गलातियों 3:14 - Garhwali

¹⁴ अर यू इलै ह्‍वे कि ज्वा आसीस पितर अब्राहम तैं मिली छै, वा यीशु मसीह का द्‍वारा ऊं लोगु तैं भि मिलु जु यहूदी जाति का नि छिन, अर हम यहूदी लोग भि यीशु मसीह पर बिस्वास का द्‍वारा वे पवित्र आत्मा तैं पा जैतैं देण को करार पिता परमेस्वर न कैरी छौ।

गढवली नयो नियम

¹⁴ मसीह ल इन इलै कैरी, कि अब्राहम कि आशीष मसीह यीशु मा अन्यजातियों तक पौंछो, अर हम यीशु मसीह पर विश्वास कना से वे पवित्र आत्मा तैं पां, वे तैं हम तैं दींणै की करार परमेश्वर ल कैरी।

गलातियों 3:14 Referans Kwoze

1 कुरिन्थि 12:13

अर हम बिस्वासी लोगु मा कुछ यहूदी जाति का छिन, अर कुछ लोग दुसरि जाति का छिन, अर कुछ लोगु गुलाम, त कुछ लोग आजाद छिन। पर हम सभ्या का सभि एक सरील ह्‍वे जां, इलै हम सभ्यों को एक ही पवित्र आत्मा का द्‍वारा बपतिस्मा ह्‍वे। अर पवित्र आत्मा वे पाणि का जन च जैतैं हम सभ्यों न एक कटोरा मा बटि पै।

इफिसुस 2:18

अर यीशु मसीह का द्‍वारा ही हम दुई दल का लोग, एक ही पवित्र आत्मा का द्‍वारा पिता का समणि जै सकद्‍यां।

गलातियों 3:2

अर मि तुम बटि बस इथगा पूछण चाणु छौं, कि तुमुन पिता परमेस्वर का द्‍वारा दियां पवित्र आत्मा का दान तैं, मूसा का दियां नियम-कानूनों का कामों का मुताबिक पै, या शुभ समाचार पर बिस्वास कैरिके?

खास चेलों 2:33

अर इन कैरिके यीशु न पिता परमेस्वर की दैंणी तरफा सबसे ऊँचो पद पै, अर पिता का कियां करार का मुताबिक पिता बटि पवित्र आत्मा तैं पैके वे करार तैं पूरु कैरी। अर आज वे ही करार का मुताबिक पवित्र आत्मा तैं वेन हम पर भि भरपूरी से दियाली। अर जु कुछ भि तुम दिखणा अर सुनणा छाँ, यू सब कुछ पवित्र आत्मा को काम च।

1 पतरस 1:22

अर अब तुमुन खुद वे सच्‍चा वचन तैं स्वीकार कैरिके अफ तैं शुद्ध कैरियाली। इलै अब तुम लोग अपणा बिस्वासी भै-बैंण का दगड़ा मा दिल से सच्‍चु प्यार कैरा, इन्द्रयो प्यार जैमा कुई कपट नि हो।

यूहन्ना 7:39

यीशु न यों बातों तैं पवित्र आत्मा का बारा मा बोलि, जु की वे पर बिस्वास करण वळो तैं बाद मा मिलण वळु छौ। अर अभि तक वे पवित्र आत्मा तैं नि दिये गै छौ, किलैकि यीशु तैं अभि तक पूरु आदर-सम्मान नि मिली छौ।

इफिसुस 4:30

अर परमेस्वर की पवित्र आत्मा तैं अपणा चाल-चलन से दुख नि द्‍या, किलैकि पवित्र आत्मा देके परमेस्वर न तुम पर अपणी मोर लगईं च, ताकि छुटकारा का दिन पर तुमतै छुडयै जौ।

इफिसुस 3:16

उ अपणी पवित्र आत्मा का द्‍वारा अपणा महान कुठार बटि तुम सभ्यों तैं इन दान द्‍यो, ताकि तुम अपणी आत्मा मा और भि जादा मजबूत होन्दी जा।

इफिसुस 2:22

अर अब तुम लोग भि यीशु मसीह का द्‍वारा हम यहूदी लोगु का दगड़ा मा मिली के एक इन मन्दिर बणौणा छाँ, जैमा पिता परमेस्वर अपणी पवित्र आत्मा का द्‍वारा रौन्दु।

गलातियों 4:6

अर इन साबित करणु खुणि परमेस्वर न अपणा पुत्र की पवित्र आत्मा हमरा मनों मा भेजि, ताकि इन पता चलि जौ कि हम वेकी औलाद छां। अर आज हम पवित्र आत्मा की मदद से प्रार्थना मा पिता परमेस्वर कू “हे मेरा अब्बा, मेरा पिता” बोलि सकद्‍यां।

गलातियों 3:16

अर जख तक करार की बात किये जौ, त करार पितर अब्राहम अर वेका वंश बटि किये गै छौ। अर पवित्रशास्‍त्र को यू करार हमतै वंश का भौत सा लोगु का बारा मा नि बतौन्दु, बल्किन मा सिरफ एक वंश का बारा मा बतौन्दु, जन कि लिख्यूं भि च कि, “तेरा वंश तैं” अर यां से या बात साफ ह्‍वे जान्दी कि वु वंशज मसीह च।

2 कुरिन्थि 1:22

अर वेन इन दिखौणु खुणि कि हम वेका छां, अपणा पवित्र आत्मा का दान तैं बयना का रुप मा हमरा मनों मा देई, ताकि इन साबित हो कि वेको करार जरुर पूरु होलु।

खास चेलों 5:32

अर यों बातों का गवा हम छां अर पवित्र आत्मा भि च, अर यू पवित्र आत्मा परमेस्वर न ऊंतैं दियूं च जु की वेकी आज्ञा को पालन करदिन।”

खास चेलों 4:12

“अर यीशु का अलावा कुई दुसरो बचै नि सकदु, किलैकि आसमान का मूड़ी अर लोगु का बीच मा कुई भि दुसरो नौ नि दिये गै, जैका द्‍वारा हमतै बचयै जौ।”

लूका 24:49

अर सुणा, पिता का वे करार का मुताबिक मि वेतैं तुम पास भेजलु, अर जबरि तक वा ताकत तुमतै स्वर्ग बटि नि मिली जौ, तबरि तक तुम यरूशलेम नगर मा ही रयां।”

लूका 11:13

इलै जब तुम बुरा ह्‍वेके भि अपणा बाल-बच्‍चों तैं अच्छी चीज देण जणद्‍यां, त जु लोग स्वर्ग मा रौण वळा पिता बटि मंगदा छिन ऊंतैं वु पवित्र आत्मा किलै नि द्‍यालु।”

1 पतरस 3:9

बुरै का बदला मा बुरै नि कैरा अर ना ही गळी का बदला मा गळी द्‍या, मगर इन्द्रया लोगु तैं बदला मा आसीस ही द्‍या, किलैकि पिता परमेस्वर न तुमतै यां खुणि ही बुलयूं च, ताकि तुम आसीस का वारिस बणि जा।