लूका 10:42 - Garhwali

⁴² देख, मरियम न वु अच्छु हिस्सा चुण्यालि जु वीं बटि कभि भि लिये नि जालु, अर देख सबसे पैलि येकी ही जरुरत च।”

गढवली नयो नियम

⁴² पर एक ही बात की चिंता कन जरूरी च मार्था की बैंण मरियम ल ईं बात तैं खोज्याली अर उ वे बट्टी दूर नि किये जालो।

लूका 10:42 Referans Kwoze

यूहन्ना 4:14

पर जु कुई भि मेरा दियां पाणि मा बटि प्यालु, वेतैं फिर सदनि तक तिस नि लगली, किलैकि जु पाणि मि वेतैं द्‍यूलु, उ वेमा बटि सदनि तक उछ्लण-कुदण वळु जीवन को एक छोया जन बणि जालु।”

यूहन्ना 5:24

“अर मि तुम बटि सच्‍चि ही बोन्‍नु छौं, कि जु कुई मेरा वचनों तैं सुणी के मेरु भेजण वळा पर बिस्वास करदु, त जाणि ल्या की सदनि को जीवन वेकू ही च। अब वे पर दण्ड की आज्ञा नि ह्‍वेलि, किलैकि वेन मौत तैं भि पार कैरियाली अर वेतैं सदनि को जीवन मिली गै।

लूका 18:22

अर यू सुणी के यीशु न वेकू बोलि, “त्वेमा अभि भि एक बात की कमी च। इन कैर कि जु कुछ भि त्वेमा च, ऊ सब कुछ बेचि दे अर वे बटि जु कुछ भि मिललु वु सब गरीबों मा बांटि दे, अर ऐके मेरु चेला बणि जा तब त्वेतै स्वर्ग मा खजानु मिललु।”

यूहन्ना 17:3

अर वु सदनि को जीवन यू च, कि तुम ही एकमात्र सच्‍चा परमेस्वर छाँ, अर तुमतै ऊ सभि पछ्याणी जा अर इन भि जाणि जा, कि मि यीशु मसीह तैं तुमुन ही भेजि।

मरकुस 8:36

अर अगर कुई मनखि पूरा संसार की हर चीजों तैं हासिल कैरी द्‍यो, मगर उ सदनि का जीवन तैं ख्वे द्‍यो त वेतैं फिर क्या फैदा होलु?

लूका 8:18

इलै ध्यान द्‍या, कि तुम क्या सुनणा छाँ। किलैकि जु कुई भि परमेस्वर का राज तैं बिंगणे की इच्छा रखदु, वेतैं वेका बारा मा बिंगण को और भि जादा ज्ञान दिये जालु। मगर जु मनखि इन सोचदु, कि मितैं भौत ज्ञान च, त वे बटि वु ज्ञान भि छिनै जालु।”

लूका 12:20

पर परमेस्वर न वेकू बोलि, ‘अरे मूरख, अगर आज राति ही तेरु पराण त्वे बटि ले लिये जौ, त इन बतौ जु कुछ भि तेरु इकट्‍ठा कर्युं च, उ सब कै को होलु?’”

1 कुरिन्थि 13:3

अर अगर मि अपणी पूरि धन-दौलत गरीब लोगु मा बांटि द्‍यूं, अर अपणा सरील तैं आग मा भि बलिदान होण खुणि दे द्‍यूं, मगर दुसरा लोगु तैं मि प्यार नि कैरुं त यों सब बातों को कुई भि फैदा नि च।

लूका 12:33

अर जु कुछ तुमरा पास च वेतैं बेचि के जरुरतमन्द लोगु तैं दे द्‍या। अर स्वर्ग मा अफु खुणि इन्द्रया बटुवा बणावा जु कभि पुरणा नि होनदिन, अर वामा अफु खुणि इन्द्रयो धन इकट्‍ठा कैरा, जु कभि खतम नि होन्दु अर जैका नजदीक चोर नि ऐ सकदु अर ना ही वे पर कभि कीड़ु लगदु।

लूका 16:25

पर अब्राहम न बोलि, ‘बेटा, याद कैर तिन अपणा जीवन मा वु सब कुछ पै ज्यां की त्वेतै जरुरत छै, जब की लाजर न खैरि खै मगर अब वेतैं इख सुख-शान्ति मिलणी च, अर त्वेतै उख खैरि।

गलातियों 5:6

अर जब हम यीशु मसीह पर बिस्वास करद्‍यां, त वेका बाद खतना का रिवाज तैं पूरु करण या नि करण से कुई फैदा नि च, पर केवल बिस्वास ही च जु कि दुसरा लोगु पर हमरा प्यार की छाप तैं लगौन्दु।

लूका 16:2

तब सेठ न वे कर्ता-धर्ता तैं बुलै अर वेकू बोलि, ‘तेरा बारा मा मि यू क्या सुनणु छौं? अपणा काम को हिसाब-किताब बतौ, किलैकि अब तिन कर्ता-धर्ता नि रौण।’

लूका 10:39

अर वीं की एक बैंण छै, अर वींको नौ मरियम छौ। अर मरियम प्रभु यीशु का खुटों का पास बैठि के वेका वचनों तैं सुनणी छै।

लूका 11:1

एक बार यीशु कै जगा मा प्रार्थना कनु छौ। अर जब वेन प्रार्थना कैरियाली छै, तब वेका एक चेला न वेकू बोलि, “प्रभु, जन यूहन्‍ना बपतिस्मा देण वळन अपणा चेलों तैं प्रार्थना करण सिखै ठिक उन्‍नि तुम हमतै भि सिखै द्‍या।”

यूहन्ना 6:27

तुम नास होण वळा खाणु खुणि ना, बल्किन मा वे खाणुक खुणि मेनत कैरा जु कि सदनि का जीवन तक रौन्दु। अर उ खाणुक मनखि को पुत्र ही तुमतै द्‍यालु, किलैकि यू देणु खुणि पिता परमेस्वर न वेतैं यू अधिकार दियूं च।”

यूहन्ना 11:1

यहूदिया मुलक का बैतनिय्याह गौं मा लाजर नौ को एक मनखि छौ अर उ बिमार पोड़्यूं छौ। वेकी दुई बैंण मरियम अर मारथा छै। (या वा ही मरियम च, ज्वा बाद मा प्रभु यीशु का खुटों मा खुशबुदार तेल डालि के अपणा बाळो से फुंजन्दी च)।

यूहन्ना 11:19

तब मारथा अर मरियम का घौर ऊंका भै की मौत पर पस्तौ करणु कू भौत सरा यहूदी लोग अयां छा।

यूहन्ना 12:3

तब मरियम करीब अधा माणि असली खुशबुदार तेल तैं लेके ऐ, जु कि जटामांसी पौद को बणयूं छौ अर बड़ु कीमती छौ। अर वींन वे तेल तैं यीशु का खुटों मा डालि अर अपणा बाळो से वेका खुटों तैं फुंजण लगि गै। तब वे खुशबुदार तेल की खुशबु से घौर मैहकंण लगि गै।