गलातियों 1:8 - Garhwali

⁸ मगर जै शुभ समाचार को परचार हमुन तुमतै सुणै, अगर वेका अलावा कुई तुमतै दुसरो ही समाचार सुणौ, त वे मनखि पर पिता परमेस्वर को असगार औण द्‍या। अब चै ऊ हम हो, या कुई स्वर्गदूत।

गढवली नयो नियम

⁸ पर जु हम मा बट्टी कुई अफ या स्वर्ग बट्टी मूड़ी अयुं एक स्वर्गदूत भि वेका शुभ सन्देश प्रचार तैं छोड़ी के, जु हम ल तुम तैं सुणै कुई हैंको शुभ सन्देश प्रचार तुम तैं सुंणौ त पिता परमेश्वर वे तैं दंड दयालो।

गलातियों 1:8 Referans Kwoze

गलातियों 1:9

अर जन हमुन पैलि ही बोलियालि छौ, ठिक उन्‍नि मि फिर से बोन्‍नु छौं, कि पिता परमेस्वर को जु शुभ समाचार तुमुन स्वीकार कैरी, अगर वेका अलावा कुई दुसरो समाचार तुमतै सिखौन्दु, त वे मनखि पर परमेस्वर को असगार औण द्‍या।

1 कुरिन्थि 16:22

अगर कुई प्रभु से प्यार नि करदु, त वे पर असगार लगु। हे हमरा प्रभु अऽ।

रोमियों 9:3

कास, मि अपणा यहूदी भै-बन्दों की मदद कैरी सकदु, जु अभि यीशु मसीह से दूर छिन। अर मि इन भि चान्दु, कि कास, ऊंका बदला मा मि मसीह से दूर ह्‍वे जान्दु, अर वेको पूरु असगार मि पर पोड़दु।

मत्ती 25:41

“तब राजा अपणा बैं तरफा वळो कू बोललु, ‘हे असगार लग्यां लोगु, मेरा समणि बटि दूर ह्‍वे जा, अर सदनि की वीं आग मा नास होणु कू चलि जा, ज्वा शैतान अर वेका दूतों खुणि तयार कैरिके रखी च।

2 पतरस 2:14

त यों का आंखा हमेसा इन्दरि जनानि कि ताक मा रौनदिन, जिं का दगड़ा मा यू गळत काम कैरी सैका। अर इन कैरिके यों का आंखा पाप करण खुणि ही लग्यां रौनदिन। अर यू लोग चंचल मन वळो तैं भरमै देन्दिन, अर यों का मन मा भौत लालच भोरयूं च। असल मा यू वु लोग छिन जौं पर असगार पोड़्यूं च।

खास चेलों 23:14

तब वु सब लोग मुख्य पुरोहितों अर अध्यक्ष लोगु का पास जैके बोन्‍न लगि गैनी कि, “हमरि कसम खईं च कि जबरि तक हम पौलुस तैं जान से नि मारी द्‍यूला, तबरि तक हमुन कुछ भि खाण-पीण नि च।

तीतुस 3:10

जु मनखि एक-दुसरा का बीच मा लड़ै-झगड़ा करौन्दिन, ऊंतैं एक-दुई बार समझै दे, अर फिर ऊं बटि कुई मतलब ही नि रख।

गलातियों 3:13

अर मसीह न हमतै नियम-कानूनों का असगार से छुड़ै, अर क्रूस पर चैड़ि के हमरा पापों को असगार खुद पर ले दिनी, किलैकि लिख्यूं च, “जु कुई भि क्रूस पर चड़ये जालु वे पर परमेस्वर को असगार लग्यूं च।”

1 कुरिन्थि 12:3

इलै मि तुमतै समझै देन्दु कि अगर कुई इन बुल्दु कि, “यीशु ही प्रभु च” त वु केवल परमेस्वर की आत्मा का बतै जाण का मुताबिक ही इन बुल्दु, अर इन्द्रयो मनखि कभि भि इन नि बोलि सकदु कि, “यीशु पर हाय च।”

मरकुस 14:71

तब पतरस न कसम खै के बोलि, “जै मनखि का बारा मा तुम बात कना छाँ मि वेतैं नि जणदु, अगर जणदु त मि पर असगार लगु।”

गलातियों 3:10

पर जु लोग खुद तैं धरमी साबित करणु खुणि केवल नियम-कानून का ही सरा पर टिक्यां छिन, वु सब लोग असगार का अधीन मा छिन। किलैकि पवित्रशास्‍त्र मा यू साफ-साफ लिख्यूं च कि, “जु कुई नियम-कानूनों की किताब मा लिखीं सब बातों का मुताबिक नि करदु, ऊं लोगु पर पिता परमेस्वर को असगार पोड़लु।”

रोमियों 16:17

हे मेरा प्यारा भै-बैंणो, मि तुम से बिन्ती करदु कि ऊं लोगु की खोज कैरा, जु कि लोगु तैं एक-दुसरा का खिलाप मा भड़कै देन्दिन, यू लोग इन्द्रया छिन जु कि बिस्वासी लोगु तैं ऊंका बिस्वास मा बटि भटके देन्दिन। अर यू लोग वीं सच्‍चि शिक्षा का खिलाप मा छिन, ज्वा तुम मा च। इलै तुम इन्द्रया लोगु से दूर रा।