रोमियों 5:17 - Garhwali

¹⁷ अर या बात सच्‍च च कि एक मनखि का अपराध का द्‍वारा मौत सब लोगु पर राज करण लगि गै। मगर वु लोग जु पिता परमेस्वर की भरपूर किरपा से वेका समणि सच्‍चु होण का दान तैं अपणा जीवन मा स्वीकार करदिन, ऊ लोग यीशु मसीह का द्‍वारा जीवन तैं पाला, अर वेका द्‍वारा राज भि करला।

गढवली नयो नियम

¹⁷ किलैकि जब एक मनिख का पाप का कारण सभि लुखुं कु मृत्यु ऐ, त जु लोग दया अर धर्मी हूंण कु वरदान बिज्यां पौदींनि, उ एक मनिख का यानि यीशु मसीह का द्वारा पाप अर मृत्यु पर जीत पाला।

रोमियों 5:17 Referans Kwoze

रोमियों 5:12

हे मेरा भै-बैंणो, जब पितर आदम न पिता परमेस्वर की आज्ञा तैं तोड़ि, त पाप वेका द्‍वारा ईं दुनियां मा ऐ। अर आदम का वे पाप न मौत तैं जनम दिनी, ज्यां की वजै से आज मौत सब लोगु मा फैली गै, इलै सब लोग पापि छिन।

1 कुरिन्थि 15:49

अर जन आदम तैं माटा बटि बणयै गै, इलै हमरु रुप भि वेकी तरौं ही च। अर ठिक उन्‍नि दुसरो मनखि यीशु जु कि स्वर्ग बटि ऐ, इलै हमरु सरील भि वेकी तरौं स्वर्ग को ही होलु।

यूहन्ना 10:10

अर चोर त केवल चोरी करणु खुणि, जान से मरणु खुणि अर नास करणु खुणि ही औन्दु। पर मि त इलै अयूं छौं, कि तुमतै जीवन मिलु, अर भरपूरी से मिलु।

2 तीमुथियुस 2:12

अर अगर जु हम यीशु मसीह का दगड़ा मा सबर रखी के दुख उठाणा रौला, त वेका दगड़ा मा राज भि करुला। अर अगर जु हम वेतैं स्वीकार नि करुला, त उ भि हमतै स्वीकार नि करलु।

दिब्य दरस 22:5

फिर उख कभि भि रात नि होलि अर ना ही ऊंतैं सूरज या द्‍यू का उज्याळा की जरुरत होलि, किलैकि प्रभु परमेस्वर खुद ऊंको उज्याळु होलु, अर ऊ हमेसा-हमेसा तक राज करला।

दिब्य दरस 20:4

तब मिन राजगद्‍दी देखि अर ऊं लोग की आत्माओं तैं भि देखि जु कि राजगद्‍दी पर बैठयां छा, जौं का मुण्ड़ यीशु की गवै देण अर परमेस्वर का वचन तैं बतौण की वजै से कटै गै छौ। अर यू वु आत्मा छिन जौं तैं परमेस्वर न न्याय करण को अधिकार दिनी। अर यों न नऽ त दैंत की, अर ना ही वेकी मूरत की पूजा कैरी, अर ना ही अपणा माथा या हाथ पर वेकी मोर लगवै, वु सब ज्यून्दा ह्‍वे गैनी, अर ऊंन राजा बणि के मसीह का दगड़ा मा एक हजार साल तक राज कैरी।

दिब्य दरस 3:21

“जु जीत हासिल करलु, वेतैं मि अफ दगड़ा राजगद्‍दी पर बिठौलु, ठिक जन मिन जीत हासिल कैरी अर मेरा पिता न मितैं अपणी राजगद्‍दी पर बैठे।

1 पतरस 2:9

पर तुम लोग परमेस्वर का द्‍वारा चुण्यां वंशज छाँ, अर राजा खुणि खास पवित्र पुरोहितों को समाज, जौं पर पिता परमेस्वर को अधिकार च। अर पिता परमेस्वर न ही तुमतै अन्धेरा मा बटि निकळि के अपणा महान उज्याळा मा बुलै, इलै अब तुम वेका कामों का बारा मा वेकी तारीफ कैरा।

फिलिप्पी 3:9

अर अब मिन नियम-कानून को पालन कैरिके पिता परमेस्वर की नजर मा धरमी साबित होण बन्द कैरियाली। अर इन मिन इलै कैरी, किलैकि अब मि यीशु मसीह पर बिस्वास करदु, इलै परमेस्वर न मितैं अपणी नजर मा धरमी साबित कैरियाली। अर वेकी नजर मा धरमी बणण यीशु मसीह पर बिस्वास करण का द्‍वारा होन्दु।

1 तीमुथियुस 1:14

अर मि पर प्रभु की किरपा भरपूरी से ह्‍वे, अर ईं किरपा का दगड़ा मा मितैं बिस्वास अर प्यार भि मिली, अर यू यीशु मसीह का दगड़ा मा जुड़यां रौण से मिली।

याकूब 2:5

हे मेरा प्यारा भै-बैंणो, सुणा, दुनियां का लोगु की नजर मा जु गरीब छिन, ऊंतैं परमेस्वर न चुणी। ताकि ऊ बिस्वास मा भरपूर ह्‍वे जा, अर परमेस्वर बटि प्यार करण वळो तैं जै राज को हकदार होणो को करार वेन कैरी, वेका हकदार वु बणि जा।

दिब्य दरस 1:6

अर वेन हमतै परमेस्वर का राज का लोग, अर अपणा पिता परमेस्वर की सेवा करण खुणि पुरोहित भि बणै, अर वेकी बडै अर ताकत सदनि तक रौ। आमीन।

1 कुरिन्थि 4:8

अरे, तुम मा त बिजांम च अर तुम मा ह्‍वे गैनी छक रुपया, मगर तुम त हमरा बगैर ही राज करण लगि ग्यां। कास, या बात सच्‍चि होन्दी, कि तुम राजा बणि के राज कना रौन्दा, अर हम भि तुमरा दगड़ा मा राज करदा।

रोमियों 6:23

किलैकि पाप की ध्याड़ि मौत च, मगर जु लोग प्रभु यीशु मसीह पर बिस्वास करदिन, ऊं पर पिता परमेस्वर दया कैरिके सदनि को जीवन देन्दु।

रोमियों 5:20

अर परमेस्वर न नियम-कानून इलै दिनी, ताकि सब लोगु तैं ईं बात का बारा मा पता चलि जौ कि ऊ भौत बड़ा पापि छिन, मगर वेका दगड़ा-दगड़ि पिता परमेस्वर की किरपा भि ऊं लोगु खुणि और भि जादा बढदी गै।

मत्ती 25:34

तब राजा अपणा दैंणी तरफा वळो कू बोललु, ‘मेरा पिता बटि आसीस पौण वळो, आ, अर वे राज्य का अधिकारी ह्‍वे जा, जु दुनियां की शुरुवात बटि तुम खुणि तयार कैरिके रख्युं च।

रोमियों 8:39

अर ना ही कुई गैरी जगा, अब चै ईं दुनियां मा कुई भि हो उ हमतै हमरा पिता परमेस्वर का प्यार से, जु की हमरा प्रभु यीशु मसीह का द्‍वारा हम पर परगट ह्‍वे वेसे अलग नि कैरी सकदु।

रोमियों 5:15

मगर पितर आदम अर वु मनखि एक जन नि छिन, किलैकि पिता परमेस्वर का द्‍वारा दियूं दान आदम का पाप का जन नि च। हे मेरा दगड़्यों, या बात सच्‍च च कि आदम का पाप का द्‍वारा मौत ईं दुनियां मा सब लोगु खुणि ऐ गै, मगर फिर भि पिता परमेस्वर की किरपा हम सभ्यों खुणि भौत बड़ी च, किलैकि अब यीशु मसीह का द्‍वारा सब लोगु तैं अपणा-अपणा पापों से माफी पौण को दान पिता परमेस्वर बटि मुफत मा मिली गै।

रोमियों 6:14

अगर जु तुम इन करिल्या, त तुम पर पाप को कुई अधिकार नि होलु, किलैकि अब तुम नियम-कानून का अधीन मा नि छाँ, बल्किन मा परमेस्वर की किरपा का अधीन ह्‍वे ग्यां।