गलातियों 3:22 - Garhwali

²² मगर सब लोग पाप का अधीन मा छिन येका बारा मा पवित्रशास्‍त्र हमतै बतौन्दु। इलै यीशु मसीह पर बिस्वास करण से सदनि को जीवन देण को जु करार किये गै, उ बिस्वास करण वळा लोगु खुणि ही दिये गै।

गढवली नयो नियम

²² पर पिता परमेश्वर का वचनों बट्टी पता चलदु च कि हम सभि पापी छा, इलै यीशु मसीह पर विश्वास रखण बट्टी पिता परमेश्वर हम तैं उपहार दयालो ज्यांकी नई प्रतिज्ञा पिता परमेश्वर की करीं च।

गलातियों 3:22 Referans Kwoze

रोमियों 11:32

किलैकि परमेस्वर न सब लोगु तैं ऊंकी आज्ञा नि मनण वळी जिद्‍द पर ही छोड़ि दिनी अर इन वेन इलै कैरी, ताकि उ सब लोगु पर अपणी दया दिखै सैको।

इब्रानी 9:15

अर लोगु तैं पाप से छुड़ौण का खातिर यीशु मसीह मरे गै। अर ईं मौत का द्‍वारा वेन पुरणा करार तैं रद्‍द कैरी दिनी, ताकि उ अपणा चुण्यां लोगु तैं पिता परमेस्वर का द्‍वारा मिलण वळी सदनि की आसिसों तैं द्‍यो, अर वेका दगड़ा-दगड़ि एक नयू करार भि द्‍यो जु की सदनि को जीवन च।

गलातियों 3:23

अर यीशु मसीह पर बिस्वास करण से पैलि हम यहूदी लोग नियम-कानूनों का अधीन मा छा, अर ऊं नियम-कानूनों का द्‍वारा ही हमरि हिफाजत होन्दी छै। अर यीशु मसीह जु कि औण वळु छौ, वे पर ही बिस्वास करण से हम लोग ऊं नियम-कानूनों की गुलामी से आजाद ह्‍वे ग्यां।

1 यूहन्ना 2:25

अर जु करार वेन हमरा दगड़ा मा कर्युं च, उ करार सदनि को जीवन च।

यूहन्ना 3:36

अर जु कुई वे पुत्र पर बिस्वास करदु, वेतैं ही सदनि को जीवन मिलदु। अर जु कुई पुत्र पर बिस्वास नि करदु, वेतैं जीवन नि मिललु, बल्किन मा परमेस्वर को परकोप वे पर पोड़दु।”

यूहन्ना 12:46

अर मि ईं दुनियां मा उज्याळु बणि के अयूं छौं। ताकि जु कुई भि मि पर बिस्वास कैरो, उ अन्धेरा मा नि रौ।

यूहन्ना 5:24

“अर मि तुम बटि सच्‍चि ही बोन्‍नु छौं, कि जु कुई मेरा वचनों तैं सुणी के मेरु भेजण वळा पर बिस्वास करदु, त जाणि ल्या की सदनि को जीवन वेकू ही च। अब वे पर दण्ड की आज्ञा नि ह्‍वेलि, किलैकि वेन मौत तैं भि पार कैरियाली अर वेतैं सदनि को जीवन मिली गै।

2 पतरस 3:13

मगर हम परमेस्वर का करार का मुताबिक एक नया आसमान अर एक नई धरती को इंतजार मा छां, जख उई लोग राला जु कि परमेस्वर की नजर मा धरमी छिन।

2 पतरस 1:4

अर वे आदर-सम्मान अर वीं अच्छी भावना का मुताबिक ही वेन हमतै कीमती अर अच्छा दान-बरदान दियां छिन, ताकि ये बरदान का द्‍वारा हम दुनियां मा होण वळा गळत सम्बन्ध रखण से, अर गन्दा काम करण से बचि जा, अर पिता परमेस्वर का सभौ का जन चलि सैका।

2 तीमुथियुस 1:1

हे मेरा भै-बैंणो मि पौलुस छौं, अर मितैं परमेस्वर न अपणी इच्छा का मुताबिक यीशु मसीह खुणि खास चेला ठैरै के चुण्यालि। अर मि या चिठ्‍ठी तीमुथियुस खुणि लिखणु छौं, जु कि मेरा प्रिय नौना का जन च। अर जु लोग यीशु मसीह पर बिस्वास करदिन, ऊंतैं जीवन देण को करार परमेस्वर को कर्युं च। अर येका बारा मा बतौणु खुणि ही परमेस्वर न मितैं चुणी के भेज्यूं च। तीमुथियुस मि प्रार्थना करदु कि, पिता परमेस्वर अर हमरु प्रभु यीशु मसीह अपणी किरपा, दया अर शान्ति त्वेतै देणु रौ।

गलातियों 3:29

अर अगर जु तुम यीशु मसीह का छाँ, त अब्राहम का वंश मदि, अर वे करार का मुताबिक वारिस भि छाँ, जु कि वेका दगड़ा मा किये गै छौ।

रोमियों 10:9

अर अगर जु तुम अपणा गिच्‍चा से ईं बात तैं स्वीकार करद्‍यां कि, “यीशु ही प्रभु च,” अर अपणा मन से बिस्वास करद्‍यां कि पिता परमेस्वर न यीशु मसीह तैं मुरदो मा बटि ज्यून्द कैरी, त तुमतै बचयै जालु।

रोमियों 5:12

हे मेरा भै-बैंणो, जब पितर आदम न पिता परमेस्वर की आज्ञा तैं तोड़ि, त पाप वेका द्‍वारा ईं दुनियां मा ऐ। अर आदम का वे पाप न मौत तैं जनम दिनी, ज्यां की वजै से आज मौत सब लोगु मा फैली गै, इलै सब लोग पापि छिन।

रोमियों 3:23

किलैकि सभ्यों न पिता परमेस्वर का खिलाप मा जैके गळत काम करिनी, अर ऊं पापों की वजै से वु लोग वेसे मिलण वळा आदर-सम्मान से दूर छिन।

खास चेलों 16:31

तब ऊंन वेतैं जबाब दिनी, “प्रभु यीशु मसीह पर बिस्वास कैर, तब तू अर तेरा घौर का सब लोग बचयै जाला।”

यूहन्ना 20:31

पर जु कुछ भि यां मा लिख्यूं च उ इलै लिख्यूं च, ताकि तुम बिस्वास कैरी सैका, कि यीशु ही परमेस्वर को पुत्र मसीह च। अर ईं बात पर बिस्वास कैरिके तुम वेका नौ से सदनि को जीवन पै सैका।

यूहन्ना 6:40

किलैकि मेरा पिता की मनसा या च, कि जु पुत्र तैं दिखदु अर वे पर बिस्वास करदु, उ सदनि को जीवन पौ अर मि वेतैं आखिरी का दिन मा ज्यून्दु कैरी द्‍यूं।”

गलातियों 3:17

दगड़्यों मेरु बोन्‍न को मतलब इन च कि जै करार तैं पिता परमेस्वर न अब्राहम का दगड़ा मा कैरी, वेका चार सौ तीस साल बाद नियम-कानून दिये गैनी। इलै अब यू नियम-कानून वे करार तैं बदलि नि सकदिन अर ना ही रद्‍द कैरी सकदिन।

गलातियों 3:14

अर यू इलै ह्‍वे कि ज्वा आसीस पितर अब्राहम तैं मिली छै, वा यीशु मसीह का द्‍वारा ऊं लोगु तैं भि मिलु जु यहूदी जाति का नि छिन, अर हम यहूदी लोग भि यीशु मसीह पर बिस्वास का द्‍वारा वे पवित्र आत्मा तैं पा जैतैं देण को करार पिता परमेस्वर न कैरी छौ।

मरकुस 16:16

अर जु मनखि बिस्वास करलु, अर बपतिस्मा ल्यालु, वेतैं ही बचयै जालु, पर जु मनखि बिस्वास नि करलु, वु दोषी ठैरैये जालु।

रोमियों 3:22

अर यू सब कुछ तब होन्दु जब हम यीशु मसीह पर बिस्वास करद्‍यां, अर वेका द्‍वारा ही हम लोग धरमी ठैरैये जन्द्‍यां। अर जु कुई यीशु मसीह पर बिस्वास करदु, पिता परमेस्वर वे मनखि का दगड़ा मा कुई भेदभाव नि करदु।