Wugubule 15:2 - I CILAGANE CIPYA 1991

² Nghawona cinhu cihwanile lilenga nha cilole, lyono lihangahanjlie no moto. Nghawawona ne wanhu wa walya nha vivyo, wono walisuma lilimu lilya hamonga ne cihwani calyo, i lilimu lyono litagwa lyalyo likutambulwa mu nzila ye liwalo lililya. Ne wanhu wawo wali wemile heʼlenga lye cilole, akuno wena ne masumbi gono Mulungu yawapela.

Luganuzi Luswanu Kuli Wanhu Wose 2002

² Nghawona cinhu cihwanile lilenga nha cilole, lyono lihangahanjile no moto. Nghawawona ne wanhu wa walya nhavivyo, wono walisuma lilimu lilya, hamonga ne cihwani calyo, i lilimu lyono litagwa lyalyo likutambulwa mu nzila ye liwalo lililya. Ne wanhu wawo wali wemile he'lenga lye cilole, akuno wena ne masumbi gono Mulungu yawapela.

Wugubule 15:2 Referans Kwoze

Wugubule 4:6

Na hamwande ye ligoda lyo wutemi, hali ho cili cinhu cinji cono cihwanile malenga ga cilole, ne malenga gago gakawa gakungʼalala kotyeʼbwe lyono likungʼalala muno muno. Na mu mbavu zose ze ligoda lilyo lyo wutemi, mu wupilime walyo, kwali kovili viwumbwa vine vyumi. Ne viwumbwa vivyo vikawa vimemile meso, ku mwande na kunyuma.

Wugubule 12:11

Nawo iwandugu zetu wakamusuma ku so sakami yo Mwana we ngholo, na kwe vilungo vye imbeka yono wayiganula, kanyhi wawuwona u wumi wawo si cinji, hamba wafwe.

Wugubule 5:8

Nayo yaza kucisola citabu cico du, avilya viwumbwa vine hamonga na walya wawaha wanzehe makumi mejete na wane, wakagwa funama hamwande yo Mwana we ngholo. Nawo wose wali wena visumbi na bakuli za Zahabu, zono zali zimemile wuvumba, go malombo ge wanhu wo Mulungu.

Wugubule 21:18

Ne lijinji lye likaya lilyo, lyali lizenjeywe mabwe madunghu go wuguzi wukamu, ne likaya lyeneco lyali yizenjelwe zahabu swanu muno, zono zikungʼalala nha cilole.

1 Petelo 1:7

Ne nhunizo yayo, anye ho musume kukangazwa mu wihuwilo wenyu. Hambe zizahabu zenezo, zono zihodanjikaga, zijelagwa no moto, nhavivyo sunga no wihuwilo wenyu, wono yo sawo kuciza zizahabu, siwoleka kujelwa ho wuwe wuli vilungo. Hanyuma ho mubocele lilumbo no lukumyo no wutogoze, lizuwa lilyo kolo Yesu Kilisito yakugubulwa.

Matayo 3:11

Ane nghumubaputizenyi mu malenga, kulajila nha vyono mwanena. Ninga ayulya mono yakuza mu nyuma yangu, yo we vilungo yanyhizize na nene. Hamba ane si nghwiliye kuwudinghula ne malatu gakwe. U Mwene ko mubaputizenyi ko Muhe Mono Yelile no ko moto.

Wugubule 13:14

Likawajiliza wanhu wenji wono wekaye mononze, ku so mapoto gago gono lyapegwa liganoze ha mwande ya alilya lilimu lilongozi. Nalyo lilimu lilyo likawalonjela wanhu wono wekaye mononze, wanoze cihwani so kulipela yilumbo lilyo lilimu lyono lyali lina likomele yiwaha muno lyono lyatemangwa no mumaje, ninga alu likuwumipa kanyhi.

1 Petelo 4:12

Nye wandugu zangu wendece, mulece kwizina ze majelo mawaha gono gakumuzizenyi mukutuga yiwe nha mukuzizwa na cinhu cijenzi.

Wugubule 13:1

Hanyuma nghawona yilimu linji likulawa kwilenga. Nalyo lyali lina mitwe mupunghati ne mahembe ikumi, ne mahembe gose limonga limonga lyali lina mukumbo. Ne litagwa lye nhovu kuli Mulungu, lyali lyandikwe mu mitwe yiyo.

Wugubule 13:17

I lilimu lilyo likalemezeza lukulu munhu wo wose yalece kugula hamba kuguza cinhu co cose, langa munhu yuyo du mono yena citanjilo cico, ce litagwa lye lilyo lilimu, hamba liwalo lye litagwa lilyo.