इब्रानी 2:17 - Garhwali

^17-18 इलै या बात भि भौत जरुरी छै, कि यीशु मसीह सब बातों मा अपणा भै-बैंणो का जन बणि जौ। अर वेन खुद दुख उठे, अर शैतान का द्‍वारा भकलै भि गै मगर फिर भि उ खरु निकळि अर इन इलै ह्‍वे, ताकि उ लोगु पर दया करण वळु हो अर ऊं खुणि एक वफादार महा पुरोहित बणि जौ। अर एक बगत औण पर वेन खुद तैं बलिदान का रुप मा चड़ै दिनी, ताकि वेका द्‍वारा पिता परमेस्वर लोगु का पापों तैं माफ कैरी सैको। इलै हे मेरा दगड़्यों, ईं बात तैं याद रखा कि यीशु ऊं लोगु की मदद जरुर करलु, जौं तैं शैतान का द्‍वारा भकलयै जान्दु।

गढवली नयो नियम

¹⁷ इलै ही वे तैं हर ढंग से अपड़ा विश्वासी भयों का जन बनण पोड़ी; इन कै ही प्रभु यीशु पिता परमेश्वर कु उच्च महायाजक बंणि जु कि मयलदु अर विश्वासयोग्य च; अर इलै कि वे बलि का द्वारा जु पिता परमेश्वर कु लांद, कि लुखुं तैं ऊंका पापों बट्टी माफी मिल साको।

इब्रानी 2:17 Referans Kwoze

इब्रानी 4:14

हे मेरा प्यारा भै-बैंणो, हम जणदा छां कि हमरा पास एक महा पुरोहित च जु की सबसे महान च। अर उ पिता परमेस्वर को पुत्र यीशु मसीह च, जु कि वेका पास आसमान मा मथि उठये गै।

इब्रानी 2:14

अर लोग अभि भि बच्‍चों का जन छिन, इलै यीशु मसीह ईं दुनियां मा सरील को रुप लेके ऐ। अर इन इलै ह्‍वे, ताकि वेकी मौत का द्‍वारा यीशु मसीह शैतान को नास कैरी सैको जैका पास मौत तैं लेके औण की ताकत च।

इब्रानी 7:26

अर यीशु मसीह वु पुरोहित च जैमा कुई कपट नि च अर वु पवित्र अर निरदोष च, अर स्वर्ग मा वेतैं हम सब लोगु से जादा आदर-सम्मान दिये जान्दु, किलैकि वु हम पापि लोगु का जन नि च।

रोमियों 5:10

किलैकि पैलि त हम पिता परमेस्वर का दुसमन छा, मगर अब यीशु मसीह की मौत का द्‍वारा हमरु मेल-जोल वेका दगड़ा मा ह्‍वे गै। अर हमतै पूरु यकीन च, कि वेका पुत्र यीशु मसीह को मुरदो मा बटि ज्यून्द होण का द्‍वारा हमतै छुटकारा भि मिललु।

इब्रानी 2:11

इलै यीशु जौं लोगु तैं पवित्र करदु अर जु लोग वेका द्‍वारा पवित्र किये जाण छिन, दुईयों को एक ही पिता च। अर ईं बात की वजै से ही यीशु ईं दुनियां का लोगु तैं अपणु भै-बैंण बोन्‍न मा झिझक मैसूस नि करदु।

इब्रानी 3:5

हे मेरा दगड़्यों, हम जणदा छां कि परमेस्वर का रैबर्या मूसा न ठिक उन्‍नि कैरी, जन वेकू पिता परमेस्वर न बोलि छौ, अर अपणा जमना मा जब वेन सेवा को काम करण छौ, त वेन पिता परमेस्वर का लोगु की देख-रेख कैरी। अर वे बगत मा ही मूसा रैबर्या न ऊं लोगु तैं बतै छौ कि पिता परमेस्वर न औण वळा बगत खुणि क्‍वा जि योजना बणै के रखी च।

कुलुसी 1:21

अर एक बगत वु छौ, जब तुम अपणा बुरा कामों की वजै से पिता परमेस्वर बटि दूर छा, अर तुमरा मनों मा वेका खिलाप बुरै भुरीं छै।

इब्रानी 7:28

ईं दुनियां को मनखि कमजोर अर पापि च फिर भि मूसा रैबर्या का द्‍वारा दियां नियम-कानूनों न ऊंतैं मुख्य पुरोहित का रुप मा चुणी, मगर बाद मा पिता परमेस्वर न कसम खै के अपणा पुत्र यीशु तैं पुरोहित ठैरै दिनी, अर यीशु मसीह हमेसा सब बातों मा खरु निकळदु।

इफिसुस 2:16

अर एक सरील का रुप मा, यीशु मसीह न क्रूस पर अपणी जान दे दिनी, अर वेका द्‍वारा दुई दल का लोगु का बीच की दुसमनी खतम ह्‍वे गै। अर इन कैरिके वेन दुई दल का लोगु को मेल-जोल परमेस्वर का दगड़ा मा करै दिनी।

रोमियों 15:17

इलै जब परमेस्वर की सेवा की कुई भि बात औन्दी, तब मितैं यीशु मसीह को सेवक होण पर भौत बड़ु मोन होन्दु।

इब्रानी 3:2

अर वु पिता परमेस्वर खुणि भरोसामन्द च किलैकि वेन ही यीशु मसीह तैं ठैरै के ईं दुनियां मा भेजि। अर मूसा रैबर्या न भि ठिक इन्‍नि कैरी छौ, किलैकि जु कुछ पिता परमेस्वर न पुरणा जमना मा वे खुणि बोलि छौ, पितर मूसा न वेका मुताबिक ही परमेस्वर का सब लोगु की सेवा कैरी।

इब्रानी 2:16

किलैकि यीशु मसीह स्वर्गदूतों की मदद करणु खुणि नि ऐ, बल्किन मा उ त इलै ऐ ताकि ऊं लोगु कि मदद कैरी सैको, जु कि परमेस्वर पर बिस्वास रखण की वजै से पितर अब्राहम का वंशज छिन।

इब्रानी 3:1

इलै हे मेरा पवित्र भै-बैंणो, पिता परमेस्वर न तुमतै बुलै के अफ खुणि अलग कैरियाली। इलै मि तुमतै बतै देन्दु, कि तुमतै अपणु ध्यान यीशु पर लगौण चयेणु जैतैं पिता परमेस्वर न अपणी तरफा बटि मनखियों खुणि ठैरै के भेजि। अर उ एक इन्द्रयो महा पुरोहित च, जैका बारा मा हम इन बुल्द्‍यां कि हम वे पर बिस्वास करद्‍यां।

इब्रानी 4:15

किलैकि हमरु महा पुरोहित इन्द्रयो नि च जु कि हमरि कमजोरियों का हमरा दगड़ा मा दुखी नि होन्दु हो, मगर उ त इन्द्रयो च जैतैं हमरि ही तरौं कई बार शैतान का द्‍वारा भकलयै गै, मगर फिर भि वेन कुई पाप नि कैरी।

इब्रानी 5:1

अर हम जणदा ही छां, कि यहूदी लोगु मा एक महा पुरोहित तैं मनखियों का बीच मा बटि ही चुणै जान्दु, ताकि उ मनखियों का खातिर पिता परमेस्वर की सेवा कैरो, अर लोगु का कियां पाप खुणि अरपण मा चड़ईं भेंट अर बलिदान तैं पिता परमेस्वर का समणि चड़ै सैको।

इब्रानी 5:2

अर जब परमेस्वर की मनसा लोगु का बिंगण मा नि औन्दी अर ना ही ऊ इन समझदिन कि जु कुछ भि वु कना छिन उ गळत च, तब महा पुरोहित इन्द्रया लोगु का खातिर दया दिखान्दु, किलैकि उ खुद भि एक कमजोर मनखि च।

इब्रानी 5:5

अर ठिक इन्‍नि यीशु मसीह न भि महा पुरोहित का पद तैं पौणु खुणि खुद तैं अफि नि चुणी, मगर यू आदर-सम्मान त वेतैं पिता परमेस्वर न दिनी। अर पवित्रशास्‍त्र की एक जगा मा परमेस्वर वेका बारा मा इन बुल्दु कि, “तू मेरु पुत्र छैई, अर आज से मि तेरु पिता छौं।”

इब्रानी 5:10

किलैकि पिता परमेस्वर न यीशु मसीह तैं मलिकिसिदक की तरौं सदनि खुणि महा पुरोहित बणैयालि।

इब्रानी 6:20

अर हमरु यीशु मसीह उख पैलि ही पौंछी गै, अर पिता परमेस्वर न वेतैं मलिकिसिदक की तरौं सदनि खुणि महा पुरोहित ठैरैयालि।

इब्रानी 8:1

हे मेरा दगड़्यों, हमरि यों सब बातों को मतलब यू च कि हमरु यीशु मसीह एक इन्द्रयो महा पुरोहित च, जु कि स्वर्ग मा सबसे महान परमेस्वर की राजगद्‍दी की दैंणी तरफा बैठयूं च।

इब्रानी 8:3

अर हरेक महा पुरोहित तैं इलै ठैर्युं जान्दु ताकि उ पिता परमेस्वर का समणि अरपण मा चड़ईं भेंट अर बलिदान तैं लेके अऽ। अर ईं बात का मुताबिक हमरा महा पुरोहित यीशु का पास भि चड़ौणु खुणि कुछ ना कुछ होण चयेणु।

इब्रानी 9:11

हे मेरा भै-बैंणो, अब जब यीशु मसीह ईं दुनियां मा एक महा पुरोहित बणि के ऐ, त उ हम खुणि भली से भली आसीस लेके ऐ, जु कि आज हमतै मिलणी छिन। अर जख यीशु मसीह न सेवा कैरी उ बड़ु भलु च किलैकि उ पवित्र तम्बू मनखियों का हाथोंळ नि बणि अर ना ही उ ईं दुनियां को च।