इब्रानी 6:18 - Garhwali

¹⁸ अर करार अर कसम की दुई बातों तैं कभि बदलै नि जै सकदु, किलैकि पिता परमेस्वर कभि भि झूठ्‍ठ नि बुल्दु। इलै हम बिस्वासी लोग जु कि वेकी हिफाजत मा रौणा छां, हम सभ्यों तैं बड़ी हिम्मत रखी के अपणी-अपणी आस वे पर बणै के रखण चयेणी।

गढवली नयो नियम

¹⁸ त फिर यु द्वी बात छिनी परमेश्वर कु वादा अर दुसरा वेकी सौं जु कभी भि नि बदल सकदी अर पिता परमेश्वर कभी झूठ नि बुल्द; इलै जु हम पिता परमेश्वर का नजीक सुरक्षा पांणु कु अयां छा अर जु आस वेल हम तैं द्ये, वे तैं थामि के छा, अर भौत खुश छा।

इब्रानी 6:18 Referans Kwoze

तीतुस 1:2

अर यू सब मि इलै कनु छौ, ताकि परमेस्वर का लोग ईं आस मा रा, कि ऊंतैं सदनि को जीवन मिली सैको। अर परमेस्वर कभि झूठ्‍ठ नि बुल्दु, दुनियां की शुरुवात से पैलि वेन ही हम खुणि सदनि को जीवन देणो को करार कर्युं च।

2 तीमुथियुस 2:13

अगर जु हम बिस्वास नि करुला, त तभि भि उ हमरा दगड़ा मा बिस्वास का लैख बणयूं रालु। किलैकि उ अपणी बात बटि मुकुरदु नि च, अर ना ही झूठ्‍ठ बुल्दु।

रोमियों 3:4

ना इन कभि नि ह्‍वे सकदु। सुणा, दुनियां को हरेक मनखि झूठ्‍ठु साबित ह्‍वे सकदु च, मगर पिता परमेस्वर ही च जु कि अपणा वचन को पालन करदु, इलै वेतैं सच्‍चु साबित होण द्‍या। जन कि पवित्रशास्‍त्र मा भि लिख्यूं च अर वा बात इन च कि, “हे मेरा परमेस्वर तुम अपणा मामला मा सच्‍चा छाँ, अर तुम अपणु फैसला बड़ा न्याय से करद्‍यां।”

1 यूहन्ना 1:10

अर अगर जु हम बुल्द्‍यां कि हमुन पाप नि कैरी, त हमुन परमेस्वर तैं झूठ्‍ठु साबित कैरियाली, इन कैरिके हमुन वेका वचन तैं अपणा मन मा जगा नि दिनी।

इब्रानी 3:11

तब मिन गुस्सा मा ऐके इन कसम खै कि, ‘यू लोग मेरा आराम की जगा मा कभि भि दाखिल नि होला।’”

1 तीमुथियुस 1:1

हे मेरा प्यार भै तीमुथियुस, मि पौलुस या चिठ्‍ठी त्वे खुणि लिखणु छौं। अर हमतै बचौण वळा परमेस्वर अर यीशु मसीह न जै पर हमरि अपणी आस रखी च, वेन ही मितैं खास चेला ठैरै के भेजि। तीमुथियुस, तू मेरा सच्‍चा नौना का जन छैई, मि प्रार्थना करदु कि: पिता परमेस्वर अर हमरा प्रभु यीशु मसीह का द्‍वारा त्वे पर वेकी किरपा, शान्ति अर दया होणी रौ।

रोमियों 3:25

अर या पिता परमेस्वर की योजना छै, ज्वा कि वेन मनखि का समणि रखी कि लोग अपणा-अपणा पापों से पस्ताप कैरा। इलै वेन यीशु मसीह तैं ईं दुनियां मा भेजि अर वेको ल्वे क्रूस पर बुगये गै, ताकि जु कुई वे पर बिस्वास कैरो, पिता परमेस्वर वेका पापों अर वे पर लग्यां इळजामो तैं माफ कैरी सैको। अर पुरणा जमना मा वेन लोगु का पापों का हिसाब से ऊंतैं जादा दण्ड नि दिनी अर इन वेन इलै कैरी, किलैकि उ धरमी अर सबर रखण वळु च।

1 यूहन्ना 5:10

अर जु मनखि परमेस्वर का पुत्र यीशु पर बिस्वास करदु, वेन अपणा दिल मा वीं गवै तैं स्वीकार कैरियाली। अर जु मनखि परमेस्वर पर बिस्वास नि करदु वेन वेतैं झूठ्‍ठु ठैरैयालि, किलैकि वेन परमेस्वर की वीं गवै पर बिस्वास नि कैरी ज्वा वेन अपणा पुत्र का बारा मा दे छै।

1 तीमुथियुस 6:12

अर बिस्वास का बाटा बटि भटकी नि जै, बल्किन मा कड़ी मेनत कैर। अर वे ही बिस्वास तैं तिन भौत सा लोगु का समणि कबूल कैरी छौ। अर कखि सदनि का जीवन तैं ख्वे नि दे, ज्यां खुणि परमेस्वर न त्वेतै बुलयूं च।

रोमियों 15:5

अर कै मनखि को सबर रखण अर वेतैं हौसला मिलण यू सब पिता परमेस्वर की तरफा बटि ही औन्दु। अर मि इन प्रार्थना करदु, कि तुम सभ्या का सभि यीशु मसीह का मुताबिक अपणा आपस मा एक मन ह्‍वेके रा, अर या ही वेकी इच्छा च।

इब्रानी 11:7

अर बिस्वास से ही पितर नूह न परमेस्वर की तरफा से वे पाणि की विपदा का बार मा जाणि जैतैं वेन देखि नि छौ, अर वेन परमेस्वर की बात सुणी अर परमेस्वर की आज्ञा माणी के अपणा परिवार तैं बचौणु खुणि पाणि को एक बड़ु जाज बणै। अर इन्द्रया बिस्वास का बानो परमेस्वर न नूह तैं अपणी नजर मा धरमी पै, मगर वे बगत का लोगु न बिस्वास नि कैरी, इलै परमेस्वर न ऊंतैं दण्ड दिनी।

1 थिस्सलुनीकी 1:10

अर वु इन भि बतौन्दिन, कि तुम परमेस्वर का पुत्र को इंतजार बड़ी आस लगै के कना छां, जु की स्वर्ग बटि औण वळु च याने कि यीशु, जैतैं परमेस्वर न मुरदो मा बटि ज्यून्दु कैरी, अर उई न्याय का दिन पर हमतै औण वळा परकोप से बचालु।

कुलुसी 1:27

अर पिता परमेस्वर जौं लोगु तैं इन बतौण चाणु छौ, कि वु सच्‍चु राज कथगा महान च, वेन उ राज अपणा लोगु पर परगट कैरी। अर उ राज सब लोगु खुणि च जु कि इन च कि, पिता परमेस्वर अपणा पुत्र यीशु मसीह की पवित्र आत्मा का द्‍वारा हमरा भितर रौन्दु। अर परमेस्वर का दगड़ा मा रौणु खुणि यीशु मसीह ही हमरि एकमात्र आस च।

कुलुसी 1:23

अर यू सब तभि ह्‍वे सकदु, जब तुम बिस्वास मा बणयां रा अर वेकी बुनियाद मा मजबूत ह्‍वेके टिक्यां रा, अर जु शुभ समाचार तुमुन सुणी वां से मिलण वळी आस तैं नि छोड़ा। अर ये ही शुभ समाचार को परचार हर जगा किये जाणु च, अर मि पौलुस ये काम को सेवक छौं।

लूका 2:25

अर यरूशलेम नगर मा शमौन नौ को एक मनखि छौ, जु की धरमी अर भक्‍त छौ। अर उ इस्राएली लोगु का छुटकारा खुणि मसीह को इंतजार कनु छौ, अर पवित्र आत्मा वे पर छौ।

मत्ती 24:35

आसमान अर धरती को नास ह्‍वे जालु, मगर मेरी बुलिं बात कभि नि टळळि।”

इब्रानी 7:21

किलैकि जब दुसरा लोग पुरोहित का काम खुणि ठैरैये गैनी त परमेस्वर न ऊंका दगड़ा मा कुई करार नि कैरी छौ, मगर जब वेन यीशु तैं ठैरै तब वेन वेका बारा मा करार कैरी छौ। जन की पवित्रशास्‍त्र मा भि लिख्यूं च कि, “प्रभु न कसम खै, कि तू सदनि खुणि एक पुरोहित छैई, अर मिन अपणा मन तैं नि बदळण।”

इब्रानी 3:6

मगर यीशु मसीह पिता परमेस्वर को पुत्र होण का नाता भरोसा का लैख च। अर हम लोग जु कि यीशु मसीह पर बिस्वास करद्‍यां, अगर जु हम अपणी आस अर भरोसा वे पर बणै के रखद्‍यां, त हम पिता परमेस्वर का घौर का छां।

कुलुसी 1:5

अर यू सब हम इलै करद्‍यां, किलैकि तुमुन वीं आस का बारा मा सुणी ज्वा की तुमतै एक नई उम्मीद देन्दी, अर वा ही आस तुम खुणि स्वर्ग मा रखी च। अर ईं आस का बारा मा तुमुन बिस्वास करण का बगत मा वे सच्‍चा शुभ समाचार का द्‍वारा सुण्यालि।

फिलिप्पी 2:1

हे मेरा भै-बैंणो, मि जणदु छौं कि तुम यीशु मसीह पर बिस्वास करद्‍यां, अर वेका द्‍वारा तुमतै प्यार, हौसला अर दिलासा मिलदी। अर वेन तुमरा मनों तैं पवित्र आत्मा का द्‍वारा एक कैरियाली, अर वेन ही तुम पर अपणी किरपा अर दया दिखै।

मत्ती 3:7

अर जब यूहन्‍ना न भौत सरा फरीसी दल का लोगु तैं अर सदूकियों तैं बपतिस्मा लेण कू अपणा पास औन्द देखि, त वेन ऊंकू बोलि, “हे गुरौ का बच्‍चों, तुमतै कैन चितै की परमेस्वर का औण वळा परकोप से दूर भागा?

रोमियों 5:5

अर जब हम वे पर अपणी आस बणै के रखद्‍यां, तब हमतै कुई सरम नि औन्दी, किलैकि पिता परमेस्वर न अपणी पवित्र आत्मा का द्‍वारा अपणु प्यार हमरा मनों मा भरपूरी से दियाली।

इब्रानी 6:17

अर वंश का लोगु खुणि जु-जु करार कियां छिन क्या पिता परमेस्वर ऊं लोगु का खातिर अपणी इच्छा तैं बदलि द्‍यालु, नऽ रे ना इन कभि नि ह्‍वे सकदु। पिता परमेस्वर अपणी मनसा तैं ऊं पर परगट करणु खुणि जरुर पूरि करलु, इलै वेन अपणा करार का बगत मा अपणी ही कसम खै दिनी।