wakwe. Nayo kotema cibitilila ne cibitilila.”

Wugubule 11:11

Ninga vyaza kuwa vyapuluta vilo vivyo vidatu ne pinga, u muhe wo wumi wukalawa kuli Mulungu wukawenjila wawo wawizi wejete, nawo wakenuka wakema wima, na wose wono wawawona, wakenjilwa na woga wuwaha.

Wugubule 11:3

Nane nowatuma wahomelezi wangu wejete, ho wayiganule i nghani yo Mulungu mu cipango cico ce vilo elufu monga na magana mejete na makumi mutandatu, akuno wowa wavwalile vivwalo vye magunila.”

Walumi 11:15

Hambi hono yiwe u wulemwe wawo wukayiletela iyinze u wilamule no Mulungu, alu ho yowa wule mu cipango cono wovumililwa no Mulungu? Iwafu wolozuka!

Luka 1:17

Kolowapitula wenji wa muli wana wa Isilayeli wamupitucile Muwaha Mulungu wawo. Nayo komulongolela Muwaha yakutongwa mu vilungo na mu Muhe kotya Eliya, no kuwalamula wasogo zo munhu ne wana wawo. Kowanoza we cibede wawe mu mahala ge we lingʼani kumuwikaniziza u Muwaha wanhu wakwe.”

Maluko 9:11

Nawo wakamuwuza Yesu, wakutya, “Alu iwejizi wo Wulajilize nha watezaga vyono yinojeye Eliya yamule kuza?”

Maluko 6:27

Ale, umutemi yakamulajiliza umusilikale yakabita, yakamudumula mutwe Yohana mumo mu jela,

Maluko 6:16

Ninga Helode yaza kuzituga zinghani zizi, yakatya, “Yuyu yo Yohana! Namudumulo mutwe, ningaʼlu yazuka.”

Matayo 24:10

Na mu vilo vivyo, wanhu wenji wolowuleka u wihuwilo wawo wolokwigalucila weneco wose no kwisula.

Luka 14:14

nagwe kolugutizwa, hambi nha wasina vyo kukuhaliza; nagwe kolohalizwa no Mulungu ha wuzuce wa we lingʼani.”

Wugubule 1:2

nayo Yohana yakazilonga zose zono yaziwona. Awuno wo wuhomelezi wakwe kuli ze nghani yo Mulungu ne mbeka yono yagubulwa na Yesu Kilisito.

Wugubule 2:26

Wono wosuma no kukamisa sunga ko ku ndumo, hamonga no kwituma zo wuhile wangu, wawo nowapela wulajilize muli makungugo.

Wugubule 4:4

Hakawa hogali magoda makumi mejete na mane gono gali galipilime ligoda lyo wutemi, na mu magoda gago, wali wekaye wawaha makumi mejete na wane, nawo wali wavwalile vivwalo vizelu, na mu mitwe yawo, wali wavwalile mikumbo ya zahabu.

Wugubule 7:3

nayo malayika yuyo yakatya, “Mulece kuyihodanga yisi, hambe malenga, hambe mabici, sunga kolo cakondya kuwawicila citanjilo mu wusu wawo, i wetumami wo Mulungu wetu.”